លោក Blinken ប្រាប់​អាស៊ាន​ថា អាមេរិក​ ​បារម្ភ​ពី​សកម្មភាព​គ្រោះថ្នាក់របស់​ចិន ​ក្នុង​សមុទ្រ​ជម្លោះ

ក្នុងកិច្ចប្រជុំអាស៊ាននាប្រទេសឡាវ នៅថ្ងៃសុក្រទី១១ខែតុលាឆ្នាំ២០២៤ រដ្ឋមន្ត្រីការបរទេសអាមេរិកលោក Antony Blinken បានប្រាប់មេដឹកនាំអាស៊ីអាគ្នេយ៍ថា ទីក្រុងវ៉ាស៊ីនតោន ព្រួយបារម្ភខ្លាំងណាស់អំពីសកម្មភាពកាន់តែគ្រោះថ្នាក់និងខុសច្បាប់របស់ចិន នៅក្នុងសមុទ្រចិនខាងត្បូងដែលមានជម្លោះ ហើយប្តេជ្ញាថា សហរដ្ឋអាមេរិក នឹងបន្តគាំទ្រសេរីភាពនៃការធ្វើនាវាចរណ៍នៅក្នុងផ្លូវពាណិជ្ជកម្មសមុទ្រដ៏សំខាន់មួយនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កិច្ចប្រជុំនេះកើតឡើងបន្ទាប់ពីមានការប្រឈមមុខដាក់គ្នាយ៉ាងហិង្សានៅដែនសមុទ្រ រវាងចិននិងសមាជិកអាស៊ានគឺហ្វីលីពីននិងវៀតណាម ខណៈប្រទេសខ្លះទៀតនៅអាស៊ីអាគ្នេយ៍ដូចជាម៉ាឡេស៊ីនិងព្រុយណេ ក៏ជាភាគីទាមទារសិទ្ធិនៅតំបន់ត្រួតស៊ីគ្នាដែរ។

លោក Blinken ដែលមកចូលរួមជំនួសមុខប្រធានាធិបតី Joe Biden បាននិយាយក្នុងសុន្ទរកថាបើក នៅឯកិច្ចប្រជុំកំពូលអាមេរិក-អាស៊ានថា «យើងព្រួយបារម្ភខ្លាំងណាស់អំពីសកម្មភាពដ៏គ្រោះថ្នាក់និងខុសច្បាប់របស់ចិននៅក្នុងសមុទ្រចិនខាងត្បូង ដែលធ្វើឲ្យមនុស្សរងរបួស បង្កគ្រោះថ្នាក់ដល់នាវាមកពីប្រទេសអាស៊ាន និងផ្ទុយពីការប្តេជ្ញាចិត្តចំពោះដំណោះស្រាយជម្លោះដោយសន្តិវិធី»។

លោកបន្តថា «សហរដ្ឋអាមេរិកនឹងបន្តគាំទ្រសេរីភាពនៃការធ្វើនាវាចរណ៍ និងសេរីភាពនៃការហោះហើរលើតំបន់ឥណ្ឌូប៉ាស៊ីហ្វិក។ សហរដ្ឋអាមេរិកមិនទាមទារអ្វីនៅក្នុងសមុទ្រចិនខាងត្បូងទេ ប៉ុន្តែគ្រាន់តែដាក់ពង្រាយនាវាកងទ័ពជើងទឹក និងយន្តហោះចម្បាំង ដើម្បីល្បាតដែនទឹក ប្រឆាំងការទាមទាររបស់ចិនប៉ុណ្ណោះ»។

ក្នុងឆ្នាំនេះ នាវាចិននិងហ្វីលីពីន តែងប៉ះទង្គិចគ្នាម្តងហើយម្តងទៀត ហើយវៀតណាមក៏និយាយកាលពីសប្តាហ៍មុនដែរថា កងកម្លាំងចិន បានធ្វើបាបអ្នកនេសាទរបស់ខ្លួននៅក្នុងសមុទ្រដែលមានជម្លោះ។ លើសពីនេះ ប្រទេសចិនក៏បានបញ្ជូននាវាល្បាតទៅកាន់តំបន់ដែលឥណ្ឌូណេស៊ីនិងម៉ាឡេស៊ីអះអាងថាជាតំបន់សេដ្ឋកិច្ចផ្តាច់មុខ។

យ៉ាងណាក៏ដោយ សហរដ្ឋអាមេរិកបានព្រមានម្តងហើយម្តងទៀតថា ខ្លួនមានកាតព្វកិច្ចការពារប្រទេសហ្វីលីពីន ដែលជាសម្ព័ន្ធមិត្តដ៏ចំណាស់របស់ខ្លួននៅអាស៊ី ប្រសិនបើកងកម្លាំង នាវា ឬយន្តហោះទីក្រុងម៉ានីល រងការវាយប្រហារ៕

អត្ថបទ៖ សុខ សុវណ្ណ

ចុចអាន៖ កម្ពុជាបើកកិច្ចប្រជុំអនុគណៈកម្មាធិការព័ត៌មានលើកទី២៥ នៃតំបន់អាស៊ាន