ចិន-វៀតណាម ចុះកិច្ចព្រមព្រៀងចំនួន១០ជាមួយគ្នា

នៅថ្ងៃអាទិត្យទី១៣ខែតុលាឆ្នាំ២០២៤ ប្រទេសវៀតណាមនិងចិន បានចុះហត្ថលេខាលើកិច្ចព្រមព្រៀងចំនួន១០ជាមួយគ្នា ក្នុងអំឡុងដំណើរទស្សនកិច្ចរយៈពេលបីថ្ងៃរបស់នាយករដ្ឋមន្ត្រីចិន លោក Li Qiang ទៅកាន់ទីក្រុងហាណូយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ VN Express, ពិធីចុះហត្ថលេខានេះ ធ្វើឡើងបន្ទាប់ពីជំនួបរបស់លោក Li ជាមួយនាយករដ្ឋមន្ត្រីវៀតណាម Pham Minh Chinh។

ក្នុងកិច្ចព្រមព្រៀងទាំងនោះត្រូវគេដឹងថា រាប់ចាប់ពីផ្លូវដែកឆ្លងដែន, ការអភិវឌ្ឍរបស់ចិននៅភាគខាងជើងប្រទេសវៀតណាម, បង្កើនកិច្ចសហប្រតិបត្តិការក្នុងការកសាងខ្សែសង្វាក់ផ្គត់ផ្គង់កសិកម្មប្រកបដោយចីរភាព, បង្កើតក្រុមការងារសិក្សាគំរូកសាងតំបន់សហប្រតិបត្តិការសេដ្ឋកិច្ចឆ្លងដែនវៀតណាម-ចិន និងដាក់ដំណើរការសេវាកម្មទូទាត់ឆ្លងដែនតាមរយៈ QR Code រវាងវៀតណាមនិងចិន ជាដើម។

សូមបញ្ជាក់ថា ចិនគឺជាប្រទេសដំបូងគេដែលបង្កើតទំនាក់ទំនងការទូតជាមួយវៀតណាមនៅថ្ងៃទី១៨ខែមករាឆ្នាំ១៩៥០ ហើយភាគីទាំងពីរ បានបង្កើតភាពជាដៃគូយុទ្ធសាស្ត្រគ្រប់ជ្រុងជ្រោយក្នុងឆ្នាំ២០០៨។

ចិន​ក៏ជា​ដៃគូ​ពាណិជ្ជកម្ម​ធំ​បំផុត​និង​ជា​ទីផ្សារ​នាំ​ចេញ​ធំ​ទី​ពីររបស់​វៀតណាមផងដែរ ដោយក្នុងឆ្នាំ២០២៣ ទំហំពាណិជ្ជកម្មសរុបរវាងប្រទេសទាំងពីរ បានឈានដល់ ១៧១.៩ ពាន់លានដុល្លារ ខណៈពាណិជ្ជកម្មក្នុងរយៈពេល៨ខែដំបូងនៃឆ្នាំនេះ បានឈានដល់ ១៣០.៧៨ពាន់លានដុល្លារ ពោលគឺកើនឡើង២៥%បើធៀបនឹងរយៈពេលដូចគ្នា កាលពីឆ្នាំមុននោះ៕

អត្ថបទ៖ សុខ សុវណ្ណ

ចុចអាន៖ ចូ បៃដិន ជួបប្រធានាធិបតីវៀតណាមនៅអាមេរិក ដើម្បីបញ្ចុះបញ្ចូលឲ្យប្រឆាំង ចិន