ព្រះអាទិត្យផ្ទុះអណ្តាតភ្លើង ជះព្យុះកម្តៅមកផែនដីនៅចុងសប្តាហ៍នេះ

ត្បិតតែមួយរយៈចុងក្រោយប្រទេសមួយចំនួននៅលើពិភពលោក ត្រូវរងគ្រោះដោយសារតែព្យុះនិងគ្រោះទឹកជំនន់ក៏ពិតមែន ប៉ុន្តែក្រុមអ្នកវិទ្យាសាស្រ្តព្រមានថា ព្រះអាទិត្យបានផ្ទុះចេញអណ្តាតភ្លើង (Solar Flare) ក្នុងកម្លាំង X9.05 ហើយជះកម្តៅមកភពផែនដីនៅចុងសប្តាហ៍នេះ។ នេះបើតាមការចុះផ្សាយរបស់គេហទំព័រ​ Space.com។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្វីដែលគួរឲ្យកត់សម្គាល់គឺថា លើកនេះគឺជាការផ្ទុះអណ្តាតភ្លើងចេញពីព្រះអាទិត្យដែលមានឥទ្ធិពលខ្លាំងបំផុត មិនធ្លាប់មានសោះបើគិតចាប់តាំងពីឆ្នាំ២០១៧មក។

ការព្រមាននេះកើតឡើង បន្ទាប់ពីគេឃើញដែនពណ៌ខ្មៅឈ្មោះ Sunspot AR3842 លេចចេញនៅលើផ្ទៃព្រះអាទិត្យ កាលពីល្ងាចថ្ងៃអង្គារទី១ខែតុលា ហើយគេព្យាករថា វានឹងផ្ទុះចេញអណ្តាតភ្លើង (Solar Flare) ហើយជះកម្តៅមកភពផែនដី នៅរសៀលថ្ងៃសៅរ៍ទី៥ខែតុលានេះតែម្តង ដោយទ្វីបអឺរ៉ុបនឹងជាកន្លែងដែលទទួលឥទ្ធិពលខ្លាំងជាងគេ។

តាមការបញ្ជាក់ពីរដ្ឋបាលមហាសមុទ្រនិងបរិយាកាសជាតិអាមេរិក (NOAA) ព្យុះកម្តៅនេះអាចបណ្តាលឲ្យសីតុណ្ហភាពហក់ឡើងខ្ពស់ កាត់ផ្តាច់រលកធាតុអាកាស ខូចខាតដល់បណ្តាញអគ្គិសនី និងរំខានដល់ទំនាក់ទំនងផ្កាយរណបទៀតផង។

ស្របពេលជាមួយគ្នានោះដែរ ក្រុមអ្នកវិទ្យាសាស្រ្តកំពុងមានក្តីបារម្ភថា ព្រះអាទិត្យហាក់ប្រែប្រួលខុសពីការព្យាករ ព្រោះដំបូងឡើយគេគិតថា ការជះកម្តៅបែបនេះទំនងជាងនឹងកើតឡើងក្នុងរង្វង់ខែកក្កដាឆ្នាំ២០២៥ឯណោះទេ ប៉ុន្តែស្រាប់តែវាកើតឡើងលឿនជាងការរំពឹងទុកទៅវិញ។

ដូច្នេះហើយ ទើបក្រុមអ្នកវិទ្យាសស្រ្តចាប់ផ្តើមធ្វើការវាយប្រហារនិងសិក្សាជាថ្មីទៅលើព្រះអាទិត្យ ហើយវិភាគអំពីបាតុភូតនានាដែលអាចកើតឡើងនាពេលខាងមុខឲ្យកាន់តែល្អិនល្អន់៕

អត្ថបទ៖ សុខ សុវណ្ណ

ចុចអាន៖ ត្រៀមខ្លួន! ឆ្នាំក្រោយ ព្យុះព្រះអាទិត្យ នឹងវាយប្រហារភពផែនដី កាចសាហាវជាងឆ្នាំនេះទៀត