ព័ត៌មានអន្ដរជាតិ

ប្រមុខដឹកនាំមហាអំណាចផាត់ចោលកិច្ចប្រជុំកំពូលអាស៊ីបូព៌ា (EAS) ក្នុងពេលពិភពលោកកំពុងជួបវិបត្តិ

បានផុស

៦ ខែ មុន

នៅ

ថ្ងៃសុក្រ ១១ តុលា ២០២៤

ដោយ

មេដឹកនាំសំខាន់ៗរបស់ពិភពលោក បានបោះបង់ការចូលរួមប្រជុំកំពូលអាស៊ីបូព៌ា (East Asia Summit) នៅថ្ងៃទី១១ ខែតុលានេះ ដែលជាថ្ងៃចុងក្រោយភ្ជាប់ជាមួយកិច្ចប្រជុំកំពូលអាស៊ានក្នុងទីក្រុងវៀងចន្ទន៍នៃសាធារណៈរដ្ឋប្រជាមានិតឡាវ។

ប្រធានាធិបតីសហរដ្ឋអាមេរិក លោក ចូ បៃដិន បានសម្រេចចិត្តបោះបង់ការចូលរួមកិច្ចប្រជុំកំពូលមួយនេះដែលជាប្រពៃណីប្រធានាធិបតីអាមេរិកតែងតែចូលរួម។ មិនតែប៉ុណ្ណោះសូម្បីវត្តមានអនុប្រធានាធិបតី លោកស្រី កាម៉ាឡា ហារីស ក៏មិនតំណាងឲ្យសហរដ្ឋអាមេរិកសម្រាប់ការចូលរួមនេះដែរ គឺមានត្រឹមតែថ្នាក់រដ្ឋមន្ត្រីការបរទេស លោក អាន់តូនី ប្ល៊ីនកែន ប៉ុណ្ណោះ។

នាយករដ្ឋមន្ត្រីចិន លី ឈាង និង ប្រមុខដឹកនាំប្រទេសអាស៊ានមួយចំនួន។ AP

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាមួយគ្នានោះ ប្រធានាធិបតី ចិន លោក ស៊ី ជីនភីង ដែលតែងតែចាត់ទុកកិច្ចប្រជុំកំពូងអាស៊ីបូព៌ានេះមានសារៈសំខាន់និងជាយន្តការដោះស្រាយបញ្ហាប្រឈមជាច្រើនរវាងប្លុកអាស៊ាន អាស៊ីបូព៌ា និងបញ្ហាពិភពលោកជាប់ពាក់ព័ន្ធផ្សេងៗទៀត ក៏មិនបានចូលរួមកិច្ចប្រជុំកំពូលនេះដែរ ដោយឲ្យនាយករដ្ឋមន្ត្រីចិន លោក លី ឈាង (Li Qiang) តំណាងប្រទេសចិន។

នៅក្នុងតំបន់អាស៊ានវិញ ប្រធានាធិបតីឥណ្ឌូណេស៊ី ចូកូ វីដូដូ ដែលតំណាងឲ្យប្រទេស មានសេដ្ឋកិច្ចធំបំផុត និងប្រជាជនច្រើនបំផុតនៅអាស៊ីអាគ្នេយ៍ ក៏អវត្តមានពីកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធនានា មានកិច្ចប្រជុំកំពូលអាស៊ីបូព៌ានេះជាដើម។

ប្រធានាធិបតីឥណ្ឌូណេស៊ី ចូកូ វីដូដូ ក៏នឹងត្រូវចុះចេញពីអំណាចនៅថ្ងៃទី២០ខែតុលានេះ ដោយជំនួសមកវិញនៅលោក Prabowo Subianto ដែលធ្លាប់ធ្វើដំណើរទស្សនកិច្ចទៅកាន់ប្រទេសអាស៊ានមួយចំនួនក្នុងពេលកន្លងមក។

ក្នុងកិច្ចប្រជុំកំពូលអាស៊ីបូព៌ានេះជាវេទិកានយោបាយនិងសេដ្ឋកិច្ចតំបន់ដ៏សំខាន់មួយដោយមានចំនួន១៨ប្រទេស ក្នុងនោះមានប្រទេសអាស៊ានទាំង១០ ប្រទេសអាស៊ីបូព៌ា ប្រទេសខ្លះក្នុងអាស៊ីខាងត្បូង និងជាពិសេសបំផុតគឺ សហរដ្ឋអាមេរិក និង រុស្ស៊ី។

ប្រធានាធិបតីហ្វីលីពីន ស្តាប់ការថ្លែងរបស់នាយករដ្ឋមន្ត្រីចិន។ AP

ទោះជាបែបណា នាយករដ្ឋមន្ត្រីថ្មីរបស់ប្រទេសជប៉ុន លោក Shigeru Ishiba និងនាយករដ្ឋមន្ត្រីអូស្ត្រាលី លោក Anthony Albanese និង ប្រធានាធិបតីកូរ៉េខាងត្បូង លោក Yoon Suk-Yoel បានចូលរួមក្នុងកិច្ចប្រជុំកំពូលនេះ។

ខណៈពេលដែលពិភពលោកកំពុងជួបវួបវិបត្តិសង្គ្រាមនៅអឺរ៉ុបខាងកើត មជ្ឈិមបូព៌ា និង ភាពតានតឹងដ៏ខ្លាំងនៅឧបទ្វីបកូរ៉េ សមុទ្រចិនខាងត្បូងរវាងហ្វីលីពីននិងចិន អវត្តមានការដោះស្រាយដោយមធ្យោបាយការទូតរវាងមេដឹកនាំសំខាន់ គឺជាសញ្ញាណនៃភាពមហន្តរាយសកលលោក៕