ព័ត៌មានអន្ដរជាតិ

តោខ្លា៥១ក្បាលងាប់ព្រោះឆ្លង H5N1 នៅវៀតណាម

បានផុស

៤ ខែ មុន

នៅ

ថ្ងៃសុក្រ ៤ តុលា ២០២៤

ដោយ

Chheang

នៅចន្លោះខែសីហា និងខែកញ្ញា តោនិងខ្លាចំនួន៥១ក្បាលបានងាប់បន្តកន្ទុយគ្នានៅឯសួនសត្វចំនួន២កន្លែងស្ថិតនៅភាគខាងត្បូងប្រទេសវៀតណាម ដោយសារតែជំងឺផ្ដាសាយបក្សីប្រភេទ H5N1។ នេះបើយោងតាមការចុះផ្សាយរបស់ទីភ្នាក់ងារព័ត៌មានរដ្ឋវៀតណាម VNA។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើយោងតាម VNA ក្នុងចំណោមសត្វដែលងាប់ មានខ្លាចំនួន៤៧ក្បាល តោ៣ក្បាល និងខ្លារខិន១ក្បាល ស្ថិតនៅសួនសត្វឯកជន My Quynh ក្នុងខេត្ត Long An និងសួនសត្វ Vuon Xoai ក្នុងខេត្ត Dong Nai។

យោងតាមលទ្ធផលតេស្តរបស់មជ្ឈមណ្ឌលជាតិសម្រាប់ការវិនិច្ឆ័យសុខភាពសត្វ តោខ្លាទាំងនោះបានងាប់ «ដោយសារតែវីរុស H5N1 ប្រភេទ A»។

មន្ត្រីម្នាក់នៅមជ្ឈមណ្ឌលគ្រប់គ្រងជំងឺខេត្ត Dong Nai លោក Phan Van Phuc បាននិយាយថា សត្វខ្លានៅសួនសត្វ Vuon Xoai ត្រូវបានផ្ដល់ចំណីជាសាច់មាន់ នៅមុនពេលពួកវាបានងាប់។

លោក Phuc បានរៀបរាប់ថា៖ «វាទំនងជាថាសត្វខ្លាបានឆ្លងមេរោគពីមាន់ឈឺ ហើយអាជ្ញាធរកំពុងតាមដានប្រភពនៃសត្វមាន់ដើម្បីកំណត់ពីមូលហេតុ»។

មជ្ឈមណ្ឌលគ្រប់គ្រងជំងឺ បាននិយាយនៅក្នុងសេចក្តីថ្លែងការណ៍មួយថា បុគ្គលិកសួនសត្វសរុបចំនួន៣០នាក់ មានទំនាក់ទំនងជិតស្និទ្ធជាមួយសត្វដែលងាប់ តែពួកគេមិនមានរោគសញ្ញាផ្លូវដង្ហើមអ្វីនោះទេ ពោលគឺនៅមានសុខភាពល្អធម្មតា។

សូមបញ្ជាក់ថា វៀតណាមបានរកឃើញថាមានករណីមនុស្សស្លាប់ជាលើកដំបូងដោយសារវីរុសផ្ដាសាយបក្សីកាលពីដើមឆ្នាំ២០២៤។

អង្គការសុខភាពពិភពលោក ធ្លាប់បានព្រមានប្រឆាំងនឹងការទទួលទានសាច់ និងស៊ុតឆៅ ឬមិនទាន់ចម្អិនឆ្អិនពីតំបន់ដែលកើតមានជំងឺផ្តាសាយបក្សី ដោយសារតែហានិភ័យខ្ពស់នៃការរីករាលដាលនៃការឆ្លងជំងឺ៕

ដោយ៖ ឈាង

Related Topics:ប្រទេសវៀតណាម