ព័ត៌មានអន្ដរជាតិ

យោធាស៊ូដង់ទម្លាក់គ្រាប់បែកលើទីផ្សារក្នុងរដ្ឋធានី Khartoum សម្លាប់មនុស្ស ២៣នាក់

បានផុស

១៥ វិនាទី មុន

នៅ

ថ្ងៃចន្ទ ១៤ តុលា ២០២៤

ដោយ

យោធាស៊ូដង់បានបើកការវាយប្រហារតាមផ្លូវអាកាសទៅលើផ្សារមួយក្នុងរដ្ឋធានី Khartoum សម្លាប់មនុស្សយ៉ាងហោចណាស់២៣នាក់។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី១៤ខែតុលានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការវាយប្រហាររតាមអាកាសដោយការទម្លាក់គ្រាប់បែកពីសំណាក់យោធាស៊ូដង់នេះ បានកើតឡើងលើផ្សារមួយកណ្ដាលទីក្រុង Khartoum។ ក្រៅពីមានមនុស្សស្លាប់២៣នាក់ ក៏នៅមានមនុស្សចំនួន៤០នាក់ផ្សេងទៀតបានរងរបួស ខ្លះស្ថិតនៅក្នុងស្ថានភាបធ្ងន់ធ្ងរ ខណៈផ្សារនេះគឺនៅជិតជំរុំសំខាន់មួយក្នុងរដ្ឋធានីស៊ូដង់ ជាកន្លែងដែលកងកម្លាំងគាំទ្រប្រតិបត្តិការរហ័សប៉ារ៉ា (RSF) បានប្រយុទ្ធជាមួយយោធា នៅក្នុងសង្គ្រាមស៊ីវិលដែលបានសម្លាប់មនុស្សរាប់ម៉ឺននាក់។

សាក្សី បាននិយាយថា យោធាបានវាយប្រហារពី Omdurman ឆ្ពោះទៅកាន់ Khartoum ដែលនៅក្បែរនោះ ខណៈការប្រយុទ្ធគ្នាយ៉ាងខ្លាំងក្លាបានផ្ទុះឡើងចាប់តាំងពីថ្ងៃសុក្រជុំវិញទីក្រុង Khartoum ដែលភាគច្រើនត្រូវបានគ្រប់គ្រងដោយ RSF ដែលធ្វើឲ្យដោយយោធាវាយលុកចូលកណ្តាល និងភាគខាងត្បូងនៃទីក្រុងនេះពីលើអាកាស។

សង្គ្រាមដែលកំពុងបន្តរវាងកងកម្លាំងប្រដាប់អាវុធស៊ូដង់ (SAF) និងកងកម្លាំងប្រដាប់អាវុធ RSF បានផ្ទុះឡើងចាប់តាំងពីខែមេសាឆ្នាំ២០២៣ បានសម្លាប់មនុស្ស ២០០០០ នាក់ និងជាង ១០លាននាក់ផ្លាស់ទីលំនៅ រួមទាំង ២,៤ លាននាក់បានភៀសខ្លួនទៅកាន់ប្រទេសផ្សេងទៀត។ នេះបើយោងតាមការប៉ាន់ស្មានរបស់អង្គការសហប្រជាជាតិ។

ទន្ទឹមនឹងនោះ RSF បានកាន់កាប់ស្ទើរតែទាំងអស់នៃតំបន់ភាគខាងលិចនៃទីក្រុង Darfur តាមរយៈការវាយលុកឆ្លងកាត់តំបន់កសិកម្មភាគកណ្តាលស៊ូដង់ ហើយបានរុញចូលទៅក្នុងភាគអាគ្នេយ៍ដែលគ្រប់គ្រងដោយកងទ័ព។ ជម្លោះនេះបានធ្វើឱ្យមនុស្សជាង ២៥ លាននាក់ប្រហែលពាក់កណ្តាលនៃប្រជាជនស៊ូដង់ ខ្វះខាតរអាហារ និងសេវាថែទាំសុខភាពយ៉ាងធ្ងន់ធ្ងរ។

ការវាយតម្លៃលើបញ្ហានៅក្នុងប្រទេសនេះដែលគាំទ្រដោយអង្គការសហប្រជាជាតិកាលពីខែសីហាបានប្រកាសថាមានគ្រោះទុរ្ភិក្សនៅក្នុងជំរុំជនភៀសខ្លួន Zamzam ក្នុងទីក្រុង Darfur ក្បែរទីក្រុង el-Fasher។ ស្របពេលជាមួយគ្នានេះសហគមន៍អន្តរជាតិបានកំពុងមានភាពច្របូកច្របល់ក្នុងកិច្ចខិតខំប្រឹងប្រែងដើម្បីបញ្ចប់ជម្លោះដ៏មហន្តរាយដែលត្រូវបានគ្របដណ្ដប់ដោយសង្គ្រាមនៅអ៊ុយក្រែន និងហ្គាហ្សាផងដែរ៕