អ៊ុយក្រែន ជំរុញឲ្យប្រទេសអាស៊ីមួយទៀត ចាប់ខ្លួនលោក ពូទីន តាមដីកា ICC

ផុតពីម៉ុងហ្គោលី ពេលនេះមានប្រទេសអាស៊ីមួយទៀតហើយ ដែលត្រូវអ៊ុយក្រែន ជំរុញឲ្យចាប់ខ្លួនប្រធានាធិបតីរុស្ស៊ី វ្ល៉ាឌីមៀរ ពូទីន តាមដីការបស់តុលាការឧក្រិដ្ឋកម្មអន្តរជាតិ (ICC)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ RT នៅថ្ងៃសុក្រទី១១ខែតុលាឆ្នាំ២០២៤, ក្រសួងការបរទេសអ៊ុយក្រែន បានព្រមានឲ្យប្រទេសតួកម៉េនីស្ថាន ត្រូវចាប់ខ្លួនលោក ពូទីន ត្បិតប្រទេសនេះមិនមែនជាហត្ថលេខីនៃលក្ខន្តិកៈទីក្រុងរ៉ូម ហើយមិនទទួលស្គាល់យុត្តាធិការរបស់ស្ថាប័នដែលមានមូលដ្ឋាននៅទីក្រុងឡាអេក៏ដោយ។

លើសពីនេះ ក្នុងសេចក្តីថ្លែងការណ៍កាលពីថ្ងៃព្រហស្បតិ៍ទី១០ខែតុលាឆ្នាំ២០២៤ ក្រសួងការបរទេសអ៊ុយក្រែន បានជំរុញដល់ប្រទេសទាំងអស់ដែលឲ្យតម្លៃលើជីវិតមនុស្ស ច្បាប់អន្តរជាតិ និងធម្មនុញ្ញអង្គការសហប្រជាជាតិ សូមកុំរៀបចំព្រឹត្តិការណ៍ទាំងឡាយណា ដែលមានការចូលរួមជាមួយលោកពូទីនឲ្យសោះ។

សូមបញ្ជាក់ថា លោក ពូទីន បានទៅដល់ទីក្រុង អាសហ្គាបាត នៅព្រឹកថ្ងៃសុក្រ ដើម្បីបំពេញទស្សនកិច្ចការងារ ដោយក្នុងអំឡុងពេលនោះ លោកនឹងចូលរួមវេទិកាអន្តរជាតិ «Interconnection of Times and Civilizations – Basis of Peace and Development» ដែលជាវេទិការម្លឹកដល់ខួប៣០០ឆ្នាំនៃកំណើតកវីតួកម៉េនីស្ថាន Makhtumkuli Fraghi។

រម្លឹកទៅខែមីនាឆ្នាំ២០២៣, ICC បានចេញដីកាចាប់ខ្លួនលោក ពូទីន ដោយចោទប្រកាន់ពីបទ និរទេសកុមារដោយខុសច្បាប់ចេញពីតំបន់កាន់កាប់ក្នុងប្រទេសអ៊ុយក្រែនទៅកាន់សហព័ន្ធរុស្ស៊ី។

យ៉ាងណា ទីក្រុងមូស្គូបានច្រានចោលការចោទប្រកាន់នេះថាជារឿងគួរឲ្យអស់សំណើចជាទីបំផុត ដោយអះអាងថា ការជម្លៀសជនស៊ីវិលចេញពីតំបន់សមរភូមិមិនមែនជាឧក្រិដ្ឋកម្មទេ។ លើសពីនេះ ទាំងរុស្ស៊ីនិងអ៊ុយក្រែន សុទ្ធតែមិនមែនជាភាគីនៃលក្ខន្តិកៈទីក្រុងរ៉ូម ដូច្នេះមានន័យថា ICC ខ្វះយុត្តាធិការក្នុងរឿងនេះ៕

អត្ថបទ៖ សុខ សុវណ្ណ

ចុចអាន៖ នេះជាមូលហេតុ ម៉ុងហ្គោលី មិនចាប់ខ្លួនលោក ពូទីន តាមដីកា ICC