ព័ត៌មានអន្ដរជាតិ

ចំនួនអ្នកស្លាប់នៅលីបង់កើនឡើង ខណៈរដ្ឋអារ៉ាប់កំពុងប្រឹងប្រែងដើម្បីបទឈប់បាញ់

បានផុស

៦ ខែ មុន

នៅ

ថ្ងៃព្រហស្បតិ៍ ១០ តុលា ២០២៤

ដោយ

ចំនួនអ្នកស្លាប់ដោយសារការវាយប្រហារតាមអាកាសរបស់អ៊ីស្រាអែលនៅក្នុងប្រទេសលីបង់កាលពីថ្ងៃអង្គារបានកើនឡើងដល់២២ នាក់ ចំណែក៨០ នាក់ផ្សេងទៀតបានរងរបួស ខណៈចំនួនអ្នកស្លាប់សរុបចំនួន២១៤១នាក់។ នេះបើយោងតាមការចេញផ្សាយរបស់ទីភ្នាក់ងារព័ត៌មាន Xinhua នៅថ្ងៃទី១០ខែតុលានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងសុខាភិបាលលីបង់បានរាយការណ៍កាលពីថ្ងៃពុធថា ក្រសួងបានសម្គាល់ឃើញថាទាំងការស្លាប់និងរបួសបានកើតឡើងនៅក្នុងខេត្តផ្សេងៗនៅទូទាំងប្រទេស ដែលនាំឱ្យចំនួនអ្នកស្លាប់សរុបកើនដល់ ២១៤១នាក់ និងរបួសដល់ ១០០៩៩ នាក់ចាប់តាំងពីការចាប់ផ្តើមនៃជម្លោះអ៊ីស្រាអែល-ហេសបូឡា កាលពីថ្ងៃទី៨ខែតុលា ឆ្នាំ ២០២៣។

នាយករដ្ឋមន្ត្រីលីបង់ លោក Najib Mikati បាននិយាយថា កិច្ចខិតខំប្រឹងប្រែងរបស់អារ៉ាប់ និងអន្តរជាតិ ដើម្បីបញ្ឈប់ការឈ្លានពានរបស់អ៊ីស្រាអែល នៅក្នុងប្រទេសលីបង់កំពុងដំណើរការ។

លោក Mikati បាននិយាយថា៖«មិត្តភក្តិរបស់ប្រទេសលីបង់ មកពីប្រទេសអារ៉ាប់ និងបរទេសក៏កំពុងបន្តដាក់សម្ពាធសម្រាប់បទឈប់បាញ់ និងពិភាក្សាអំពីជំហាននយោបាយដែលត្រូវការ»។ ទោះជាយ៉ាងណាលោកបានចង្អុលបង្ហាញថា ការឈ្លានពានរបស់អ៊ីស្រាអែលកំពុងរារាំងដល់ការរីកចម្រើនរបស់ប្រទេសខ្លួន។

ចាប់តាំងពីថ្ងៃទី២៣ខែកញ្ញាមក យោធាអ៊ីស្រាអែលបាននិងកំពុងបាញ់ប្រហារតាមផ្លូវអាកាសយ៉ាងទូលំទូលាយនៅក្នុងប្រទេសលីបង់ ដែលត្រូវបានគេហៅថា «ព្រួញនៃភាគខាងជើង» នៅក្នុងការកើនឡើងដ៏គ្រោះថ្នាក់ជាមួយក្រុមហេសបូឡា។

តែគួររម្លឹកថា ចាប់តាំងពីខែតុលាឆ្នាំមុនមក កងកម្លាំង ហេសបូឡា និងកងកម្លាំងអ៊ីស្រាអែលបាននិងកំពុងមានការបាញ់ប្រហារគ្នានៅតាមព្រំដែនលីបង់-អ៊ីស្រាអែល ដែលបង្កឱ្យមានការភ័យខ្លាចនៃជម្លោះកាន់តែខ្លាំងឡើង ខណៈដែលសង្រ្គាមរវាងក្រុមហាម៉ាស និងអ៊ីស្រាអែលនៅតែបន្តកើតមាននៅក្នុងតំបន់ហ្គាហ្សានៅឡើយ៕