មនុស្សស្លាប់កើនដល់ជាង ២០០នាក់ ដោយសារព្យុះកំណាច Helene នៅអាមេរិក

តាមការចុះផ្សាយរបស់ NBC News, គិតត្រឹមព្រឹកថ្ងៃសុក្រទី៤ខែតុលាឆ្នាំ២០២៤ តួលេខមនុស្សស្លាប់ដោយសារព្យុះកំណាច Helene នៅសហរដ្ឋអាមេរិក បានលោតឡើងដល់២១៥នាក់ហើយ ខណៈក្រុមជួយសង្គ្រោះកំពុងតាមស្វែងរកអ្នកបាត់ខ្លួនច្រើននាក់ទៀត ជាមួយក្តីសង្ឃឹមថា ពួកគេអាចនៅរស់រានមានជីវិត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កន្លែងដែលរងគ្រោះខ្លាំងជាងគេគឺរដ្ឋ North Carolina ពោលគឺនៅទីនោះ គ្រាន់តែមនុស្សស្លាប់ មានច្រើនជាងពាក់កណ្តាលនៃតួលេខសរុបទៅទៀត។ មិនត្រឹមប៉ុណ្ណឹង រដ្ឋ North Carolina ក៏រងការបំផ្លិចបំផ្លាញយ៉ាងធំធេង ដោយសារព្យុះកំណាចនេះផងដែរ។

ក្រៅពីមនុស្សស្លាប់ នៅមានពលរដ្ឋរាប់រយនាក់ទៀតដែលត្រូវរបួសនិងកំពុងបាត់ខ្លួន ខណៈផ្ទះសម្បែងជាង ៧៨០ ០០០ខ្នង មិនមានអគ្គិសនីនិងរាប់ម៉ឺននាក់គ្មានទឹកស្អាតប្រើប្រាស់ រយៈពេលជិតមួយសប្តាហ៍មកហើយ។

លើសពីនេះ ផ្លូវថ្នល់រាប់រយខ្សែនៅតែបិទមិនឲ្យធ្វើចរាចរណ៍ ជាហេតុរារាំងដល់ប្រតិបត្តិការផ្តល់ជំនួយទៅកាន់បណ្តាសហគមន៍ដែលរងគ្រោះខ្លាំង។ យ៉ាងណាក្តី ក្នុងករណីចាំបាច់បំផុត ក្រុមជួយសង្គ្រោះដោយមានជំនួយពីក្រុមហ៊ុនឯកជន បានប្រើប្រាស់ឧទ្ធម្ភាគចក្រ ដើម្បីធ្វើប្រតិបត្តិការ។

អ្វីដែលគេបារម្ភគឺពាក់ព័ន្ធការព្រមានរបស់រដ្ឋមន្ត្រីក្រសួងសន្តិសុខមាតុភូមិ Alejandro Mayorkas ដែលថា បើប៉ុន្មានខែខាងមុខ មានព្យុះមកវាយប្រហារសហរដ្ឋអាមេរិកទៀតនោះ ទីភ្នាក់ងារគ្រប់គ្រងគ្រាអាសន្នសហព័ន្ធ នឹងពិបាកផ្តល់ជំនួយហើយ។

សូមបញ្ជាក់ថា រដូវខ្យល់ព្យុះអាត្លង់ទិក នឹងបន្តរហូតដល់ចុងខែវិច្ឆិកា ហើយបច្ចុប្បន្ននេះ ព្យុះពីរទៀតកំពុងកកើតឡើងហើយ៕

អត្ថបទ៖ សុខ សុវណ្ណ

ចុចអាន៖ តួលេខមនុស្សស្លាប់ដោយសារព្យុះកំណាច Helene នៅអាមេរិក កើនដល់ជិត ១០០នាក់