ព័ត៌មានអន្ដរជាតិ

ជនជាតិអាមេរិកត្រូវកាត់ទោសជាប់ពន្ធនាគារជិត៧ឆ្នាំពីបទស៊ីឈ្នួលប្រយុទ្ធនៅអ៊ុយក្រែន

បានផុស

៤ ខែ មុន

នៅ

ថ្ងៃអង្គារ ៨ តុលា ២០២៤

ដោយ

តុលាការរុស្ស៊ីបានកាត់ទោសជនជាតិអាមេរិកអាយុ៧២ឆ្នាំម្នាក់ឱ្យជាប់គុកជិត៧ឆ្នាំលើការចោទប្រកាន់ថាបានប្រយុទ្ធក្នុងនាមជាទាហានស៊ីឈ្នួលនៅក្នុងប្រទេសអ៊ុយក្រែន។ នេះបើយោងតាមការចេញផ្សាយរបស់តីភ្នាក់ងារព័ត៌មាន AP នៅថ្ងៃទី៨ខែតុលានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋអាជ្ញារុស្ស៊ី បាននិយាយថា លោក Stephen Hubbard ដែលត្រូវបានកាត់ទោសបានចុះហត្ថលេខាលើកិច្ចសន្យាធ្វើជាទាហាស៊ីឈ្នួលជាមួយយោធាអ៊ុយក្រែន បន្ទាប់ពីរុស្ស៊ីបានបញ្ជូនកងទ័ពវាយលុកអ៊ុយក្រែនក្នុងខែកុម្ភៈឆ្នាំ២០២២ ហើយគាត់បានប្រយុទ្ធជាមួយអ៊ុយក្រែនរហូតដល់ត្រូវបានចាប់ខ្លួនពីរខែក្រោយមក។

គាត់ត្រូវបានកាត់ទោសឲ្យជាប់ពន្ធនាគាររយៈពេល៦ឆ្នាំ១០ខែក្នុងពន្ធនាគារសន្តិសុខទូទៅ។ ប៉ុន្តែ រដ្ឋអាជ្ញាបានអំពាវនាវឱ្យមានការកាត់ទោសឱ្យជាប់ពន្ធនាគាររយៈពេលប្រាំពីរឆ្នាំក្នុងពន្ធនាគារជាសន្តិសុខអតិបរមា។

លោក Hubbard មកពីរដ្ឋ Michigan គឺជាជនជាតិអាមេរិកដំបូងគេដែលត្រូវបានកាត់ទោសដោយចោទប្រកាន់ពីការប្រយុទ្ធក្នុងនាមជាទាហានស៊ីឈ្នួលក្នុងជម្លោះអ៊ុយក្រែន។ ពាក់ព័ន្ធបញ្ហានេះអ្នកនាំពាក្យក្រសួងការបរទេសអាមេរិក លោក Matthew Miller បាននិយាយថា ខ្លួនមានព័ត៌មានតិចតួចអំពីករណីនេះ ខណៈដែលរុស្ស៊ីបានបដិសេធមិនផ្តល់សិទ្ធិចូលកុងស៊ុល។

លោក Miller បានប្រាប់អ្នកយកព័ត៌មាននៅទីក្រុងវ៉ាស៊ីនតោនថា៖ «យើងមានការខកចិត្តដូចជាញឹកញាប់ដែរ នៅពេលដែលពួកគេបដិសេធមិនផ្តល់សិទ្ធិចូលទៅកុងស៊ុល ខណៈពួកគេមានកាតព្វកិច្ចផ្តល់វាទោះ យ៉ាងណាយើងកំពុងពិនិត្យមើលករណីនេះយ៉ាងដិតដល់ និងពិចារណាលើជំហានបន្ទាប់របស់យើង»។

