ព័ត៌មានអន្ដរជាតិ

ទំហំពាណិជ្ជកម្មវៀតណាម រំពឹងនឹងកើនដល់ ៨០០ ប៊ីលានដុល្លារ ឆ្នាំនេះ

បានផុស

៩ នាទី មុន

នៅ

ថ្ងៃអង្គារ ១៥ តុលា ២០២៤

ដោយ

សេដ្ឋវិទូវៀតណាម លោក Định Trung Thịnh បានអះអាងថា ទំហំពាណិជ្ជកម្មវៀតណាម រួមមានការនាំចូល-នាំចេញ នឹងហក់ឡើងដល់ ៨០០ ប៊ីលានដុល្លារ គិតត្រឹមចុងឆ្នាំ ២០២៤ ពោលគឺលើសពីកំណត់ត្រាច្រើនបំផុត ៧៣២ ប៊ីលានដុល្លារ ក្នុងឆ្នាំ ២០២២។ នេះបើតាមការចុះផ្សាយបន្តរបស់កាសែត Viet Nam News។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Thịnh បានបង្ហាញពីសុទិដ្ឋិនិយមចំពោះការណ៍នេះ ដោយសារតែកំណើនជាវិជ្ជមាននៃសកម្មភាពពាណិជ្ជកម្មរបស់វៀតណាមជាមួយប្រទេសដៃគូជាច្រើន ដូចជាជាមួយសហរដ្ឋអាមេរិក សហភាពអឺរ៉ុប ជប៉ុន និងកូរ៉េខាងត្បូង ជាដើម។

ជាមួយគ្នានេះ លោកបានប្រាប់សារព័ត៌មានក្នុងស្រុក baocongthuong.vn ថា សហគមន៍ធុរកិច្ចវៀតណាម បានប្តេជ្ញាចិត្តជំរុញកំណើនការនាំចេញក្នុងត្រីមាសចុងក្រោយនៃឆ្នាំ ២០២៤ ដោយទាញយកអត្ថប្រយោជន៍ពីកិច្ចព្រមព្រៀងពាណិជ្ជកម្មសេរីជំនាន់ថ្មី (FTAs)។

លោកបានបន្ថែមថា តម្រូវការទីផ្សារនាំចូលមានការកើនឡើង ដែលនោះនឹងជួយសម្រួលដល់ការនាំចេញរបស់វៀតណាមនៅត្រីមាសចុងក្រោយ ជាពិសេសលើវិស័យវាយនភណ្ឌ និងកាត់ដេរ ស្បែកជើង គ្រឿងអេឡិចត្រូនិក កសិកម្ម រុក្ខាប្រមាញ់ និងនេសាទជាដើម។

យោងតាមការិយាល័យស្ថិតិទូទៅវៀតណាម (GSO) ទំហំពាណិជ្ជកម្មរបស់ប្រទេសក្នុងរយៈពេល៩ខែដើមឆ្នាំ បានកើនឡើង ១៦ ភាគរយ ដល់ប្រមាណ ៥៧៨ ប៊ីលានដុល្លារ។

សហរដ្ឋអាមេរិក នៅតែជាទីផ្សារនាំចេញដ៏ធំបំផុតរបស់វៀតណាម ជាមួយនឹងទំហំទំហំពាណិជ្ជកម្ម ៩០ ប៊ីលានដុល្លារ ក្នុងនោះវៀតណាមទទួលបាននូវអតិរេកពាណិជ្ជកម្មចំនួន ៧៨,៥ ប៊ីលានដុល្លារ។ ចំណែកឯចិនវិញ បន្តជាប្រទេសផ្គត់ផ្គង់វៀតណាមធំបំផុត ជាមួយនឹងទំហំពាណិជ្ជកម្ម ១០៥ ប៊ីលានដុល្លារ ដែលធ្វើឱ្យវៀតណាមរងនូវឱនភាពពាណិជ្ជកម្មជាង ៦១ ប៊ីលានដុល្លារ។ នេះបើតាមទិន្នន័យដដែលរបស់ GSO។

យ៉ាងណាមិញ ជារួម វៀតណាមបានកត់ត្រាពីអតិរេកពាណិជ្ជកម្មចំនួន ២០,៧៩ ប៊ីលានដុល្លារ ក្នុងរយៈពេល ៩ ខែដដែល ដោយទាបជាង ២២,១ ប៊ីលានដុល្លារ ក្នុងរយៈពេលដូចគ្នាកាលពីឆ្នាំមុន៕