ព្រលឹងចុងសក់! យន្តហោះដឹកមនុស្ស ១៩៧នាក់ ត្រូវភ្លើងឆេះពេលចុះចតនៅ អាមេរិក

តាមការចុះផ្សាយរបស់ RT, យន្តហោះ Airbus 321 មួយគ្រឿងរបស់ក្រុមហ៊ុន Frontier Airlines ដែលមានដឹកមនុស្សចំនួន១៩៧នាក់ បានឆេះភ្លើងអំឡុងពេលចុះចតជាបន្ទាន់នៅឯអាកាសយានដ្ឋាន Harry Reid ក្នុងទីក្រុង Las Vegas នៃរដ្ឋ Nevada កាលពីថ្ងៃអាទិត្យទី៦ខែតុលាឆ្នាំ២០២៤ (ពេលវេលានៅកម្ពុជា)។

ពាក់ព័ន្ធបញ្ហានេះ រដ្ឋបាលអាកាសចរណ៍សហព័ន្ធ (FAA) បានចេញសេចក្តីថ្លែងការណ៍ថា ជើងហោះហើរលេខ១៣២៦ ដែលចាកចេញពីទីក្រុង San Diego ទៅ Las Vegas ដំបូងឡើយមានហុយផ្សែងចេញពីកាប៊ីន ហើយត្បិតតែមានបញ្ហាបែបនេះមែន ប៉ុន្តែពីឡុតនៅតែអាចចុះចតដោយសុវត្ថិភាព រួចក្រុមការងារក៏បានពន្លត់ភ្លើងនៅត្រង់ម៉ាស៊ីន។ 

អ្នកដំណើរដែលជិះក្នុងនោះ នាំគ្នាភ័យព្រលឹងចុងសក់ ប៉ុន្តែជាសំណាងល្អ គ្មាននរណាម្នាក់រងរបួសក្នុងឧបទ្ទវហេតុនេះទេ ព្រោះពួកគេត្រូវបានជម្លៀសចេញទាន់ពេលវេលា។

ស្របពេលជាមួយគ្នានោះ ក្រុមហ៊ុន Frontier ប្រកាសថា ខ្លួនកំពុងបើកការស៊ើបអង្កេតរកមូលហេតុពិត ជុំវិញការឆេះនេះ។

សូមបញ្ជាក់ថា មួយរយៈចុងក្រោយ គេឃើញថា វិស័យអាកាសចរណ៍បានបង្កជាក្តីបារម្ភយ៉ាងខ្លាំង ដោយសារតែយន្តហោះតែមានបញ្ហាជាបន្តបន្ទាប់។ ជាក់ស្តែង កាលពីខែមុនក្រុមហ៊ុន Cathay Pacific បានផ្អាកការហោះហើររបស់យន្តហោះ Airbus 350 ទាំងមូល ក្រោយរកឃើញថា វាមានបញ្ហាម៉ាស៊ីន៕

សូមទស្សនាវីដេអូ៖

អត្ថបទ៖ សុខ សុវណ្ណ

ចុចអាន៖ យន្តហោះដឹកមនុស្ស ២៧៦នាក់ ខូចហ្វ្រាំងនិងឆេះម៉ាស៊ីន ពេលចុះចតនៅ ជប៉ុន