ទីក្រុងបាងកក ប្រឈមទឹកជំនន់ ដ៏គ្រោះថ្នាក់ នៅសប្តាហ៍នេះ

នាយកដ្ឋានធារាសាស្ត្រថៃ បានចេញការព្រមានដល់ប្រជាពលរដ្ឋដែលនៅតាមដងទន្លេចៅប្រាយ៉ា រួមទាំងអ្នកក្រុងបាងកកផងដែរ ត្រូវមានការប្រុងប្រយ័ត្នខ្ពស់ ព្រោះថាកម្ពស់ទឹកនឹងហក់ឡើងខ្លាំងហើយស្ថានភាពទឹកជំនន់អាចឈានដល់កម្រិតគ្រោះថ្នាក់នៅសប្តាហ៍នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកជំនាញផ្នែកវិស្វកម្មនៅនាយកដ្ឋានបានប្រាប់ទៅ Bangkok Post កាលពីថ្ងៃអាទិត្យទី៦ខែតុលាឆ្នាំ២០២៤ថា កម្រិតទឹកនឹងឡើងខ្ពស់ ដោយសារតែការបើកទំនប់នៅអាងទឹកចៅប្រាយ៉ាខាងលើ ក្នុងខេត្ត Chai Nat។

មន្ត្រីដដែលអះអាងថា អាងនោះនឹងបង្កើនការរំដោះទឹកពី ២ ១៥០ម៉ែត្រគូបក្នុងមួយវិនាទី ទៅដល់ ២ ៤០០ម៉ែត្រគូប ក្នុងមួយវិនាទីនៅសប្តាហ៍នេះ។ ដូច្នេះហើយតំបន់នៅជាប់នោះចាប់ពីស្រុក Sapphaya នៃខេត្ត Chai Nat ទៅដល់ទីក្រុងបាងកក នឹងមានទឹកហូរខ្លាំងហើយជំនន់អាចឈានដល់កម្រិតគ្រោះថ្នាក់។

លើសពីនេះបើតាមការបញ្ជាក់ពីមន្ត្រីជំនាញ, ទីក្រុងបាងកក ក៏អាចប្រឈមនឹងជំនន់ធ្ងន់ធ្ងរផងដែរ ប្រសិនបើខែនេះ ភ្លៀងនៅតែធ្លាក់មកខ្លាំង ធ្វើឲ្យលូហូរមិនទាន់ ជាពិសេសចាប់ពីថ្ងៃទី១៨ដល់ថ្ងៃទី២២ខែនេះ។

យ៉ាងណាក្តី បច្ចុប្បន្ន ក្រុមមន្ត្រីក៏កំពុងពិនិត្យមើលប្រព័ន្ធបង្ហូរទឹកក្នុងទីក្រុង ដើម្បីធានាដល់ការគ្រប់គ្រងស្ថានភាពទឹក ខណៈក្រុងបាងកក ក៏បូមបង្ហូរទឹកចូលទៅទន្លេ Chin និង Bang Pakong ផងដែរ ដើម្បីត្រៀមទប់ទល់ជាមួយភ្លៀងធ្លាក់ខ្លាំងក្នុងខែនេះ៕

អត្ថបទ៖ សុខ សុវណ្ណ

ចុចអាន៖ ខេត្ត​៥​​និង​ក្រុងបាងកក​​​នឹង​ត្រូវ​ជន់​​​លិច​​ក្នុង​​រយៈពេល​១សប្តាហ៍ទៀត