ព័ត៌មានអន្ដរជាតិ

លោក ត្រាំ ប្រកាសថា គ្មានឡើយការជជែកដេញដោលថ្មីទៀតមុនថ្ងៃបោះឆ្នោត៥វិច្ឆិកា

បានផុស

៣ ខែ មុន

នៅ

ថ្ងៃព្រហស្បតិ៍ ១០ តុលា ២០២៤

ដោយ

Chheang

បេក្ខភាពមកពីគណបក្សសាធារណរដ្ឋ លោក ដូណាល់ ត្រាំ កាលពីថ្ងៃទី៩ខែតុលាបានបញ្ជាក់ថា លោកនឹងមិនព្រមធ្វើការជជែកដេញដោលម្ដងទៀតឡើយ នៅមុនការបោះឆ្នោតសកលថ្ងៃទី៥ខែវិច្ឆិកាខាងមុខ បើទោះជាធ្លាប់មានស្ថានីយទូរទស្សន៍ចំនួន២គឺ CNN និង Fox News ធ្លាប់ស្នើឲ្យលោកតតាំងសម្ដីជាមួយលោកស្រី កាម៉ាឡា ហារីស ដែលជាបេក្ខភាពមកពីគណបក្សប្រជាធិបតេយ្យ ជាលើកទី២ក៏ដោយ។

លោកស្រី កាម៉ាឡា ហារីស និងលោក ដូណាល់ ត្រាំ (រូបភាព៖ Getty)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Fox News បានអញ្ជើញលោក ត្រាំ និងលោកស្រី ហារីស ឲ្យជជែកដេញដោលសាជាថ្មី ដោយគ្រោងនឹងរៀបចំឡើងនៅថ្ងៃទី២៤ ឬថ្ងៃទី២៧ខែតុលា តែត្រូវលោក ត្រាំ បដិសេធ។ ចំណែកឯសំណើដែល CNN ចង់ឲ្យមានការជជែកដេញដោលរវាងបេក្ខភាពប្រធានាធិបតីទាំង២រូបនៅថ្ងៃ២៣ខែតុលា ក៏ត្រូវលោក ត្រាំ ច្រានចោលផងដែរ។

លោក ត្រាំ និងលោកស្រី ហារីស ធ្លាប់បានជជែកដេញដោលគ្នាម្ដងគត់ គឺនៅថ្ងៃទី១០ខែកញ្ញាកន្លងទៅ ហើយសម្លេងគាំទ្រតាមរយៈការស្ទង់មតិរវាងអ្នកទាំង២ក៏ប្រកៀកប្រកិតគ្នាណាស់ដែរ។

អតីតប្រធានាធិបតីទី៤៥របស់សហរដ្ឋអាមេរិក បានសរសេរសារបង្ហោះនៅលើបណ្ដាញសង្គម Truth Social ថា៖ «វានឹងមានការប្រកួតម្ដងទៀតទេ។ ដូច្នោះគ្មានអ្វីទៀតដែលត្រូវជជែកដេញដោលឡើយ» ដោយបន្ថែមថា វាយឺតពេលណាស់ទៅហើយ ក្នុងការរៀបចំដំណើរការឲ្យមានការជជែកដេញដោលនាពេលឥឡូវនេះ។

សូមបញ្ជាក់ថា មុនជជែកដេញដោលជាមួយលោកស្រី ហារីស លោក ត្រាំ ធ្លាប់ប្រកួតថ្វីមាត់ម្ដងរួចមកហើយជាមួយលោក ចូ បៃដិន កាលពីចុងខែមិថុនា។ លោក បៃដិន បានប្រកាសមិនឈរឈ្មោះជាបេក្ខភាពប្រធានាធិបតីតំណាងបក្សប្រជាធិបតេយ្យ ហើយប្រគល់តួនាទីនេះឲ្យទៅលោកស្រី ហារីស ដែលជាអនុប្រធានាធិបតីអាមេរិកនាពេលបច្ចុប្បន្ន ក្រោយលោកធ្វើមិនល្អទាល់តែសោះអំឡុងពេលជជែកដេញដោលជាមួយលោក ត្រាំ៕

ដោយ៖ ឈាង