ស្ថានីយ​ជិត​១៥០០​កន្លែង​នៅ​រដ្ឋ Florida អស់​សាំង​ផ្គត់ផ្គង់ ព្រោះ​ព្យុះ​កំណាច Milton

ខណៈ​កំពុង​ត្រៀម​ខ្លួន​​​រង​ការ​វាយ​ប្រហារ​ពី​ឥទ្ធិពល​ព្យុះ​កំណាច Milton ដែល​ត្រូវ​​បាន​ចាត់​ទុក​ជា​ព្យុះ​សង្ឃរា​ដ៏​​កាច​សាហាវ​ ស្ថានីយប្រេងឥន្ធនៈ​​​នៅតំបន់ជាច្រើននៃរដ្ឋ Florida កំពុង​តែ​ដាច់​ស្ដុក​ប្រេង​សាំង ចំ​ពេល​តម្រូវ​ការ​​មាន​សន្ទុះ​កើន​ឡើង​ខ្លាំង​គួរ​ឲ្យ​កត់​សម្គាល់។

អ្នកស្រុកមួយចំនួន​ដែល​ស្ថិត​នៅ​ចំ​ផ្លូវ​ដែល​​ព្យុះ​ Milton ឆ្លង​កាត់ កំពុងព្យាយាមចាក់​បំពេញ​សាំង​យានយន្ត​របស់​ពួក​គេ នៅ​មុនពេល​​ត្រូវ​ជម្លៀស​ខ្លួន។ ពលរដ្ឋ​ផ្សេងទៀតដែលមានគម្រោង​ស្នាក់នៅ​​បន្ត ក៏​កំពុងព្យាយាមបំពេញធុងហ្គាស ដើម្បី​ទុក​ប្រើ​សម្រាប់​ម៉ាស៊ីនភ្លើងរបស់ពួកគេ ត្រៀម​ក្នុង​ករណី​ដាច់​ចរន្ត​អគ្គិសនី​។

​ទីភ្នាក់ងារ​​តាមដានតម្លៃហ្គាស GasBuddy បានរាយការណ៍ថា គិតត្រឹម​ល្ងាចថ្ងៃអង្គារ ១៩,៧%នៃស្ថានីយ​ប្រេងទូទាំងរដ្ឋ Florida គឺគ្មានប្រេងឥន្ធនៈ ដែលជាការកើនឡើងយ៉ាងខ្លាំង​ ខណៈ​កាល​ពី​ថ្ងៃ​ចន្ទ កង្វះ​ខាត​ប្រេង​ឥន្ធនៈ​មាន​ត្រឹម​តែ ៣% ប៉ុណ្ណោះ។ រដ្ឋ Florida មាន​ស្ថានីយ​ប្រេង​ឥន្ធនៈ​ប្រមាណ ៧ ៥០០​កន្លែង ដូច្នោះ​របាយការណ៍​របស់ GasBuddy មានន័យថា​ស្ថានីយ​ប្រហែល ១ ៤៧៧​កន្លែង​បច្ចុប្បន្នគ្មាន​​ស្តុក​ប្រេង​ឥន្ធនៈ​នោះ​​ទេ។

តាមការចុះផ្សាយរបស់ BBC នៅថ្ងៃពុធទី៩ខែតុលាឆ្នាំ២០២៤, សហរដ្ឋអាមេរិក កំពុងភិតភ័យអំពីឥទ្ធិពលព្យុះកំណាច Milton ដែលនឹងវាយប្រហាររដ្ឋ Florida ពេញទំហឹងនៅថ្ងៃព្រហស្បតិ៍នេះ ជាពិសេសផ្លូវរបស់ព្យុះនេះគឺចំទីក្រុង Tampa តែម្តង ខណៈអភិបាលក្រុង បញ្ជាក់ថា នេះគឺជាព្យុះសង្ឃរាកាចសាហាវបំផុតដែលទីក្រុង Tampa មិនធ្លាប់ជួបប្រទះសោះនៅក្នុងប្រវត្តិសាស្រ្តរយៈពេលជាង១០០ឆ្នាំ។

ក្រៅពីការជម្លៀសមនុស្សរាប់លាននាក់ ជើងហោះហើររាប់រយជើងទៅនិងមកពីរដ្ឋ Florida ក៏ត្រូវលុបចោលផងដែរ មុនពេលព្យុះកំណាច Milton មកដល់៕

ដោយ៖ ឈាង

ចុច​អាន៖ Milton ជាព្យុះសាហាវបំផុត ដែលវាយប្រហារទីក្រុង Tampa នៃរដ្ឋ Florida ក្នុងប្រវត្តិសាស្រ្តជាង ១០០ឆ្នាំ