ព័ត៌មានអន្ដរជាតិ

អ៊ីស្រាអែល ចាប់ផ្ដើមប្រតិបត្តិការលុកលុយជើងគោក ចូលក្នុងប្រទេសលីបង់

បានផុស

២ ខែ មុន

នៅ

ថ្ងៃអង្គារ ១ តុលា ២០២៤

ដោយ

Chheang

អ៊ីស្រាអែល បានចាប់ផ្ដើមប្រតិបត្តិការវាយឆ្មក់ជើងគោកចូលទៅប្រទេសលីបង់ជាបណ្ដើរៗហើយនៅព្រឹកថ្ងៃអង្គារនេះ នៅតាមតំបន់មួយចំនួនដែលជាប់ព្រំដែន ដើម្បីកម្ចាត់ក្រុមសកម្មប្រយុទ្ធហេសបូឡា។ នេះបើយោងតាមការចុះផ្សាយរបស់ទីភ្នាក់ងារព័ត៌មាន Reuters នៅថ្ងៃទី១ខែតុលា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោធាអ៊ីស្រាអែល បានប្រកាសនៅក្នុងសេចក្តីថ្លែងការណ៍ថា ខ្លួនបានចាប់ផ្តើមការវាយប្រហារជើងគោកកំណត់មូលដ្ឋាន និងគោលដៅជាក់លាក់ ដោយផ្អែកលើការស៊ើបការណ៍សម្ងាត់ច្បាស់លាស់ ប្រឆាំងនឹងក្រុមហេសបូឡាក្នុងភូមិភាគខាងត្បូងលីបង់ នៅជិតព្រំដែន ដែលអ៊ីស្រាអែលចាត់ទុកថាវាអាចបង្កការគំរាមកំហែងភ្លាមៗដល់សហគមន៍អ៊ីស្រាអែលនៅភាគខាងជើងប្រទេស។

យោធាអ៊ីស្រាអែល បានបន្ថែមទៀតថា កងកម្លាំងអាកាស និងកាំភ្លើងធំក៏កំពុងគាំទ្រកងកម្លាំងជើងគោកផងដែរ។

កាលពីថ្ងៃចន្ទ រដ្ឋមន្ត្រីការពារជាតិអ៊ីស្រាអែល លោក Yoav Gallant បានប្រាប់ប្រធានក្រុមប្រឹក្សាមូលដ្ឋាននៅភាគខាងជើងអ៊ីស្រាអែលថា ដំណាក់កាលបន្ទាប់នៃសង្រ្គាមនៅតាមបណ្តោយព្រំដែនភាគខាងត្បូងនៃប្រទេសលីបង់នឹងចាប់ផ្តើមក្នុងពេលឆាប់ៗនេះ ហើយនឹងគាំទ្រដល់គោលបំណងនៃការនាំយកជនជាតិអ៊ីស្រាអែល ដែលបានភៀសខ្លួនគេចពីគ្រាប់រ៉ុកកែតរបស់ក្រុមហេសបូឡា ក្នុងអំឡុងពេលជិតមួយឆ្នាំនៃការផ្ទុះសង្គ្រាមតាមព្រំដែន។

ការលុកលុយតាមជើងគោក បានឆ្លុះបញ្ចាំងថា ជម្លោះមានសភាពតានតឹងកាន់តែខ្លាំងឡើងនៅមជ្ឈិមបូព៌ារវាងអ៊ីស្រាអែល និងក្រុមសកម្មប្រយុទ្ធដែលគាំទ្រដោយអ៊ីរ៉ង់ ដែលដើមហេតុបង្កឡើងដោយការវាយឆ្មក់ដ៏សាហាវរបស់ក្រុមហាម៉ាសប៉ាឡេស្ទីនចូលទៅក្នុងប្រទេសអ៊ីស្រាអែលកាលពីជិតមួយឆ្នាំមុន។ ហានិភ័យនៃការកើនឡើងភាពតានតឹងនេះទៀតសោត អាចទាញឲ្យអាមេរិកនិងអ៊ីរ៉ង់ជាប់ពាក់ព័ន្ធដោយផ្ទាល់ ដែលអាចបណ្ដាលឲ្យផ្ទុះសង្គ្រាមធំ។

យោងតាមរដ្ឋាភិបាលលីបង់ ការវាយប្រហារតាមអាកាសដ៏ខ្លាំងក្លាកាលពីពេលថ្មីៗកន្លងទៅរបស់អ៊ីស្រាអែល បានសម្លាប់មេបញ្ជាការក្រុមហេសបូឡាអស់ចំនួន៧នាក់ និងសម្លាប់ជនស៊ីវិលប្រហែល ១០០០នាក់ ព្រមទាំងបង្ខំឲ្យពលរដ្ឋ១លាននាក់ត្រូវភៀសខ្លួនចេញពីផ្ទះសម្បែងរបស់ពួកគេ៕

ដោយ៖ ឈាង