ព័ត៌មានអន្ដរជាតិ

នាវាកងទ័ពជើងទឹកនូវែលសេឡង់លិចជាលើកដំបូងចាប់តាំងពីសង្គ្រាមលោកលើកទី២

បានផុស

៤ ខែ មុន

នៅ

ថ្ងៃចន្ទ ៧ តុលា ២០២៤

ដោយ

កងទ័ពជើងទឹក Royal New Zealand បានបាត់បង់នាវាជាលើកដំបូងចាប់តាំងពីសង្គ្រាមលោកលើកទី២ បន្ទាប់ពីកប៉ាល់មួយរបស់ខ្លួនបានឆាបឆេះនិងក្រឡាប់នៅឆ្នេរសមុទ្រប្រទេស Samoa។ នេះបើយោងតាមការចេញផ្សាយរបស់សារព័ត៌មានBBCនៅថ្ងៃទី៧ខែកញ្ញានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

HMNZS Manawanui ដែលជានាវាជំនាញមុជទឹកបានជួបបញ្ហាប្រហែលមួយម៉ាយពីកោះ Upolu កាលពីយប់ថ្ងៃសៅរ៍ ក្រោយមកបានឆាបឆេះនិងក្រឡាប់ចូលទៅក្នុងសមុទ្រ។ យោងតាមកងកម្លាំងការពាររបស់ប្រទេសនូវែលសេឡង់ មនុស្សទាំង៧៥នាក់នៅលើនាវាត្រូវបានជម្លៀសដោយទូកសង្គ្រោះ និងត្រូវបានជួយសង្គ្រោះដោយសុវត្ថិភាពកាលពីព្រឹកថ្ងៃអាទិត្យ ខណៈមូលហេតុនៃការឆាបឆេះមិនទាន់ត្រូវបានដឹងនៅឡើយនោះទេ និងកំពុងស្ថិតនៅក្រោមការស៉ើបអង្គេត។

ទោះយ៉ាងណា ឧបទ្ទវហេតុនេះ បានកើតឡើងក្នុងអំឡុងពេលមានអាកាសធាតុអាក្រក់ និងមានខ្យល់បក់ខ្លាំង ខណៈមន្ត្រីបាននិយាយថា តំបន់នេះមិនត្រូវបានគេអង្កេតចាប់តាំងពីឆ្នាំ១៩៨៧មកម្លេះ។ បន្ទាប់ពីហេតុការណ៍នេះ នាវិកនិងអ្នករួមដំណើររបស់នាវា រួមទាំងអ្នកវិទ្យាសាស្ត្រ៧នាក់ និងបុគ្គលិកយោធាបរទេស៤នាក់ កំពុងស្នាក់នៅក្នុងប្រទេស Samoa សិនមុនពេលហោះហើរត្រឡប់ទៅប្រទេសនូវែលសេឡង់វិញ។

គួរបញ្ជាក់ថា HMNZS Manawanui គឺជានាវាកងទ័ពជើងទឹកទីមួយរបស់ប្រទេសនូវែលសេឡង់ដែលត្រូវបានលិចដោយអចេតនាចាប់តាំងពីប្រទេសនេះបានចូលរួមក្នុងសមរភូមិកងទ័ពជើងទឹកក្នុងអំឡុងសង្គ្រាមលោកលើកទីពីរ ខណៈនាវាជាច្រើនផ្សេងទៀតត្រូវបានលិចដោយចេតនាក្នុងអំឡុងពេលអន្តរាគមន៍ក្នុងហេតុផលផ្សេងៗ។

មន្ត្រីយោធាបាននិយាយថា កិច្ចខិតខំប្រឹងប្រែងរបស់ពួកគេឥឡូវនេះកំពុងងាកទៅរកការប៉ុនប៉ងជួយសង្គ្រោះនាវា និងកាត់បន្ថយផលប៉ះពាល់បរិស្ថានបន្ទាប់ពីការលិច៕