ព័ត៌មានអន្ដរជាតិ

ប្រធានាធិបតីអ៊ីរ៉ង់ ប្រាប់ថាមិនចង់បានសង្គ្រាមទេ ទើបបាញ់មីស៊ីលចូលដីអ៊ីស្រាអែល

បានផុស

៦ ខែ មុន

នៅ

ថ្ងៃចន្ទ ៧ តុលា ២០២៤

ដោយ

Chheang

នៅក្នុងកិច្ចសន្ទនាតាមទូរសព្ទជាមួយលោក Dick Schoof នាយករដ្ឋមន្ត្រីហូឡង់ កាលពីថ្ងៃអាទិត្យ លោក Massoud Pezeshkian បានប្រាប់ថា អ៊ីរ៉ង់គ្មានបំណងចង់បង្កើតសង្គ្រាម និងភាពតានតឹងនោះទេ ដោយបន្ថែមថា សកម្មភាពបាញ់មីស៊ីលចូលដីអ៊ីស្រាអែលនាពេលថ្មីៗនេះ មានបំណងបញ្ឈប់របបឧក្រិដ្ឋកម្ម និងបង្កើតសន្តិភាពក្នុងតំបន់ប៉ុណ្ណោះ។

លោក Massoud Pezeshkian ប្រធានាធិបតីអ៊ីរ៉ង់ (រូបភាព៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានាធិបតីអ៊ីរ៉ង់ បាននិយាយថា រដ្ឋាភិបាលតេហេរ៉ង់បានស្វែងរកការអភិវឌ្ឍទំនាក់ទំនងដែលមានតុល្យភាពជាមួយគ្រប់ប្រទេសទាំងអស់ រួមទាំងបណ្ដាប្រទេសលោកខាងលិច។ ដោយឡែក ការផ្លោងមីស៊ីលជាង២០០គ្រាប់កាលពីដើមខែតុលា ធ្វើឡើងដើម្បីទប់ស្កាត់ភាពឃោរឃៅរបស់អ៊ីស្រាអែល បញ្ឈប់ការរីកសាយភាយនៃជម្លោះក្នុងតំបន់ និងបង្កើតភាពស្ងប់ស្ងាត់ដោយសន្តិភាព។

លោក Pezeshkian បានបន្ថែមថា ប្រតិបត្តិការនេះធ្វើឡើងស្របតាមធម្មនុញ្ញរបស់អង្គការសហប្រជាជាតិ និងផ្អែកលើក្របខ័ណ្ឌច្បាប់អន្តរជាតិ ហើយគ្រាន់តែវាយប្រហារគោលដៅយោធាតែប៉ុណ្ណោះ។

លោកបានសង្កត់ធ្ងន់ថា អ៊ីរ៉ង់បានបដិសេធមិនផ្តល់ការឆ្លើយតបភ្លាមៗចំពោះឧក្រិដ្ឋកម្មភេរវកម្មរបស់អ៊ីស្រាអែលក្នុងការធ្វើឃាតលោក Ismail Haniyeh មេដឹកនាំក្រុមហាម៉ាស ក្នុងទីក្រុងតេហេរ៉ង់ និងការរំលោភលើអធិបតេយ្យភាពជាតិរបស់ខ្លួន ដោយសង្ឃឹមថាដំណោះស្រាយការទូតនឹងនាំទៅដល់ការបង្កើតបទឈប់បាញ់នៅតំបន់ហ្គាហ្សាស្ទ្រីប។

លោក Pazeshkian បានបញ្ជាក់ទៀតថា អ៊ីស្រាអែលបានធ្វើឃាតលោក Haniyeh ដោយមានគោលបំណងស្ដារឡើងវិញនូវការបរាជ័យរបស់ខ្លួនក្នុងតំបន់ហ្គាហ្សា។ ទន្ទឹមនោះ លោកបានរិះគន់លោកខាងលិច និងសហរដ្ឋអាមេរិក ចំពោះការមិនថ្កោលទោសឧក្រិដ្ឋកម្មរបស់អ៊ីស្រាអែល។

ចំណែកនាយករដ្ឋមន្ត្រីហូឡង់ បាននិយាយថា ប្រទេសរបស់លោកមានជំនឿយ៉ាងមុតមាំថា តំបន់នេះមិនអាចទ្រាំទ្រនឹងភាពតានតឹងបន្ថែមទៀតបានទេ ហើយបានអំពាវនាវឲ្យភាគីទាំងអស់ ទប់ស្កាត់ការកើនឡើងនៃជម្លោះ។

លោក Schoof បានបន្តថា ហូឡង់បានជំរុញឲ្យអ៊ីស្រាអែលទទួលយកកិច្ចព្រមព្រៀងឈប់បាញ់នៅតំបន់ហ្គាហ្សាស្ទ្រីប ហើយបានគាំទ្រសំណើរបស់សហរដ្ឋអាមេរិកសម្រាប់ការបង្កើតបទឈប់បាញ់នៅក្នុងប្រទេសលីបង់៕

ដោយ៖ ឈាង