អ៊ីស្រាអែល ព្រមានថា គ្រប់គ្នាភ្ញាក់ផ្អើលមិនខាន ពេលឃើញការសងសឹករបស់ខ្លួន លើអ៊ីរ៉ង់

ក្រោយពេល​ចុះទៅពិនិត្យអង្គភាពចារកម្ម៩៩០០ របស់​កងកម្លាំង​ការពារ​អ៊ីស្រាអែល កាល​ពី​ថ្ងៃពុធ​ទី៩ខែ​តុលាឆ្នាំ២០២៤​ រដ្ឋមន្ត្រីការពារជាតិ Yoav Gallant បានបង្ហោះសារព្រមានថា ការសងសឹករបស់ទីក្រុង Tel Aviv ទៅលើអ៊ីរ៉ង់ នឹងកាចសាហាវ ហើយធ្វើឲ្យគ្រប់គ្នាភ្ញាក់ផ្អើល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកនិយាយថា ការបាញ់មីស៊ីលរបស់អ៊ីរ៉ង់ លើអ៊ីស្រាអែល កាលពីថ្ងៃទី១ខែតុលា គឺជាការវាយប្រហារដ៏ខ្លាំងក្លាបំផុត ប៉ុន្តែត្រូវបរាជ័យ ដោយសារវាយមិនចំគោលដៅ។ អ៊ីរ៉ង់ នឹងមិននឹកស្មានដល់ឡើយពីអ្វីដែលនឹងកើតឡើង។ អ្នកដែលព្យាយាមធ្វើបាបរដ្ឋអ៊ីស្រាអែល នឹងទទួលខុសត្រូវ ពួកគេនឹងឃើញលទ្ធផល។

រម្លឹកទៅកាលពីថ្ងៃទី១ខែតុលា អ៊ីរ៉ង់បានបាញ់មីស៊ីលប្រហែល២០០គ្រាប់ ស្រោចលើអ៊ីស្រាអែល ដើម្បីសងសឹកចំពោះការធ្វើឃាតមេដឹកនាំក្រុមហាម៉ាស Ismail Haniyeh, មេដឹកនាំក្រុមហេសបូឡា Hassan Nasrallah និងមេបញ្ជាការកងឆ្មាំបដិវត្តន៍ឥស្លាមអ៊ីរ៉ង់ Abbas Nilforoushan។

នោះជាលើកទីពីរហើយ ដែលអ៊ីរ៉ង់វាយប្រហារដោយផ្ទាល់លើទឹកដីអ៊ីស្រាអែល ក្នុងរយៈពេលប្រាំមួយខែ បន្ទាប់ពីការបាញ់មីស៊ីលរាប់រយគ្រាប់និងដ្រូនរាប់រយគ្រឿងកាលពីខែមេសា។

ការព្រមាននេះកើតឡើងចំពេល ប្រធានាធិបតីអាមេរិក Joe Biden និងនាយករដ្ឋមន្ត្រីអ៊ីស្រាអែល Benjamin Netanyahu ពិភាក្សាគ្នាតាមទូរស័ព្ទអំពីបញ្ហានៅតំបន់មជ្ឈិមបូព៌ា។

លោក Biden ក៏ធ្លាប់ព្រមានអ៊ីស្រាអែលកុំឲ្យកំណត់គោលដៅកម្មវិធីនុយក្លេអ៊ែរ ឬអណ្តូងប្រេងរបស់អ៊ីរ៉ង់ដែរ ព្រោះវានឹងបង្កឲ្យមានការឆ្លើយតបទ្រង់ទ្រាយធំពីទីក្រុងតេហេរ៉ង់ និងធ្វើឲ្យតម្លៃប្រេងឆៅពិភពលោកហក់ឡើងខ្ពស់៕

អត្ថបទ៖ សុខ សុវណ្ណ

ចុចអាន៖ ​បៃដិន​និង​នេតាន់យ៉ាហ៊ូ​សន្ទនាគ្នា ប៉ុន្មានថ្ងៃ​ក្រោយ​សង្ស័យអ៊ីរ៉ង់​ធ្វើ​តេស្ត​នុយក្លេអ៊ែរ​ក្រោម​ដី​