រដ្ឋ Florida ជម្លៀសមនុស្សទ្រង់ទ្រាយធំ ស្របពេលព្យុះសង្ឃរា Milton បង្កើនកម្លាំងកាន់តែសាហាវ

តាមការចុះផ្សាយរបស់ AP នៅថ្ងៃអង្គារទី៨ខែតុលាឆ្នាំ២០២៤, ព្យុះ Milton បានវិវត្តខ្លួនទៅជាព្យុះសង្ឃរាប្រភេទទី៥ ដ៏ខ្លាំងក្លា ហើយវាកំពុងបោះពួយទៅវាយប្រហាររដ្ឋ Florida បង្ខំឲ្យមានការជម្លៀសមនុស្សរាប់លាននាក់ជាបន្ទាន់ ជាពិសេសនៅទីក្រុង Tampa និង Orlando។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីប្រកាសរបស់មជ្ឈមណ្ឌលព្យុះជាតិអាមេរិក, Milton បាននាំមកជាមួយនូវកម្លាំងខ្យល់បក់រហូតដល់ទៅ២៥៧គីឡូម៉ែត្រក្នុងមួយម៉ោង ដែលមានគ្រោះថ្នាក់បំផុតដល់មនុស្ស។

ដោយសារតែមើលទៅស្ថានការណ៍ដូចជាមិនស្រួល, អភិបាលរដ្ឋ Florida លោក Ron DeSantis បានចេញបញ្ជាឲ្យជម្លៀសប្រជាជនរាប់លាននាក់ជាបន្ទាន់ ហើយនេះគឺជាការជម្លៀសមនុស្សទ្រង់ទ្រាយធំបំផុតក្នុងរយៈពេល៧ឆ្នាំ។

មិនត្រឹមប៉ុណ្ណឹង លោក DeSantis ក៏ប្រកាសអាសន្ននៅតំបន់ចំនួន៥១ក្នុងចំណោមតំបន់ទាំង៦៧របស់រដ្ឋនេះផងដែរ ខណៈមានក្តីបារម្ភថា ភ្លៀងនឹងធ្លាក់ក្នុងកម្រិត២៥សង់ទីម៉ែត្រ បង្កជាទឹកជំនន់រហ័ស។

លើសពីនេះ សាលារៀនជាច្រើនក្នុងតំបន់ Pinellas ត្រូវយកទៅធ្វើជាជម្រកបណ្តោះអាសន្នសិន ចំណែកឯអាកាសយានដ្ឋានក្នុងទីក្រុង Tampa, St. Petersburg និង Orlando ក៏ត្រូវបិទផងដែរ។

សូមបញ្ជាក់ថា ព្យុះ Milton នឹងវាយប្រហាររដ្ឋ Florida ជាង១០ថ្ងៃប៉ុណ្ណោះ បន្ទាប់ពីព្យុះកំណាច Helene បោកបក់ភាគអាគ្នេយ៍សហរដ្ឋអាមេរិក សម្លាប់មនុស្ស២២៧នាក់ និងរាប់រយនាក់បាត់ខ្លួន។

បើគិតតែ Florida, រដ្ឋនេះបានកត់ត្រាតួលេខមនុស្សស្លាប់ចំនួន១៤នាក់ដោយសារព្យុះកំណាច Helene ដែលជាព្យុះសម្លាប់មនុស្សច្រើនជាងគេបំផុតនៅដីគោកអាមេរិក ចាប់តាំងពីព្យុះ Katrina កាលពីឆ្នាំ២០០៥មក៕

អត្ថបទ៖ សុខ សុវណ្ណ

ចុចអាន៖ រដ្ឋ Florida ប្រកាសអាសន្ន ខណៈព្យុះសង្ឃរាថ្មីមួយទៀត នឹងវាយប្រហារ