កូរ៉េខាងត្បូង៖ រថយន្តជាង៦ម៉ឺន​​គ្រឿងត្រូវ​ប្រមូល​មកវិញដោយសារបញ្ហាគ្រឿងបន្លាស់

ក្រសួងដឹកជញ្ជូនកូរ៉េខាងត្បូង បានឲ្យដឹងថា ក្រុមហ៊ុន Hyundai Motor Co. និងក្រុមហ៊ុនផលិតរថយន្តពីរផ្សេងទៀត មានក្រុម​ហ៊ុន Kia Corp និង GM Korea នឹងស្ម័គ្រចិត្តប្រមូលរថយន្តជាង៦០០០០គ្រឿងមកវិញ ដោយសារមានបញ្ហាគ្រឿងបន្លាស់។ នេះបើយោងតាមការចេញផ្សាយរបស់ទីភ្នាក់ងារព័ត៌មាន Yonhab នៅថ្ងៃទី១០ខែតុលានេះ។

ក្រសួងដែនដី ហេដ្ឋារចនាសម្ព័ន្ធ និងដឹកជញ្ជូន បាននិយាយថា ក្រុមហ៊ុនទាំងបី កំពុងប្រមូលមកវិញនូវរថយន្តចំនួន ៦០៧៥០២ គ្រឿងនៃម៉ូដែល១០ផ្សេងគ្នា។ ចំពោះបញ្ហាដែលជំរុញឱ្យមានការប្រមូលមកវិញ រួមមានកំហុសក្នុងការរចនាឧបករណ៍គ្រប់គ្រងពោងសុវត្ថិភាពក្នុងរថយន្តចំនួន ៣១២៧៤៤ គ្រឿងរបស់រថយន្ត Hyundai ពីរម៉ូដែល រួមទាំងរថយន្ត Sonata sedan និង ២៨៥៣២៧ គ្រឿងនៃម៉ូដែល Kia ពីរ រួមទាំង Forte ផងដែរ។

ដូចគ្នានេះ ៨៥៩២គ្រឿងនៃម៉ូដែល EV9 របស់ក្រុមហ៊ុន Kia នឹងត្រូវប្រមូលមកវិញដោយសារតែកំហុសផ្នែក​សូវែរ​នៅក្នុងប្រព័ន្ធហ្វ្រាំងអេឡិចត្រូនិច។ ជាមួយគ្នានេះយានជំនិះសរុបចំនួន ៨៣៩គ្រឿងនៅទូទាំង៣ម៉ូដែល រួមទាំងរថយន្ត Escalade ដែលនាំចូល និងលក់ដោយក្រុមហ៊ុន GM Korea កំពុងស្ថិតក្រោមវិធានការកែតម្រូវផងដែរ ដោយសារបញ្ហាផ្នែកទន់នៅក្នុងប្រព័ន្ធហ្វ្រាំងអេឡិចត្រូនិច៕

គួរបញ្ជាក់ថា មិនត្រឹមតែក្រុមហ៊ុនទាំងបីនៅក្នុងប្រទេសកូរ៉េខាងត្បូងនោះទេ ក៏មានក្រុមហ៊ុននៅក្នុងប្រទេសផ្សេងៗជាច្រើនទៀតជាពិសេសនៅអាមេរិកជាញឹកញាប់បានប្រមូលរថយន្តត្រ​ឡប់មកវិញរាប់ពាន់ រាប់​ម៉ឺន​គ្រឿង ដោយសារតែបញ្ហា​គ្រឿងបន្លាស់ បញ្ហាប្រព័ន្ធហ្វ្រាង និងបញ្ហាពោងសុវត្តិភាពជាដើម៕

អត្ថបទ៖ ប៊ុន សុភាព