ព័ត៌មានអន្ដរជាតិ

ប៉ូលិសថៃ រកឃើញតម្រុយបណ្តាលឲ្យឆេះរថយន្តដឹកសិស្ស, មិនមែនដោយសារផ្ទុះកង់ទេ

បានផុស

៤ ខែ មុន

នៅ

ថ្ងៃព្រហស្បតិ៍ ៣ តុលា ២០២៤

ដោយ

មេប៉ូលិសស្តីទីនៃប្រទេសថៃ លោកឧត្តមសេនីយ៍ Kittirat Panpetch បានថ្លែងក្នុងសន្និសីទសារព័ត៌មានមួយកាលពីថ្ងៃពុធទី២ខែតុលាឆ្នាំ២០២៤ថា ក្រុមអ្នកស៊ើបអង្កេតរកមិនឃើញព័ស្តុតាងណាមួយដែលចង្អុលបង្ហាញថា សម្បកកង់រថយន្តដឹកសិស្សផ្ទុះនោះទេ ហើយប៉ូលិសរកឃើញតម្រុយ ឈានដល់ការសន្និដ្ឋានបឋមថា សោកនាដកម្មនេះ គឺបណ្តាលមកពីទុស្សេខ្សែភ្លើងក្នុងរថយន្ត បង្កើតជាផ្កាភ្លើងទើបបណ្តាលឲ្យមានអគ្គិភ័យឆាបឆេះឡើង។

លោកឧត្តមសេនីយ៍ Kittirat Panpetch (រូបថត៖ Khaosod)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងការពិនិត្យនោះដែរ ពួកគេក៏បានរកឃើញធុងហ្គាស់ចំនួន១១ធុង ដែលត្រូវបានច្នៃដំឡើងដាក់នៅក្នុងរថយន្ត ហើយក្នុងនោះមាន ៥ធុងដែលគ្មានលិខិតអនុញ្ញាត។

ទោះបីជាយ៉ាងណាក៏ដោយ ប៉ូលិសនៅតែកំពុងស៊ើបអង្កេតដើម្បីរកឲ្យបានតម្រុយថ្មីៗទៀត ទើបអាចបញ្ជាក់ច្បាស់អំពីមូលហេតុនៃគ្រោះថ្នាក់ដ៏រន្ធត់នេះ។

ទិដ្ឋភាពនៅកន្លែងកើតហេតុឆេះរថយន្តដឹកសិស្ស (រូបថត៖ Khaosod)

សូមបញ្ជាក់ជាថ្មី រថយន្តនេះគឺជារថយន្តទីពីរនៅក្នុងក្រុមរថយន្តដែលមាន៣គ្រឿង ដឹកសិស្សពីខេត្ត Uthai Thani ទៅមើលការតាំងពិពណ៌នៅអាជ្ញាធរអគ្គិសនីថៃក្នុងស្រុក Bang Kruai នៃខេត្ត Nonthaburi។

រថយន្តក្រុងនេះមានដឹកសិស្សតូចៗចំនួន៣៨នាក់ និងគ្រូ៦នាក់ មកពីសាលា Wat Khao Praya Sangkharam ក្នុងស្រុក Lan Sak នៃខេត្ត Uthai Thani នៅពេលជួបហេតុការណ៍ដ៏រន្ធត់ដែលបណ្តាលឲ្យសិស្សថ្នាក់មត្តេយ្យនិងបឋមចំនួន២០នាក់និងគ្រូ៣នាក់ បាត់បង់ជីវិត។

តៃកុងឡាន បានចូលប្រគល់ខ្លួនឲ្យប៉ូលិសស្រុក Wiset Chai Chan ក្នុងខេត្ត Ang Thong កាលពីរាត្រីថ្ងៃអង្គារ ហើយប៉ូលិសក៏បញ្ជូនគាត់បន្តទៅប៉ុស្តិប៉ូលិស Khu Khut ក្នុងខេត្ត Pathum Thani ដើម្បីសាកសួរបន្ថែម។

តាមការបញ្ជាក់ពីតៃកុង រថយន្តនេះកំពុងធ្វើដំណើរក្នុងល្បឿន ៧០-៨០ គីឡូម៉ែត្រក្នុងមួយម៉ោង នៅពេលបាត់បង់លំនឹងដែលហាក់ដូចជាធ្លាក់ចូលក្នុងរណ្តៅនៅលើផ្លូវ Vibhavadi Rangsit ជិតផ្សារទំនើប Zeer Rangsit ក្នុងស្រុក Lam Luk Ka នាវេលាថ្ងៃត្រង់។

គាត់ថា រថយន្តមានបញ្ហាដូចជាផ្ទុះកង់ ឬពោងសុវត្ថិភាព ហើយក្រោយមករថយន្តក៏ទៅបុកជាមួយរថយន្ត Mercedes Benz មួយគ្រឿងមុនពេលបុករបាំងផ្លូវ។ បន្ទាប់មក អណ្តាតភ្លើងក៏ចាប់ផ្តើមរាលដាលយ៉ាងលឿនពេញរថយន្តតែម្តង។

តៃកុងឡានឈ្មោះ Samarn Chankut អាយុ៤៨ឆ្នាំ ត្រូវបានប៉ូលិស ចោទប្រកាន់ចំនួន៤ករណី ដូចជាបើកបរមិនប្រយ័ត្នបណ្តាលឲ្យមនុស្សស្លាប់ (ប្រឈមជាប់ពន្ធនាគារអតិបរមា១០ឆ្នាំ និង/ឬពិន័យជាប្រាក់២០ម៉ឺនបាត), បើកបរមិនប្រុងប្រយ័ត្នបង្កគ្រោះថ្នាក់ដល់អ្នកដទៃនិងទ្រព្យសម្បត្តិ (ផាកពិន័យពី ៤០០ ទៅ ១០០០ បាត), បង្ករបួសស្នាមដល់អ្នកដទៃនិងមិនជួយជនរងគ្រោះ (ប្រឈមជាប់ពន្ធនាគារពីមួយខែទៅបីខែ និង/ឬពិន័យជាប្រាក់ ២ ០០០បាត) និងបណ្តាលឲ្យរបួសធ្ងន់ធ្ងរនិងស្លាប់ (ប្រឈមជាប់ពន្ធនាគារអតិបរមា៣ខែ និង/ឬពិន័យជាប្រាក់ ២ ០០០បាត)៕

អត្ថបទ៖ សុខ សុវណ្ណ

ចុចអាន៖ តៃកុងឡានដឹកសិស្សសាលាថៃ ត្រូវចោទប្រកាន់ចំនួន ៤ករណី