UN បង្ហាញទំហំទឹកប្រាក់ ដែលក្រុមឧក្រិដ្ឋកម្មតាមអ៊ីនធើណិត ឆបោកបាន នៅ អាស៊ីអាគ្នេយ៍ ឆ្នាំមុន

សព្វថ្ងៃនេះអំពើឆបោកតាមអ៊ីនធើណិតកំពុងរីករាលដាលខ្លាំងមែនទែននៅអាស៊ីអាគ្នេយ៍ ​ដោយបើយោងតាមអង្គការសហប្រជាជាតិ (UN), ក្រុមឧក្រិដ្ឋកម្មតាមអ៊ីនធើណិត បោកបានប្រាក់ចំនួន៣៧ពាន់លានដុល្លារកាលពីឆ្នាំមុន ហើយត្បិតតែតំបន់នេះព្យាយាមពង្រឹងច្បាប់យ៉ាងណាក៏ដោយ ប៉ុន្តែពួកឧក្រិដ្ឋជននៅតែបង្កើនប្រតិបត្តិការទូទាំងអាស៊ីអាគ្នេយ៍ដដែល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការណ៍របស់ការិយាល័យអង្គការសហប្រជាជាតិផ្នែកគ្រឿងញៀននិងឧក្រិដ្ឋកម្ម បានឲ្យដឹងថា «ទិដ្ឋភាពគំរាមកំហែងនៃឧក្រិដ្ឋកម្មឆ្លងដែននៅតំបន់អាស៊ីអាគ្នេយ៍ កំពុងវិវត្តលឿនជាងពេលណាណាទាំងអស់ក្នុងប្រវត្តិសាស្ត្រ។ សកម្មភាពអ៊ីនធើណិតខុសច្បាប់ បានផ្ទុះឡើងខ្លាំងចាប់តាំងពីវិបត្តិជំងឺរាតត្បាតកូវីដ-១៩ ខណៈប្រទេសនៅតំបន់មេគង្គ បានក្លាយទៅជាចំណុចស្នូលសម្រាប់ក្រុមឧក្រិដ្ឋកម្ម ដើម្បីរៀបចំប្រតិបត្តិការនានាដូចជារៀបចំការណាត់ជួបគូស្នេហ៍ ក្លែងបន្លំគ្រីបតូ លាងលុយកខ្វក់ និងលេងល្បែងស៊ីសងខុសច្បាប់ជាដើម»។

របាយការណ៍ខាងលើបន្តថា ដោយសារតែមើលឃើញថា ឧស្សាហកម្មនេះទទួលបានផលចំណេញខ្ពស់ ឥឡូវពួកឧក្រិដ្ឋជន មានគំនិតបង្កើតវិធីសាស្រ្តថ្មីៗដូចជាការប្រើប្រាស់កម្មវិធីមេរោគ, ប្រើ AI ដើម្បីបំភាន់ភ្នែកនិងប្រើមុខមនុស្សក្លែងក្លាយ (Deepfake) ដើម្បីធ្វើប្រតិបត្តិការ ហើយបើកផ្សារក្រោមដីថ្មីៗ និងប្រើវិធីសាស្រ្តគ្រីបតូ ដើម្បីលាងលុយ។

លើសពីនេះ មនុស្សរាប់លាននាក់ ត្រូវឧក្រិដ្ឋជនជួញដូរទៅប្រទេសទាំងនោះ និងបង្ខំឲ្យធ្វើការនៅក្នុងក្រុមឆបោកដែលយកកាស៊ីណូ សណ្ឋាគារ និងតំបន់សេដ្ឋកិច្ចពិសេស ជាកន្លែងបើកប្រតិបត្តិការ៕

អត្ថបទ៖ សុខ សុវណ្ណ

ចុចអាន៖ ហ្វីលីពីន​ចាប់​ខ្លួន​មនុស្ស​ជាង​ ១៦០ នាក់​ ក្នុង​ករណី​បង្រ្កាប​ទីតាំងល្បែងអនឡាញ និងបោកប្រាស់​​តាម​អ៊ិនធឺណិត​​ខុសច្បាប់ ​