អ៊ីស្រាអែល វាយប្រហារអាកាសលើលីបង់ បណ្តាលឲ្យមនុស្សស្លាប់និងរបួសជាង ១០០នាក់ទៀត

អ៊ីស្រាអែល មិនបន្ធូរដៃឡើយ ដោយនៅតែបន្តវាយប្រហារយ៉ាងសន្ធាប់លើទីក្រុងបេរូតនៃប្រទេសលីបង់ ដោយសម្លាប់មនុស្សចំនួន២២នាក់ទៀត កាលពីរាត្រីថ្ងៃព្រហស្បតិ៍ទី១០ខែតុលាឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍របស់ BBC, ការវាយប្រហារអាកាសរបស់អ៊ីស្រាអែល នៅកណ្តាលទីក្រុងនេះ ក៏បណ្តាលឲ្យមនុស្សចំនួន១១៧នាក់​ រងរបួសផងដែរ។

ជុំវិញការវាយប្រហារនេះ ត្រូវបានប្រព័ន្ធផ្សព្វផ្សាយជាច្រើនរាយការណ៍ថា គឺកំណត់គោលដៅលើបុគ្គលមួយរូបឈ្មោះ Wafiq Safa ដែលត្រូវជាប្អូនថ្លៃអតីតមេដឹកនាំក្រុមហេសបូឡាលោក Hassan Nasrallah ប៉ុន្តែចលនាសកម្មប្រយុទ្ធលីបង់ មិនទាន់បញ្ជាក់ពីរឿងនេះឡើយ។

ការវាយប្រហារនេះទៀតសោត កើតឡើងត្រឹមប៉ុន្មានម៉ោងប៉ុណ្ណោះ បន្ទាប់ពីកងរក្សាសន្តិភាពឥណ្ឌូណេស៊ីពីរនាក់ ត្រូវរបួសនៅភាគខាងត្បូងប្រទេសលីបង់ ពេលដែលរថក្រោះអ៊ីស្រាអែល បាញ់ទៅលើប៉មមួយ។

កងកម្លាំងបណ្តោះអាសន្នរបស់អង្គការសហប្រជាជាតិប្រចាំនៅលីបង់ (Unifil) បាននិយាយក្នុងសេចក្តីថ្លែងការណ៍មួយថា ប៉មសង្កេតការណ៍នៅឯមូលដ្ឋានរបស់ UN ក្នុងទីក្រុង Naqoura ត្រូវវាយប្រហារដោយផ្ទាល់ ដែលបណ្តាលឲ្យអ្នករក្សាសន្តិភាពធ្លាក់មកដី។

ទោះបីជាយ៉ាងណាក៏ដោយ កងរក្សាសន្តិភាពទាំងពីរមិនរងរបួសធ្ងន់ទេ ប៉ុន្តែកំពុងសម្រាកព្យាបាលនៅមន្ទីរពេទ្យ ខណៈ UN ចោទថា ការវាយប្រហារដោយចេតនាលើកងរក្សាសន្តិភាពរបស់ខ្លួន គឺជាការរំលោភយ៉ាងធ្ងន់ធ្ងរលើច្បាប់អន្តរជាតិ។

សូមបញ្ជាក់ថា Unifil គឺជាបេសកកម្មរក្សាសន្តិភាព ដែលត្រូវបានបង្កើតឡើងក្នុងឆ្នាំ ១៩៧៨ ដោយត្រួតពិនិត្យអរិភាពនិងជួយធានាឲ្យមានសិទ្ធិមនុស្សធម៌ បានទៅដល់ជនស៊ីវិលនៅភាគខាងត្បូងប្រទេសលីបង់៕

អត្ថបទ៖ សុខ សុវណ្ណ

ចុចអាន៖ ចំនួនអ្នកស្លាប់នៅលីបង់កើនឡើង ខណៈរដ្ឋ​អារ៉ាប់​​​កំពុង​​ប្រឹងប្រែង​​​ដើម្បី​​បទឈប់បាញ់​