ព័ត៌មានអន្ដរជាតិ

EU ដាក់ទណ្ឌកម្មអ៊ីរ៉ង់ ព្រោះលួចដឹកមីស៊ីលឲ្យរុស្ស៊ី

បានផុស

៤ ខែ មុន

នៅ

ថ្ងៃអង្គារ ១៥ តុលា ២០២៤

ដោយ

Chheang

ក្រុមហ៊ុន និងបុគ្គលមួយចំនួននៃប្រទេសអ៊ីរ៉ង់ បានរងការដាក់ទណ្ឌកម្មពីសហភាពអឺរ៉ុប (EU) កាលពីថ្ងៃទី១៤ខែតុលា ជុំវិញការចោទប្រកាន់ដែលថា ទីក្រុងតេហេរ៉ង់បានចូលដៃចូលជើងក្នុងការដឹកជញ្ជូនមីស៊ីលប៉ាលិស្ទិក និងដ្រូនទៅឲ្យរុស្ស៊ី ទុកធ្វើសង្គ្រាមលុកលុយអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីការបរទេសរបស់ EU បានអនុម័តការដាក់ទណ្ឌកម្មលើក្រុមហ៊ុនចំនួន៧ ដោយក្នុងនោះមានទាំងក្រុមហ៊ុនអាកាសចរណ៍ Iran Air និងបុគ្គលចំនួន ៧នាក់ ដូចជា អនុរដ្ឋមន្ត្រីការពារជាតិ លោក Seyed Hamzeh Ghalandari ព្រមទាំងមន្ត្រីជាន់ខ្ពស់ប៉ុន្មានរូបនៃកងកម្លាំង Quds នៃឆ្មាំបដិវត្តន៍អ៊ីរ៉ង់។

ក្រុមហ៊ុន និងបុគ្គលដែលរងទណ្ឌកម្ម នឹងត្រូវបានបង្កកទ្រព្យសកម្ម និងហាមមិនឲ្យធ្វើដំណើរទៅកាន់បណ្ដាប្រទេសនៃសហភាពអឺរ៉ុប។

ប្រធានគណៈកម្មការអឺរ៉ុប លោកស្រី Ursula von der Leyen បានសារទរការអនុម័តទណ្ឌកម្មដោយប្លុកទាំងមូល ហើយបានបង្ហោះសារនៅលើបណ្ដាញសង្គម X ថា៖ «ការគាំទ្ររបស់របបអ៊ីរ៉ង់ចំពោះសង្គ្រាមឈ្លានពានរបស់រុស្ស៊ីប្រឆាំងនឹងអ៊ុយក្រែន គឺមិនអាចទទួលយកបាន ហើយត្រូវតែបញ្ឈប់»។

អ៊ីរ៉ង់ច្រានចោលការចោទប្រកាន់របស់លោកខាងលិច ហើយថា ខ្លួនមិនបានបញ្ជូនមីស៊ីលឲ្យរុស្ស៊ីសម្រាប់ប្រើប្រាស់ក្នុងប្រទេសអ៊ុយក្រែននោះទេ។

យ៉ាងណា បើយោងតាមរដ្ឋមន្ត្រីការបរទេសអាមេរិក លោក Antony Blinken បុគ្គលិកយោធារុស្ស៊ីរាប់សិបនាក់បានទទួលការហ្វឹកហ្វឺននៅក្នុងប្រទេសអ៊ីរ៉ង់ លើការប្រើប្រាស់មីស៊ីល Fath-360 ដែលមានរយៈចម្ងាយ១២០គីឡូម៉ែត្រ៕

ដោយ៖ ឈាង