ស៊ីរី និងអ៊ីរ៉ង់ ពិភាក្សាគ្នាអំពីមធ្យោបាយគាំទ្រលីបង់

ប្រធានាធិបតីស៊ីរី លោក Bashar al-Assad និងរដ្ឋមន្ត្រីការបរទេសអ៊ីរ៉ង់ លោក Abbas Araghchi កាលពីថ្ងៃសៅរ៍បានពិភាក្សាគ្នាអំពីវិធីគាំទ្រប្រទេសលីបង់ ចំពេលមានការវាយលុករបស់យោធាអ៊ីស្រាអែលដែលកំពុងបន្ត​កាន់​តែ​ខ្លាំង​ឡើងៗ។

យោងតាមទីភ្នាក់ងារសារព័ត៌មានរដ្ឋស៊ីរី SANA លោក Assad បានសង្កត់ធ្ងន់លើទំនាក់ទំនងជាយុទ្ធសាស្ត្ររវាងស៊ីរី និងអ៊ីរ៉ង់ ក្នុងអំឡុងកិច្ចប្រជុំជាមួយលោក Araghchi និងគណៈប្រតិភូរបស់លោក។

លោកប្រធានាធិបតីបានគូសបញ្ជាក់អំពីសារៈសំខាន់នៃសម្ព័ន្ធភាពរបស់ពួកគេក្នុងការប្រឈមមុខនឹងបញ្ហាប្រឈម ជាពិសេសសកម្មភាពរបស់អ៊ីស្រាអែលនៅក្នុងតំបន់។

លោក Assad បានកោត​សរសើរការឆ្លើយតបដ៏ខ្លាំងក្លារបស់អ៊ីរ៉ង់ចំពោះ​អ៊ីស្រាអែល និងបានអះអាងជាថ្មីនូវការប្តេជ្ញាចិត្តរបស់ស៊ីរីក្នុងការទប់ទល់នឹងអ្វីដែល​លោក​បានពិពណ៌នាថាជា «ការ​ឈ្លាន​ពាន»។

ភាគីទាំងពីរក៏បានសង្កត់ធ្ងន់លើតម្រូវការសម្រាប់កិច្ចខិតខំប្រឹងប្រែងសម្របសម្រួលដើម្បីបញ្ឈប់ការវាយប្រហារ និងជំនួយ​ដល់​ជនស៊ីវិលលីបង់ដែល​បាន​ជម្លៀស​ខ្លួន​ផង​ដែរ៕

ដោយ៖ ឈាង