Donald Trump សន្យាផ្តល់តំណែងល្អមួយក្នុងជួររដ្ឋាភិបាលឲ្យ Elon Musk បើជាប់ឆ្នោត

ថ្លែងក្នុងកម្មវិធី Sunday Morning Futures របស់ទូរទស្សន៍ Fox News និងត្រូវបានយកមកចុះផ្សាយដោយសារព័ត៌មាន RT កាលពីថ្ងៃអង្គារទី១៥ខែតុលាឆ្នាំ២០២៤, អតីតប្រធានាធិបតិអាមេរិកលោក Donald Trump បានសន្យាផ្តល់មុខតំណែងដ៏ល្អមួយក្នុងជួររដ្ឋាភិបាលនិងបង្កើតការិយាល័យថ្មីជាពិសេសតែម្តង សម្រាប់មេក្រុមហ៊ុន SpaceX និង Tesla លោក Elon Musk បើខ្លួនជាប់ឆ្នោតខែវិច្ឆិកា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាមួយនឹងការសរសើរលោក Musk ថាជាអ្នកជំនួញដ៏អស្ចារ្យ, លោក Trump និយាយថា «មហាសេដ្ឋីរូបនេះ ជាអ្នកខ្លាំងខាងវិទ្យាសាស្រ្តនិងរ៉ុកកែត ហើយរាល់ពេល គាត់តែងប្រាប់ខ្ញុំ អំពីការអភិវឌ្ឍថ្មីៗ។ វាពិតជាគួរឲ្យរំភើបណាស់ ដូច្នេះយើងនឹងមានមុខតំណែងថ្មីមួយសម្រាប់គាត់»។

ស្របពេលជាមួយគ្នានោះ លោក Trump ក៏និយាយអំពីផែនការអវកាសដ៏មានមហិច្ឆតារបស់លោក Musk ផងដែរ ដោយគូសបញ្ជាក់ថា មេ SpaceX បានសន្យានាំគាត់ទៅភពព្រះអង្គារ មុនពេលចប់អាណត្តិ។

រម្លឹកទៅពេលកាន់តំណែងអាណត្តិដំបូង លោក ត្រាំ បានចេញបញ្ជាប្រតិបត្តិជាច្រើន ទាក់ទងនឹងលំហ។ ជាក់ស្តែង នៅឆ្នាំ២០១៧ គាត់បានប្រគល់ភារកិច្ចឲ្យអង្គការណាសា ដឹកនាំការបញ្ជូនមនុស្សទៅកាន់ឋានព្រះចន្ទ សម្រាប់ប្រតិបត្តិការរុករករយៈពេលវែង ក្រោយមកនឹងធ្វើបេសកកម្មនាំមនុស្សទៅកាន់ភពអង្គារ និងគោលដៅផ្សេងទៀតជាបន្តបន្ទាប់។

លុះមកដល់ឆ្នាំ២០១៩ លោក ត្រាំ បានបង្កើតកងកម្លាំងអវកាសអាមេរិក បន្ថែមទៅលើកងយោធារបស់ប្រទេសនេះ ធ្វើឲ្យក្រុមប្រឆាំងរិះគន់គាត់ថា មានបំណងធ្វើទំនើបកម្មយោធានៅក្នុងលំហអវកាស៕

អត្ថបទ៖ សុខ សុវណ្ណ

ចុចអាន៖ ដូណាល់ ត្រាំ ប្រកាសនាំអាមេរិក ទៅភពអង្គារ