បើយោងតាមសេចក្តីរាយការណ៍ព័ត៌មានរុស្ស៊ីបាននិយាយថា ការចោទប្រកាន់ប្រឆាំងនឹងលោក Hubbard អនុវត្តការកាត់ទោស ១៥ ឆ្នាំ ប៉ុន្តែព្រះរាជអាជ្ញាបានស្នើសុំឱ្យពិចារណាអាយុរបស់គាត់រួមជាមួយនឹងការសារភាពកំហុសរបស់គាត់ផងដែរ។ ការចាប់ខ្លួនជនជាតិអាមេរិកបានក្លាយជារឿងធម្មតាកាន់តែខ្លាំងឡើងទៅហើយ នៅក្នុងប្រទេសរុស្ស៊ីក្នុងរយៈពេលប៉ុន្មានឆ្នាំចុងក្រោយនេះ។

ការកើនឡើងនេះបានបង្កក្តីបារម្ភបានថា រុស្ស៊ីអាចកំណត់គោលដៅលើការចាប់ខ្លួនជន ជាតិអាមេរិកដើម្បីប្រើប្រាស់នៅពេលក្រោយក្នុងការចរចា ដើម្បីនាំយកជនជាតិរុស្សីដែលត្រូវបានកាត់ទោសពីបទ ឧក្រិដ្ឋកម្មនៅសហរដ្ឋអាមេរិក និងអឺរ៉ុបមកវិញ។

ជាមួយគ្នានេះកាលពីថ្ងៃច័ន្ទ តុលាការក្នុងទីក្រុង Voronezh បានកាត់ទោសជនជាតិអាមេរិក Robert Gilman ឱ្យជាប់គុកប្រាំពីរឆ្នាំ និងមួយខែ ពីបទរំលោភបំពានលើមន្ត្រីអនុវត្តច្បាប់ ខណៈពេលដែលក៏កំពុងកាត់ទោសរំលោភមួយផ្សេងទៀត។

យោងតាមរបាយការណ៍របស់សារព័ត៌មានរុស្ស៊ី Gilman ត្រូវបានចាប់ខ្លួនក្នុងឆ្នាំ ២០២២ ពីបទបង្កការរំខានពេលស្រវឹងនៅលើរថភ្លើងដឹកអ្នកដំណើរ ហើយគាត់កំពុងជាប់ទោស៣ឆ្នាំកន្លះលើបទចោទនោះ ប៉ុន្តែបើតាមទីភ្នាក់ងារសារព័ត៌មានរដ្ឋ RIA-Novosti បាននិយាយថាកាលពីឆ្នាំមុន គាត់បានវាយដំអ្នកគ្រប់គ្រងពន្ធនាគារក្នុងអំឡុងពេលត្រួតពិនិត្យ ដែលបណ្តាលឱ្យមានការកាត់ទោសថ្មី។

គួរបញ្ជាក់ថាសហរដ្ឋអាមេរិក និងរុស្ស៊ីកាលពីខែសីហាបានបញ្ចប់ការដោះដូរអ្នកទោសដ៏ធំបំផុតរបស់ពួកគេនៅក្នុងប្រវត្តិសាស្ត្រក្រោយសូវៀត ដែលជាកិច្ចព្រមព្រៀងមួយដែលមានមនុស្ស ២៤ នាក់ ក្នុងការចរចាជាច្រើនខែ និងសម្បទានពីបណ្តាប្រទេសអឺរ៉ុបផ្សេងទៀត ដែលបានដោះលែងជនជាតិរុស្ស៊ីនៅក្នុងមន្ទីរឃុំឃាំងរបស់ពួកគេជាផ្នែកមួយនៃការផ្លាស់ប្តូរ ទោះជាយ៉ាងណាមានពលរដ្ឋអាមេរិកជាច្រើននាក់នៅតែជាប់គុកក្នុងប្រទេសរុស្ស៊ីបន្ទាប់ពីការដោះដូរនេះ៕

អត្ថបទ៖ ប៊ុន សុភាព