ព័ត៌មានអន្ដរជាតិ

ថៃ ចង់ធ្វើជាអ្នកសម្របសម្រួល ដោះស្រាយជម្លោះនៅមីយ៉ាន់ម៉ា

បានផុស

២ ខែ មុន

នៅ

ថ្ងៃអង្គារ ៨ តុលា ២០២៤

ដោយ

Chheang

ប្រទេសថៃ នឹងសហការជាមួយម៉ាឡេស៊ី ដើម្បីប្រើប្រាស់មធ្យោបាយការទូតដោះស្រាយជម្លោះនៅក្នុងប្រទេសមីយ៉ាន់ម៉ា ហើយលោកស្រី ផែថងថាន ស៊ីណាវ៉ាត្រា នាយករដ្ឋមន្ត្រីថៃ បានប្រកាសថានឹងឲ្យប្រទេសលោកស្រីក្លាយជាអ្នកសម្របសម្រួលនៅក្នុងការបើកកិច្ចចរចា។

លោកស្រី ផែថងថាន ស៊ីណាវ៉ាត្រា (រូបភាព៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី ផែថាថាន បាននិយាយកាលពីថ្ងៃចន្ទថា សមាជិកអាស៊ានទាំងអស់ត្រូវតែដើរតួនាទីសំខាន់ក្នុងការបញ្ចប់សង្គ្រាមស៊ីវិលនៅមីយ៉ាន់ម៉ា បន្ទាប់ពីប្រទេសមួយនេះបានធ្លាក់ចូលក្នុងភាពវឹកវរចាប់តាំងពីខែកុម្ភៈឆ្នាំ២០២១ នៅពេលយោធាបានផ្ដួលរំលំរដ្ឋាភិបាល ដែលបណ្ដាលឲ្យកើតមានបាតុកម្មរហូតឈានដល់ចលនាបះបោរប្រឆាំងនឹងរបបសឹកយោធាដែលកំពុងកាន់អំណាចបច្ចុប្បន្ន។

នាយករដ្ឋមន្ត្រីថៃ បានរៀបរាប់ថា៖ «អាស៊ានត្រូវតែដើរតួនាទីយ៉ាងសំខាន់ ក្នុងការនាំយកសន្តិភាពត្រឡប់ទៅមីយ៉ាន់ម៉ាវិញឲ្យបានឆាប់តាមដែលអាចធ្វើបាន»។

កន្លងមក សមាជិកទាំង១០នៃអាស៊ាន បានបង្កើតឡើងនូវកុងសង់ស៊ីស៥ចំណុច ជាគោលការណ៍គ្រឹះដោះស្រាយស្ថានការណ៍នៅមីយ៉ាន់ម៉ា កាលពីខែមេសាឆ្នាំ២០២១ តែការអនុវត្តនេះមានការវិវឌ្ឍតិចតួចណាស់ បើទោះបីជាមានការអំពាវនាវម្តងហើយម្តងទៀតឲ្យមានកិច្ចសន្ទនាគ្នាក៏ដោយ។

រហូតមកដល់ពេលនេះ របបយោធាបានបដិសេធមិនចូលរួមក្នុងកិច្ចចរចាជាមួយគូប្រជែងរបស់ខ្លួន ដោយហៅពួកគេថាជាភេរវករ ក្បត់ជាតិក្នុងការបំផ្លាញប្រទេស។

ជម្លោះដ៏ចម្រូងចម្រាសដែលធ្វើឲ្យ១ភាគ៣នៃប្រជាជនមីយ៉ាន់ម៉ាសរុបចំនួន៥៥លាននាក់ស្ថិតនៅក្នុងតម្រូវការជំនួយមនុស្សធម៌ នឹងក្លាយជារបៀបវារៈដ៏ក្ដៅគគុកនៃកិច្ចប្រជុំអាស៊ានក្នុងប្រទេសឡាវ នាសប្ដាហ៍នេះ៕

ដោយ៖ ឈាង