ព័ត៌មានអន្ដរជាតិ

ប៉េងប៉ោងសំរាមរបស់កូរ៉េខាងជើងអាចគំរាមកំហែងដល់ភេរវកម្មជីវសាស្រ្ត

បានផុស

៣ ខែ មុន

នៅ

ថ្ងៃពុធ ៩ តុលា ២០២៤

ដោយ

យោធាកូរ៉េខាងត្បូង បាននិយាយថា ភាគីប្រទេសកូរ៉េខាងជើងបានបង្ហោះប៉េងប៉ោងសំរាមប្រហែល១០០ឆ្ពោះទៅកាន់កូរ៉េខាងត្បូងកាលពីព្រឹកថ្ងៃអង្គារ ដោយត្រូវគេកត់សម្គាល់កើតឡើងពីរថ្ងៃជាប់គ្នានៃការបង្កហេតុបែបនេះ ខណៈទីក្រុងសេអ៊ូលព្រមានថា ប៉េងប៉ោងសំរាមរបស់កូរ៉េខាងជើងអាចគំរាមកំហែងដល់ភេរវកម្មផ្នែកជីវៈសាស្រ្ត។ យោងការចេញផ្សាយរបស់សារព័ត៌មាន NK។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អគ្គសេនាធិការចម្រុះកូរ៉េខាងត្បូង បានរកឃើញកញ្ចប់សំរាមប្រហែល៦០ដែលបានធ្លាក់នៅជុំវិញផ្នែកខ្លះនៃទីក្រុងសេអ៊ូល និងជុំវិញខេត្ត Gyeonggi។ ប៉េងប៉ោងទាំងនោះមានផ្ទុកសំរាមក្នុងផ្ទះដូចជាក្រដាស ថង់ប្លាស្ទិក និងដបប្លាស្ទិក ខណៈមិនមានសារធាតុគ្រោះថ្នាក់ត្រូវបានគេរកឃើញនោះទេ។

ទោះយ៉ាងណាទីក្រុងសេអ៊ូល បានព្រមានថា ប៉េងប៉ោងសំរាមរបស់កូរ៉េខាងជើងអាចគំរាមកំហែងដល់ជីវភេរវកម្ម ដោយប្រមុខទីភ្នាក់ងារគ្រប់គ្រង និងបង្ការជំងឺកូរ៉េ (KDCA) បានព្រមានថា កូរ៉េខាងត្បូងគួរតែស្តុកទុកវ៉ាក់សាំងសម្រាប់ជំងឺដូចជាជំងឺអុតស្វាយ ដោយសារតែលទ្ធភាពដែលថា ប៉េងប៉ោងសំរាមកូរ៉េខាងជើងអាចគំរាមកំហែងដល់ជីវសាស្ត្រ។

ប្រធាន KDCA លោក Jee Young-mi បាននិយាយក្នុងអំឡុងពេលសវនកម្មក្រសួងសុខភាព និងសុខុមាលភាពរបស់រដ្ឋសភាកាលពីថ្ងៃចន្ទថា«យើងដឹងពីហានិភ័យនៃអំពើភេរវកម្មជីវសាស្រ្តដែលបង្កឡើងដោយប៉េងប៉ោងកខ្វក់ទាំងនេះ ហើយយើងជឿថា វាមានសារៈសំខាន់ណាស់ក្នុងការស្តុកទុកវ៉ាក់សាំងដើម្បីបង្ការ»។

ចាប់តាំងពីចុងខែឧសភាមក កូរ៉េខាងជើងបានបង្ហោះបញ្ជូនប៉េងប៉ោងជាង ៥០០០ ឆ្លងកាត់ព្រំដែនឆ្ពោះទៅកាន់កូរ៉េខាងត្បូង ខណៈការបង្ហោះចុងក្រោយនេះ កូរ៉េខាងជើង បានបញ្ជូនប៉េងប៉ោងផ្ទុកសំរាមចំនួន១២០កញ្ចប់។ យោធាកូរ៉េខាងត្បូងបានប្តេជ្ញាថា នឹងចាត់វិធានការយោធា «តឹងរ៉ឹង» ប្រសិនបើកូរ៉េខាងជើង «បំពាន» ជាមួយនឹងយុទ្ធនាការសំរាមដែលកំពុងបន្តរបស់ខ្លួន ឬធ្វើឱ្យខូចខាតយ៉ាងធ្ងន់ធ្ងរដល់ប្រជាជនកូរ៉េខាងត្បូង។ ទោះយ៉ាងណាកូរ៉េខាងត្បូង បានបដិសេធមិនបាញ់ទម្លាក់ប៉េងប៉ោងដោយផ្ទាល់ដោយលើកឡើងពីការព្រួយបារម្ភអំពីសុវត្ថិភាព។

ជាការឆ្លើយតបទៅនឹងការបង្ហោះប៉េងប៉ោងរបស់កូរ៉េខាងជើង យោធាកូរ៉េខាងត្បូងបាននិងកំពុងបំពោងការផ្សាយឃោសនាប្រឆាំងកូរ៉េខាងជើងជារៀងរាល់ថ្ងៃតាមរយៈឧបករណ៍បំពងសំឡេងនៅតាមព្រំដែនចាប់តាំងពីថ្ងៃទី ២១ខែកក្កដាផងដែរ៕