ព័ត៌មានអន្ដរជាតិ

ជាលើកដំបូង! របបសឹកមីយ៉ាន់ម៉ា បញ្ជូនអ្នកតំណាងចូលរួមកិច្ចប្រជុំអាស៊ាន

បានផុស

៥ ខែ មុន

នៅ

ថ្ងៃអង្គារ ៨ តុលា ២០២៤

ដោយ

Chheang

មីយ៉ាន់ម៉ា នឹងបញ្ជូនអ្នកតំណាងរបស់ខ្លួនទៅចូលរួមក្នុងកិច្ចប្រជុំកំពូលអាស៊ាននៅប្រទេសឡាវ ក្នុងសប្ដាហ៍នេះ ដែលវាគឺជាលើកដំបូងហើយក្នុងរយៈពេល៣ឆ្នាំ ក្រោយរបបសឹកយោធាផ្ដួលរំលំរដ្ឋាភិបាលកាលពីខែកុម្ភៈឆ្នាំ២០២១ ហើយបច្ចុប្បន្នកំពុងប្រឈមនឹងបញ្ហាសង្គ្រាមស៊ីវិលដែលមិនទាន់អាចដោះស្រាយចេញ។ នេះបើយោងតាមការចុះផ្សាយរបស់ទីភ្នាក់ងារព័ត៌មាន AFP នៅថ្ងៃទី៨ខែតុលា។

លោក Min Aung Hlaing មេដឹកនាំរបបសឹកនៅមីយ៉ាន់ម៉ា (រូបភាព៖ EPA)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បញ្ហាជម្លោះស៊ីវិលនៅមីយ៉ាន់ម៉ា នឹងក្លាយជារបៀបវារៈសំខាន់នៅក្នុងកិច្ចប្រជុំអាស៊ាន ដែលនឹងប្រព្រឹត្តទៅចាប់ពីថ្ងៃទី៩រហូតដល់ថ្ងៃទី១១ខែតុលា។ កន្លងមក អាស៊ានមានកិច្ចខិតខំប្រឹងប្រែងការទូតសម្រាប់ដំណោះស្រាយភាពវឹកវរនៅមីយ៉ាន់ម៉ា តែមិនទទួលបានផ្លែផ្កាអ្វីឡើយ។

អាស៊ាន បានហាមឃាត់មេដឹកនាំរបបសឹកមីយ៉ាន់ម៉ាមិនឲ្យចូលរួមក្នុងកិច្ចប្រជុំ ក្រោយរដ្ឋប្រហារឆ្នាំ២០២១ ហើយមេបញ្ជាការនៃរបបសឹកទៀតសោតក៏បានបដិសេធបញ្ជូនអ្នកតំណាងដែលមិនជាប់ពាក់ព័ន្ធនយោបាយរបស់ខ្លួនឲ្យចូលរួមផងដែរ។

យោងតាមប្រភពពីមន្ត្រីការទូតមីយ៉ាន់ម៉ា ដែលបានប្រាប់ទៅ AFP ប្រទេសសមាជិកអាស៊ានមួយនេះនឹងបញ្ជូនក្រុមមន្ត្រីការបរទេសជាន់ខ្ពស់ ធ្វើជាអ្នកតំណាងនៅក្នុងកិច្ចប្រជុំរយៈពេល៣ថ្ងៃនៅរដ្ឋធានីវៀងចន្ទន៍។

ក្រោយក្ដោបអំណាចបានប៉ុន្មានសប្ដាហ៍ របបសឹកបានយល់ព្រមលើកុងសង់ស៊ីស៥ចំណុច ជាគោលការណ៍គ្រឹះដោះស្រាយស្ថានការណ៍ និងស្ដារសុខសន្តិភាពឡើងវិញនៅមីយ៉ាន់ម៉ា។ យ៉ាងណាមិញ របបសឹកមិនបានយកកង់សង់ស៊ីសទាំងនោះទៅអនុវត្តឡើយ ដោយផ្ទុយទៅវិញបែរជាធ្វើការបង្ក្រាបបង្ហូរឈាមទៅលើចលនាប្រឆាំង។

ទោះជាបែបនេះក្ដី ការបញ្ជូនមន្ត្រីតំណាងទៅចូលរួមកិច្ចប្រជុំអាស៊ានលើកនេះ ទំនងជាបង្ហាញថា របបសឹកមីយ៉ាន់ម៉ាកំពុងចាប់ផ្ដើមទទួលយកនូវការអនុវត្តកុងសង់ស៊ីល៥ចំណុចសាជាថ្មីម្ដងទៀត៕

ដោយ៖ ឈាង

ចុចអាន៖ ថៃ ចង់ធ្វើជាអ្នកសម្របសម្រួល ដោះស្រាយជម្លោះនៅមីយ៉ាន់ម៉ា