ព័ត៌មានអន្ដរជាតិ

NYT: យោធាអ៊ីស្រាអែលបង្ខំជនជាតិប៉ាឡេស្ទីនឱ្យនាំផ្លូវក្នុងសង្គ្រាមដែលគ្រោះថ្នាក់ដល់ជីវិត

បានផុស

៦ ខែ មុន

នៅ

ថ្ងៃចន្ទ ១៤ តុលា ២០២៤

ដោយ

កងកម្លាំងទាហានអ៊ីស្រាអែលដែលកំពុងធ្វើសង្គ្រាមនៅតំបន់ហ្គាហ្សាអស់រយៈពេលជាង១ឆ្នាំ រងការចោទថា បានចាប់បង្ខំជនជាតិប៉ាឡេស្ទីនរស់នៅតំបន់ហ្គាហ្សា ដើម្បីបំពេញការងារទាំងឡាយណាដែលគំរាមកំហែងដល់អាយុជីវិតទាហានរបស់ពួកគេ។

ទាហានអ៊ីស្រាអែលបង្ហាញពីរបៀបចុះទៅផ្លូវរូងក្រោមដី។ AP

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងសេចក្តីរាយការណ៍ស៊ើបអង្កេតរបស់ កាសែត The New York Times របស់សហរដ្ឋអាមេរិក ជនជាតិប៉ាឡេស្ទីនដែលត្រូវបានចាប់ខ្លួនដោយយោធាអ៊ីស្រាអែល ត្រូវបានបង្ខំឱ្យរុករកបណ្តាញផ្លូវរូងក្រោមដីដែលសង្ស័យថាក្រុមសកម្មប្រយុទ្ធហាម៉ាសតែងតែលាក់ខ្លួន និងចូលទៅក្នុងអគារដែលបំពាក់ដោយមីន ដើម្បីស្វែងរកគ្រឿងផ្ទុះដែលត្រូវបានកប់ដោយក្រុមហាម៉ាស។

សារព័ត៌មាន The New York Times ដែលបានសរសេរអត្ថបទស៊ើបអង្កេតមួយ ក្រោមចំណងជើងថាទាហានអ៊ីស្រាអែលនៅតំបន់ហ្គាហ្សាបានប្រើជនជាតិប៉ាឡេស្ទីនដែលត្រូវបានចាប់ខ្លួនជាខែលការពារមនុស្ស។

តាមអត្ថបទស៊ើបអង្កេតរបស់សារព័ត៌មានដ៏ល្បីល្បាយនោះ បានរកឃើញថា៖«ទាហានអ៊ីស្រាអែល និងភ្នាក់ងារស៊ើបការណ៍សម្ងាត់ ពេញមួយសង្រ្គាមនៅហ្គាហ្សា បានបង្ខំប្រជាជនប៉ាឡេស្ទីនដែលត្រូវបានចាប់ខ្លួនជាប្រចាំនោះឱ្យធ្វើបេសកកម្មឈ្លបយកការណ៍ដែលគំរាមកំហែងដល់អាយុជីវិត ដើម្បីជៀសវាងការធ្វើឱ្យទាហានអ៊ីស្រាអែលប្រឈមនឹងហានិភ័យនៅសមរភូមិ»។

តាមសេចក្តីរាយការណ៍ ជនជាតិប៉ាឡេស្ទីនដែលត្រូវបានចាប់ខ្លួនត្រូវបានបង្ខំឱ្យរុករកបណ្តាញផ្លូវរូងក្រោមដី (Tunnel Networks) ដែលក្រុមសកម្មយុទ្ធជនអាចលាក់ខ្លួន និងចូលទៅក្នុងអគារដែលមានមីនដើម្បីស្វែងរកគ្រឿងផ្ទុះលាក់កំបាំង។

កាសែតនេះបានកត់សម្គាល់ថា ៖«ការអនុវត្តដែលខុសច្បាប់ទាំងក្រោមច្បាប់របស់អ៊ីស្រាអែល និងច្បាប់អន្តរជាតិ ត្រូវបានប្រើប្រាស់ដោយក្រុមយោធាយ៉ាងហោចណាស់ ១១នៅក្នុងទីក្រុងចំនួន៥ក្នុងតំបន់ហ្គាហ្សា ដែលជារឿយៗមានការចូលរួមពីមន្ត្រីមកពីទីភ្នាក់ងារស៊ើបការណ៍សម្ងាត់របស់អ៊ីស្រាអែល»។

កាសែត New York Times បន្ថែមថា យោធាអ៊ីស្រាអែលបាននិយាយថា របាយការណ៍បែបនេះនឹងត្រូវបាន ពិនិត្យដោយអាជ្ញាធរពាក់ព័ន្ធ។

ប្រទេសអ៊ីស្រាអែលបានសម្រេចធ្វើសង្គ្រាមជាមួយក្រុមហាម៉ាសនៅតំបន់ហ្គាហ្សា បន្ទាប់ពីក្រុមសកម្មប្រយុទ្ធហាម៉ាសនៅតំបន់ហ្គាហ្សាវាយឆ្មក់ចូលអ៊ីស្រាអែលតាមផ្លូវគោក ផ្លូវទឹក និងផ្លូវអាកាស ដោយសម្លាប់មនុស្សប្រមាណ១២០០នាក់ និងចាប់ចំណាប់ខ្មាំងប្រមាណ២៥០នាក់នៅថ្ងៃទី៧ខែតុលាឆ្នាំ២០២៣។

ចាប់តាំងពីពេលនោះមក យោធាអ៊ីស្រាអែលបានបើកការវាយលុកយ៉ាងខ្លាំងលើតំបន់ហ្គាហ្សា ដោយចាប់ផ្តើមពីការវាយប្រហារតាមផ្លូវអាកាសកម្ទេចហេដ្ឋារចនាសម្ព័ន្ធនៅតំបន់ហ្គាហ្សាយ៉ាងហិចហោចបំផុតរហូតដល់ពេលនេះ៕

ដោយ រ៉ាន់ រើយ