ពូទីន​បង្ហាញ​បំណង​បង្កើត​​សណ្តាប់​ធ្នាប់​ពិភពលោក​ថ្មី ក្រោយ​ជួប​មេដឹកនាំ​អ៊ីរ៉ង់​

រុស្ស៊ី​​​ដែល​ជា​​គូ​ប្រជែង​ឥទ្ធិពល​ធំ​​បំផុត​​​របស់សហរដ្ឋ​អាមេរិក និង​​កំពុង​ជាប់​ដៃ​ក្នុង​សង្គ្រាម​នៅ​អ៊ុយក្រែន បាន​បង្ហាញ​ការ​ប្រកៀក​ស្មាគ្នា​ជាមួយ​អ៊ីរ៉ង់​​​ ដែលជា​គូប្រជែង​​​​​​ដ៏​ធំ​របស់​សហរដ្ឋ​អាមេរិក​នៅ​តំបន់​មជ្ឈិមបូព៌ា ក្នុង​ការ​​រៀបចំ​សណ្តាប់​ធ្នាប់​ពិភពលោក​ថ្មី​ប្រឆាំ​ង​​​នឹង​​បស្ចឹម​ប្រទេស​ដឹកនាំ​ដោយសហរដ្ឋ​អាមេរិក​​។

​ក្នុ​ងជំនួប​​លើក​ដំបូង​របស់​ប្រធានាធិបតីរុស្ស៊ី លោក វ្ល៉ាឌីមៀ ពូទីន និងប្រធានាធិបតីអ៊ីរ៉ង់ លោក Masoud Pezeshkian នៅទីក្រុង Ashgabat ប្រទេស Turkmenistan ភាគី​​​រុស្ស៊ី​​​និង​អ៊ីរ៉ង់​ហាក់​បាន​បង្ហាញ​នូវ​ការ​ឈឺចាប់​​ ដោយសារ​តែ​​​​សង្គ្រាម​​​នៅ​តំបន់​ពួកគេរៀងៗខ្លួន ហើយ អាមេរិក​នៅ​ពី​ក្រោយ​សង្គ្រាម​ទាំងពីរ​នោះ។

លោក ពូទីន​ ដែលឈឺចាប់​ដោយ​សារ​តែ​​​ការ​ធ្វើ​ឲ្យ​មាន​ភាព​ឯកោ​បំផុត​​ក្នុង​វិស័យ​ការ​ទូត​​​ពេល​ដែលខ្លួន​លោក​ទ័ព​ឈ្លាន​ពាន​​អ៊ុយក្រែន​ដំបូង​​ ត្រូវបានដកស្រង់សម្តីដោយទីភ្នាក់ងារសារព័ត៌មានរដ្ឋរុស្ស៊ី TASS ដូច​និយាយថា៖«យើងកំពុងធ្វើការយ៉ាងសកម្មជាមួយគ្នានៅក្នុងឆាកអន្តរជាតិ ហើយ​ការវាយតម្លៃរបស់យើងអំពីព្រឹត្តិការណ៍ដែលកើតឡើងនៅក្នុងពិភពលោកគឺមានភាពជិតស្និទ្ធខ្លាំងណាស់»។

ចំណែក​ឯ​ប្រធានាធិបតី​អ៊ីរ៉ង់​វិញ​​ដែល​ហាក់​ឈឺចាប់​ខ្លាំង​ដោយសារ​តែ​អ៊ីស្រាអែល​​​​បាន​វាយប្រហារ​​​ក្រុមសកម្មប្រយុទ្ធ​​​​ហាម៉ាស​នៅ​ហ្គាហ្សា និង ​ហេសបូឡា​​នៅលីបង់ ដែលខ្លួន​គាំទ្របាន​​មើល​ឃើញ​​«​អ៊ីរ៉ង់​និង​រុស្ស៊ី​មាន​ជំហរ​រួម»​។

តាមការ​ស្រង់​សម្តី ប្រធានាធិបតី​អ៊ីរ៉ង់ លោក Masoud Pezeshkian បាននិយាយទៅកាន់ប្រធានាធិបតីរុស្ស៊ីថា​៖«គោលការណ៍របស់យើង និងតួនាទីរបស់យើងនៅក្នុងឆាកអន្តរជាតិគឺស្រដៀងនឹងអ្នក»​។

យោងតាមវីដេអូដែលចេញផ្សាយដោយវិមានក្រឹមឡាំង លោកពូទីនបាននិយាយនៅឯវេទិកាអន្តរជាតិ​​ក្នុង​ប្រទេសTurkmenistan ​ក្នុង​តំបន់​អាស៊ីកណ្តាល​ ថា លោកចង់បង្កើត «សណ្តាប់ធ្នាប់ពិភពលោកថ្មី» ដើម្បីប្រឆាំងនឹងលោកខាងលិច។

សារព័ត៌មាន Euro News បានរាយការណ៍ថា ក្នុងជំនួបនោះ ប្រធានាធិបតីអ៊ីរ៉ង់បានចាត់ទុកការឈ្លានពានរបស់អ៊ីស្រាអែលមកលើប្រទេសលីបង់ថា «ព្រៃផ្សៃ» និង «លើសពីការពិពណ៌នា»។

មេដឹកនាំទាំងពីរបានដោះស្រាយបញ្ហាមួយចំនួនក្នុងអំឡុងពេលកិច្ចប្រជុំដ៏សំខាន់ ដូច​ជា​កា​រវាយប្រហារ​​ដែលអ៊ីស្រាអែល​អាច​ធ្វើ​ឡើងចំពោះការវាយប្រហារដោយមីស៊ីលរបស់អ៊ីរ៉ង់លើ​អ៊ីស្រាអែល​កាលពីថ្ងៃទី១ខែតុលា ការឈ្លានពានដែលកំពុងបន្តរបស់អ៊ីស្រាអែលនៅតំបន់ហ្គាហ្សា និងលីបង់ និងទំនាក់ទំនងទ្វេភាគីរវាងប្រទេសទាំងពីរ។

លោកពូទីនត្រូវបានដកស្រង់សម្តីដោយទីភ្នាក់ងារសារព័ត៌មាន Anadolu ថា៖«ទំនាក់ទំនង​ជាមួយអ៊ីរ៉ង់គឺជាអាទិភាពសម្រាប់យើង ហើយ​ទំនាក់​ទំនង​នេះ​កំពុងរីកចម្រើនយ៉ាងជោគជ័យ»​។

ក្នុង​ពេល​សង្គ្រាម​នៅ​អ៊ុយក្រែន អ៊ីរ៉ង់​គឺ​ជា​ប្រទេសតែមួយគត់​ដែល​ហ៊ាន​​ចេញ​មុខ​ជាចំហ​​ផ្គត់ផ្គង់​យន្តហោះ​គ្មាន​មនុស្ស​បើក​​និងមីស៊ីលផ្លោងទៅ​ឱ្យ​រុស្ស៊ី​សម្រាប់​សមរភូមិនៅអ៊ុយក្រែន។ ក្រោយ​មក​ប្រទេស​កូរ៉េ​ខាងជើង​​ក៏បាន​​ធ្វើ​ដូច​អ៊ីរ៉ង់ដែរ​ក្នុង​ការ​ផ្គត់ផ្គង់​អាវុធ​ទៅ​ឲ្យ​រុស្ស៊ី៕