ព័ត៌មានអន្ដរជាតិ

មនុស្សជាង៥លាននាក់ក្នុង១៦ប្រទេស រងផលប៉ះពាល់ព្រោះទឹកជំនន់នៅអាហ្វ្រិក

បានផុស

១ ខែ មុន

នៅ

ថ្ងៃអាទិត្យ ៦ តុលា ២០២៤

ដោយ

Chheang

អង្គការសហប្រជាជាតិ បានប្រកាសថា មនុស្សជាង ១០០០នាក់បានស្លាប់ និងយ៉ាងហោចណាស់ ៧៤ម៉ឺននាក់ ត្រូវបានជម្លៀសខ្លួន ខណៈដែលទឹកជំនន់បានធ្វើឲ្យមានការបំផ្លិចបំផ្លាញនៅទូទាំងអាហ្វ្រិកខាងលិច និងកណ្តាល ដែលប៉ះពាល់ដល់មនុស្សជាង ៥លាននាក់នៅក្នុងប្រទេសចំនួន១៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ភាគច្រើននៃតំបន់អាហ្រ្វិកកណ្តាល និងខាងលិច ក៏ដូចជាតំបន់ Sahel បាននិងកំពុងជួបប្រទះនូវទឹកជំនន់យ៉ាងធ្ងន់ធ្ងរ ដោយសារតែភ្លៀងធ្លាក់ខ្លាំង។

បើយោងតាមការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) ប្រទេសឆាដ នីហ្សេ និងនីហ្សេរីយ៉ា គឺជាប្រទេសរងគ្រោះខ្លាំងជាងគេ ដែលមានចំនួនជាង ៨០ភាគរយនៃប្រជាជនដែលរងផលប៉ះពាល់សរុប។

ក្រៅពីចំនួនមនុស្សស្លាប់ ផ្ទះសម្បែង សាលារៀន និងកន្លែងថែទាំសុខភាពរាប់សែនខ្នងត្រូវបានខូចខាត ដោយផ្ទៃដីស្រែចំការប្រហែលកន្លះលានហិចតាត្រូវបានបំផ្លាញ គំរាមកំហែងដល់សន្តិសុខស្បៀង និងការកើនឡើងនៃកង្វះអាហារូបត្ថម្ភ ជាពិសេសនៅប្រទេសឆាដ និងប្រទេសនីហ្សេ។

អង្គការសហប្រជាជាតិបានព្រមានថា ស្ថានភាពរស់នៅមិនច្បាស់លាស់ក៏កំពុងបង្កើនហានិភ័យនៃការរីករាលដាលជំងឺពាក់ព័ន្ធនឹងទឹកផងដែរ ដូចជាជំងឺអាសន្នរោគ នៅក្នុងប្រទេសនីហ្សេ និងនីហ្សេរីយ៉ា។

លោកស្រី Joyce Msuya ជំនួយការអគ្គលេខាធិការរងកិច្ចការមនុស្សធម៌ និងអ្នកសម្របសម្រួលជំនួយសង្គ្រោះបន្ទាន់ បានត្រៀមថវិកាចំនួន ៣៥លានដុល្លារ ដើម្បីគាំទ្រការឆ្លើយតបនៅក្នុងប្រទេសឆាដ នីហ្សេ នីហ្សេរីយ៉ា សាធារណរដ្ឋប្រជាធិបតេយ្យកុងហ្គោ និងប្រទេសកុងហ្គោ។ អង្គការសហប្រជាជាតិ បានសង្កត់ធ្ងន់ថា ទោះបីជាយ៉ាងណាក៏ដោយ ក៏តម្រូវការមូលនិធិបន្ថែមគឺនៅតែចាំបាច់សម្រាប់កិច្ចប្រឹងប្រែងជួយសង្គ្រោះនៅអាហ្វ្រិក៕

ដោយ៖ ឈាង