ធ្ងន់ធ្ងរទៅៗ ២៤ម៉ោងចុងក្រោយ ប្រេស៊ីលមានអ្នកស្លាប់ដោយសារកូវីដលើស២ពាន់នាក់ជាលើកដំបូង

ក្រសួងសុខាភិបាលប្រេស៊ីលបាននិយាយកាលពីថ្ងៃពុធថា ប្រទេសនេះបានចុះបញ្ជីចំនួនអ្នកស្លាប់២,២៨៦នាក់ទៀត ដោយសារជំងឺកូវីដ១៩ ក្នុងរយៈពេល២៤ម៉ោងចុងក្រោយ ខណៈការកើនឡើងគួរឲ្យព្រួយបារម្ភនេះ បានជំរុញឲ្យតួលេខប្រចាំថ្ងៃកើនលើស២,០០០នាក់ជាលើកដំបូង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រទេសអាមេរិកខាងត្បូងមានប្រជាជន២១២លាននាក់មួយនេះ មានចំនួនអ្នកស្លាប់ដោយសារជំងឺរាតត្បាតកូវីដ១៩ខ្ពស់បំផុតលំដាប់ទី២នៅលើពិភពលោក ហើយកំពុងតស៊ូដើម្បីដោះស្រាយជាមួយករណីដ៏លើសលប់ ដែលកំពុងរុញច្រានមន្ទីរពេទ្យជាច្រើនឲ្យជិតទៅដល់ចំណុចដួលរលំ។

កំណត់ត្រាប្រចាំថ្ងៃថ្មីនេះ បានធ្វើឲ្យចំនួនមនុស្សដែលស្លាប់ដោយសារជំងឺកូវីដ១៩នៅក្នុងប្រទេសប្រេស៊ីល កើនដល់២៧០,៦៥៦នាក់ ជាប់ចំណាត់ថ្នាក់លេខ២បន្ទាប់ពីសហរដ្ឋអាមេរិក។

ប្រទេសនេះក៏បានចុះបញ្ជីចំនួនអ្នកឆ្លងវីរុសខ្ពស់បំផុត លំដាប់ទី៣ផងដែរកាលពីថ្ងៃពុធ ដោយមានករណីថ្មីជិត៨ម៉ឺនករណី។

អ្នកជំនាញផ្នែកសុខភាពនិយាយថា ការកើនឡើងនេះត្រូវបានជំរុញដោយវីរុសបំប្លែងខ្លួនប្រភេទថ្មីដោយរួមទាំងវីរុសមួយដែលគេស្គាល់ថា P1 ដែលត្រូវបានគេជឿថាលេចឡើងនៅក្នុងឬជុំវិញទីក្រុង Manaus នៃព្រៃអាម៉ាហ្សូនរបស់ប្រទេសប្រេស៊ីលផងដែរ៕

ប្រែសម្រួលដោយ៖ Vann Vann

ប្រភព៖ Deccanherald

ចុចអាន៖ ប្រេស៊ីល បំបែកកំណត់ត្រាថ្មី មួយថ្ងៃមានអ្នកស្លាប់ដោយសារកូវីដជិត២ពាន់នាក់ ឆ្លងជាង៧ម៉ឺនករណី

ចុចអាន៖ នៅតែធ្ងន់ធ្ងរ! ២៤ម៉ោងចុងក្រោយ ប្រេស៊ីល មានអ្នកស្លាប់១,៥៥៥នាក់ទៀតដោយសារកូវីដ