កិច្ចប្រជុំកម្រិតខ្ពស់រវាងអ៊ុយក្រែន និងលោកខាងលិច ត្រូវលុបចោលវិញ 

តាមការចុះផ្សាយរបស់ RT កាលពីថ្ងៃពុធទី៩ខែតុលាឆ្នាំ២០២៤, ជំនួបកំពូលនៃបណ្តាមេដឹកនាំប្រទេសជាអ្នកគាំទ្រអ៊ុយក្រែន ដែលគ្រោងប្រព្រឹត្តធ្វើឡើងនៅអាល្លឺម៉ង់ ត្រូវបានលុបចោលហើយ ក្រោមហេតុផលថា ប្រធានាធិបតីអាមេរិក Joe Biden អវត្តមាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដើមឡើយ កិច្ចប្រជុំ Ramstein នៅមូលដ្ឋានទ័ពអាកាសអាមេរិកក្នុងប្រទេសអាល្លឺម៉ង់ នឹងមានការចូលរួមពីសំណាក់លោក Biden, អធិការបតីអាល្លឺម៉ង់ Olaf Scholz និងប្រធានាធិបតីអ៊ុយក្រែន Vladimir Zelensky ប៉ុន្តែដោយសារឥឡូវមេដឹកនាំសេតវិមានសម្រេចមិនចូលរួម ទើបប្រមុខរដ្ឋាភិបាលទីក្រុងកៀវ អំពាវនាវឲ្យមានការរៀបចំកាលបរិច្ឆេទថ្មី។

ពាក់ព័ន្ធការមិនចូលរួមរបស់លោក Biden នេះដែរ, អ្នកនាំពាក្យសេតវិមានលោកស្រី Karine Jean-Pierre ប្រកាសកាលពីថ្ងៃពុធថា លោកប្រធានាធិបតី ត្រូវផ្អាកដំណើរទៅប្រទេសអាល្លឺម៉ង់សិន ដោយសារតែបញ្ហាកំពូលព្យុះសង្ឃរា Milton ហើយក្រោយមក លោក Biden ក៏ពន្យល់ដែរថា «ខណៈពេលនេះខ្ញុំមិនអាចចេញក្រៅប្រទេសបានឡើយ ប៉ុន្តែប្រហែលជាអាចចូលរួមនៅថ្ងៃខាងមុខ»។

តាមការគ្រោងទុក ពីដំបូង លោក Biden ត្រូវធ្វើដំណើរទស្សនកិច្ចទៅកាន់ប្រទេសអាល្លឺម៉ង់ នៅថ្ងៃទី១០ដល់១៣ខែតុលា ហើយនោះនឹងក្លាយជាដំណើរទស្សនកិច្ចផ្លូវរដ្ឋលើកដំបូងនៅអាល្លឺម៉ង់ដោយប្រធានាធិបតីអាមេរិកកំពុងកាន់តំណែងមួយរូប ក្នុងរយៈពេលជិត៤០ឆ្នាំ។

សូមបញ្ជាក់ថា ចាប់តាំងពីជម្លោះរុស្ស៊ី-អ៊ុយក្រែនផ្ទុះឡើងនៅខែកុម្ភៈឆ្នាំ២០២២មក ប្រទេសជាង៥០រួមទាំងរដ្ឋសមាជិកណាតូភាគច្រើនផងដែរ បានបង្កើតក្រុមទំនាក់ទំនងការពារជាតិអ៊ុយក្រែន ខណៈរដ្ឋមន្ត្រីការពារជាតិនៃបណ្តាប្រទេសទាំងនោះ តែងជួបប្រជុំគ្នានៅឯមូលដ្ឋានទ័ពអាកាស Ramstein ដើម្បីពិភាក្សាអំពីតម្រូវការអាវុធរបស់ទីក្រុងកៀវ និងរៀបចំការដឹកជញ្ជូនផ្សេងៗ៕

អត្ថបទ៖ សុខ សុវណ្ណ

ចុចអាន៖ អាមេរិក ជឿ​ថា អ៊ុយក្រែន​អាច​កាន់កាប់​តំបន់ Kursk បាន​រាប់​ខែ​ទៀត​ឯណោះ