ព័ត៌មានអន្ដរជាតិ

ក្នុងខួប១ឆ្នាំនៃសង្គ្រាមអ៊ីស្រាអែល-ហាម៉ាស កម្ពុជាថ្មីសូមលើកយកនូវកំណត់ត្រាសំខាន់ៗខ្លះ

បានផុស

៦ ខែ មុន

នៅ

ថ្ងៃចន្ទ ៧ តុលា ២០២៤

ដោយ

សង្គ្រាមរវាងអ៊ីស្រាអែលនិងក្រុមសកម្មប្រយុទ្ធហាម៉ាសប៉ាឡេស្ទីនបានឈានដល់ខួប១ឆ្នាំក្នុងថ្ងៃទី៧ខែតុលា២០២៤នេះ ខណៈសង្គ្រាមនេះបង្ហាញឱ្យឃើញនូវភាពប្រឈមដាក់គ្នាកាន់តែខ្លាំងមិនត្រឹមតែនៅតំបន់មជ្ឈិមបូព៌ាប៉ុណ្ណោះទេ ប៉ុន្តែភាពវឹកវរជុំវិញពិភពលោក។

ព្រឹត្តិការណ៍ធំៗបានកើតមានឡើងក្នុងសង្គ្រាម១ឆ្នាំនេះ៖

ទីក្រុងហ្គាហ្សាមុននិងក្រោយសង្គ្រាមកើតឡើង។ AP

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សង្គ្រាមចាប់ផ្តើមនៅថ្ងៃទី៧ខែតុលាឆ្នាំ២០២៣ ដោយក្រុមសកម្មប្រយុត្ធហាម៉ាសប៉ាឡេស្ទីនបានវាយប្រហារភាគខាងត្បូងអ៊ីស្រាអែលតាមផ្លូវគោក ផ្លូវទឹក និងផ្លូវអាកាសដោយប្រើយន្តហោះកែច្នៃហោះរំលងរបងសំណាញ់លួស និងបំផ្លាញរបងលួស ចំថ្ងៃដែលប្រទេសអ៊ីស្រាអែលប្រារព្វបុណ្យជាតិ។ ក្នុងហេតុការណ៍នោះ ក្រុមសកម្មប្រយុទ្ធហាម៉ាសសម្លាប់មនុស្ស១២០០នាក់ និងចាប់ជាចំណាប់ខ្មាំងប្រហែល២៥០នាក់។
ជាការសងសឹក អ៊ីស្រាអែលបានប្រកាសភ្លាមៗដាក់ប្រទេសក្នុងស្ថានភាពសង្គ្រាម និងចាប់ផ្តើមបាញ់ផ្លោងដោយម៊ីស៊ីល យន្តហោះទម្លាក់គ្រាប់បែក សំដៅបំផ្លាញទីតាំងមូលដ្ឋានទ័ពរបស់ហាម៉ាស ដោយចាប់ផ្តើមពីភាគខាងជើងតំបន់ហ្គាហ្សា។ សង្គ្រាមបានចាប់ផ្តើមវឹកវរនៅតំបន់ហ្គាហ្សា។
សង្គ្រាមបានផ្ទុះឡើងជិត២ខែ ភាគីជម្លោះអ៊ីស្រាអែលនិងហាម៉ាសបានសម្រេចកិច្ចព្រមព្រៀងបទឈប់បាញ់ម្តងកាលថ្ងៃទី២៤ដល់ថ្ងៃទី៣០ខែវិច្ឆិកា២០២៣ ក្រោមការសម្របសម្រួលរបស់ប្រទេសកាតា។កិច្ចព្រមព្រៀងបទឈប់បាញ់ដំបូងមានរយៈពេល៤ថ្ងៃបាននាំទៅដល់ការដោះលែងចំណាប់ខ្មាំង៥០នាក់ក្នុងចំណោម២៤០នាក់ដែលក្រុមហាម៉ាសចាប់ពង្រត់កាលថ្ងៃទី៧ខែតុលាឆ្នាំ២០២៣ ជាថ្នូរនឹងការដោះលែងអ្នកទោស១៥០នាក់របស់ប៉ាឡេស្ទីនដែលជាប់ទោសកន្លងមកនៅអ៊ីស្រាអែល។
ក្រោយមកបទឈប់បាញ់នោះបានបន្ថែម២ថ្ងៃទៀតដោយក្រុមចំណាប់ខ្មាំង២០នាក់ទៀត និងក្រុមអ្នកទោសប៉ាឡេស្ទីន៦០នាក់ត្រូវបានដោះលែង។ ចំណាប់ខ្មាំងភាគច្រើនដែលដោះលែងគឺជាកុមារនិងមនុស្សវ័យចំណាស់ ខណៈអ្នកទោសប៉ាឡេស្ទីនគឺជាមេដឹកនាំនិងអ្នកប្រយុទ្ធសំខាន់ៗ។
មេដឹកនាំចលនានយោបាយរបស់ក្រុមហាម៉ាស លោក Ismail Haniyeh ត្រូវបានសម្លាប់នៅថ្ងៃទី៣១ខែកក្កដាឆ្នាំ២០២៤ ក្នុងទឹកដីអ៊ីរ៉ង់ នៅពេលដែលលោកទៅចូលរួមកម្មវិធីផ្លូវការអបអរសាទរប្រធានាធិបតីថ្មីរបស់អ៊ីរ៉ង់ឡើងកាន់តំណែង។
លោក Yahya Sinwar ដែលជាក្រុមមេដឹកនាំសំខាន់មួយរូបរបស់ហាម៉ាស និងធ្លាប់ជាប់ពន្ធនាគារនៅប្រទេសអ៊ីស្រាអែល ក្រោយមកបានឡើងដឹកនាំជំនួសកន្លែងរបស់ លោក Ismail Haniyeh ដែលត្រូវគេធ្វើឃាត។
យោងតាមក្រសួងសុខាភិបាលតំបន់ហ្គាហ្សា ក្នុងសង្គ្រាម១ឆ្នាំនេះ អ៊ីស្រាអែលបានសម្លាប់ប្រជាជនប៉ាឡេស្ទីន៤២០០០នាក់ ខណៈដែលប្រជាជនប្រមាណជិត១០ម៉ឺននាក់បានរងរបួស។ ការស្លាប់និងរបួសក្នុងពេលកន្លងមក គឺភាគច្រើននៅលើកុមារនិងស្ត្រី។
តំបន់ហ្គាហ្សាទាំងមូលបានក្លាយជាតំបន់ផេះផង់ ហើយប្រជាជននៅតំបន់ហ្គាហ្សាទាំងមូលជិត២,៣លាននាក់បានបាត់បង់ទីជម្រក និង បង្កវិបត្តិអត់ឃ្លានយ៉ាងធ្ងន់ធ្ងរបំផុត។
ព្រឹត្តិការណ៍សំខាន់ៗផ្សេងៗទៀត នឹងត្រូវសង្ខេបជូនមិត្តអ្នកអានជាបន្តបន្ទាប់!

ដោយ រ៉ាន់ រើយ