ព្យុះ ២ទៀត នឹងវាយប្រហារវៀតណាម ក្នុងខែនេះ

កាលពីថ្ងៃពុធទី២ខែតុលាឆ្នាំ២០២៤ ទីភ្នាក់ងារអាកាសធាតុជាតិវៀតណាម បានចេញការព្រមានអំពីព្យុះចំនួនពីរ ដែលនឹងកកើតក្នុងសមុទ្រចិនខាងត្បូង ហើយមកវាយប្រហារប្រទេស ដោយនាំមកជាមួយនូវភ្លៀងធ្លាក់ខ្លាំងនៅភាគកណ្តាល ពេញមួយខែតុលានេះតែម្តង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ខែនេះ ចំនួនព្យុះនៅសមុទ្រចិនខាងត្បូង និងផលប៉ះពាល់ដែលអាចកើតមានលើដីគោកវៀតណាមគឺខ្ពស់ជាងកម្រិតមធ្យមជាងឆ្នាំមុនៗ។ លើសពីនេះ សីតុណ្ហភាពជាមធ្យមនៅទូទាំងប្រទេសក្នុងខែតុលានេះ ក៏ខ្ពស់ជាងកម្រិតមធ្យមលើសឆ្នាំមុនៗពី ០.៥ ទៅ ១.០ អង្សាសេផងដែរ។

ទាក់ទិននឹងទឹកភ្លៀងនៅភាគកណ្តាលប្រទេសវៀតណាមវិញ បរិមាណទឹកភ្លៀងសរុបនៅក្នុងតំបន់នេះ អាចខ្ពស់ជាងកម្រិតមធ្យមនៃឆ្នាំមុនពី ១០ទៅ៣០ភាគរយ។ មិនត្រឹមប៉ុណ្ណឹង ទីភ្នាក់ងារឧតុនិយមព្រមានថា ព្យុះផ្គររន្ទះនៅទូទាំងប្រទេស ក៏អាចនាំមកនូវខ្យល់កួច ផ្លេកបន្ទោរ ព្រឹល និងខ្យល់កន្ត្រាក់ខ្លាំងផងដែរ។

កាល​ពី​ខែ​មុន ព្យុះ​ចំនួន​ពីរ​បាន​បោកបក់​នៅ​តំបន់​សមុទ្រ​រួម​ទាំង​ព្យុះ​ទីហ្វុង យ៉ាកជី ផងដែរដែលវាយប្រហារ​ខេត្ត Quang Ninh និង​ទីក្រុង Hai Phong កាល​ពី​ថ្ងៃ​ទី ៧ ខែ​កញ្ញា។ ព្យុះទីហ្វុងនោះ បាននាំមកជាមួយនូវខ្យល់បក់យ៉ាងកាចសាហាវ និងបណ្តាលឲ្យមានភ្លៀងធ្លាក់ខ្លាំង ទឹកជំនន់ជាប្រវត្តិសាស្ត្រ និងបំណាក់ដី ដែលបង្កការបំផ្លិចបំផ្លាញដល់ខេត្តភាគខាងជើង។

គិតត្រឹមថ្ងៃទី២៧ខែកញ្ញា ព្យុះទីហ្វុង គ្រោះទឹកជំនន់ និងបំណាក់ដីជាបន្តបន្ទាប់ បានឆក់យកជីវិតមនុស្សចំនួន៣១៨នាក់ ខណៈ ១ ៩៧៥នាក់ផ្សេងទៀតរងរបួស រីឯ២៦នាក់នៅតែបាត់ខ្លួន។ ទន្ទឹមនោះ ផ្ទះប្រហែល ២៨២ ០០០ខ្នងនិងសាលារៀន ៣ ៧៥៥ខ្នងត្រូវខូចខាត ចំណែកស្រូវចម្ការនិងដំណាំ ព្រមទាំងដើមឈើហូបផ្លែលើផ្ទៃដីប្រមាណ ២៨៥ ០០០ហិកតា ត្រូវទឹកជន់លិចឬបំផ្លិចបំផ្លាញ៕

អត្ថបទ៖ សុខ សុវណ្ណ

ចុចអាន៖ ភាគកណ្តាលវៀតណាម មានមនុស្សស្លាប់ដោយសារទឹកជំនន់ ខណៈជាង ១ម៉ឺននាក់ ត្រូវជម្លៀស