រាជធានីគូឡាឡាំពួ ក៏រងគ្រោះដោយទឹកជំនន់ដែរ

តាមការចុះផ្សាយរបស់ South China Morning Post នៅថ្ងៃអង្គារទី១៥ខែតុលាឆ្នាំ២០២៤, រាជធានីគូឡាឡាំពួ នៃប្រទេសម៉ាឡេស៊ីឯណោះ ក៏កើតមានទឹកជំនន់ដែរ បន្ទាប់ពីភ្លៀងធ្លាក់ខ្លាំង ហើយគ្រោះធម្មជាតិនេះ បានរំខានដល់ការធ្វើចរាចរណ៍ ព្រមទាំងបង្ខំឲ្យកិច្ចប្រជុំរដ្ឋសភា ត្រូវពន្យារពេលផងដែរ ដោយសារតំណាងរាស្រ្តពិបាកធ្វើដំណើរពេក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មិនមែនតែរាជធានីឡើយ សូម្បីតែភាគខាងជើងប្រទេសក៏កំពុងរងគ្រោះដោយជំនន់ផងដែរ ដោយនៅតំបន់ខ្លះកម្ពស់ទឹកបានឡើងដល់ដំបូងផ្ទះឯណោះ។

ទន្ទឹមនោះ ក្រសួងឧតុនិយមបានព្រមានអំពីភ្លៀងធ្លាក់ខ្លាំង និងគ្រោះទឹកជំនន់ធ្ងន់ធ្ងរជាបន្តទៀត ដែលនឹងវាយប្រហារទីក្រុងគូឡាឡាំពួ ដូច្នេះសូមប្រជាពលរដ្ឋត្រូវប្រុងប្រយ័ត្នឲ្យមែនទែន។

ក្រៅ​ពី​ផ្លូវ​ថ្នល់លិច​ទឹក, ភ្លៀង​ធ្លាក់​ខ្លាំង​ក៏​ប៉ះ​ពាល់​ដល់​បណ្តាញ​ផ្លូវ​រថភ្លើង​មេត្រូ​របស់​ទីក្រុង​គូឡាឡាំពួរ​ផង​ដែរ ខណៈក្រុមហ៊ុន RapidKL ត្រូវ​ផ្អាក​សេវា​ផ្លូវ​ដែក​នៅ​ភាគ​ខាង​កើត​ទីក្រុងសិន ដោយសារ​ផ្លូវលិចទឹក។ លើសពីនេះ សូម្បីសាលារៀនមួយចំនួនក៏ត្រូវជម្លៀសសិស្សចេញជាបន្ទាន់ដែរ បន្ទាប់ពីទឹកជំនន់ឡើងដល់ត្រឹមជង្គង់។

ទោះបីជាយ៉ាងណាក៏ដោយ រដ្ឋាភិបាលម៉ាឡេស៊ី ធានាថា ស្ថានភាពនេះកំពុងស្ថិតក្រោមការគ្រប់គ្រង ហើយអំពាវនាវដល់សាធារណជនទាំងអស់ សូមកុំព្រួយបារម្ភឲ្យសោះ។

សូមបញ្ជាក់ថា មួយរយៈចុងក្រោយ តំបន់អាស៊ីអាគ្នេយ៍បានជួបប្រទះរដូវមូសុងដ៏កាចសាហាវ និងត្រូវរងគ្រោះមិនធម្មតាទេ ជាពិសេសប្រទេសវៀតណាម មីយ៉ាន់ម៉ានិងថៃតែម្តង ដែលរងទុក្ខខ្លាំងដោយសារឥទ្ធិពលព្យុះទីហ្វុង យ៉ាកជី កាលពីខែមុន។

ពាក់ព័ន្ធគ្រោះធម្មជាតិនេះដែរ បើតាមការបញ្ជាក់ពីអ្នកជំនាញ, មូលហេតុធំ២ ដែលឆ្នាំ២០២៤មានព្យុះសាហាវៗជាងរាល់ឆ្នាំគឺដោយសារតែកត្តាបម្រែបម្រួលអាកាសធាតុ និងការផ្លាស់ប្តូរយ៉ាងឆាប់រហ័សពីបាតុភូត El Nino ទៅ La Nina បណ្តាលឲ្យសីតុណ្ហភាពមហាសមុទ្រនិងបរិយាកាសកើនឡើង។

លោក Truong Ba Kien នាយករងនៃមជ្ឈមណ្ឌលស្រាវជ្រាវឧតុនិយមនិងអាកាសធាតុ វៀតណាម បានពន្យល់ថា កាលណាសីតុណ្ហភាពកើនឡើងនោះទឹកសមុទ្រកាន់តែក្តៅ ហើយវានឹងជះបញ្ជូនចំហាយទឹកនិងថាមពលកាន់តែច្រើនចូលក្នុងប្រព័ន្ធអាកាសធាតុ ជាហេតុនាំឲ្យកម្លាំងព្យុះកាន់តែខ្លាំង។ ម្យ៉ាងវិញទៀត បើកាលណា សីតុណ្ហភាពជាសកល កើនឡើង១អង្សាសេនោះ កម្លាំងខ្យល់ព្យុះក៏នឹងកើនឡើង ៤០%ដែរ។

និយាយពី El Nino និង La Nina វិញ, កាលណាបាតុភូតនេះផ្លាស់ប្តូរលឿនពេកនៅតំបន់ប៉ាស៊ីហ្វិកកណ្តាល និងខាងកើត វានឹងធ្វើឲ្យមានអតុល្យភាពកម្តៅនិងសំណើមនៃមហាសមុទ្រ ដោយជួយបង្កើនថាមពលសម្រាប់ការកកើតព្យុះត្រូពិកដែលមានឥទ្ធិភពកាចសាហាវ៕

អត្ថបទ៖ សុខ សុវណ្ណ

ចុចអាន៖ កុមារ​មីយ៉ាន់​ម៉ា​អាយុ​១២ឆ្នាំ​ជួយ​សង្គ្រោះ​មនុស្ស​ជាង​១០០​នាក់​ក្នុងទឹកជំនន់​