អូស្ត្រាលី ឲ្យ​រថក្រោះ​ចាស់ៗ​ចំនួន​៤៩​គ្រឿង​ដល់​អ៊ុយក្រែន ទុក​ប្រើ​ក្នុង​សង្គ្រាម

ប្រទេសអូស្ត្រាលី បាន​ប្រកាស​​ផ្តល់រថក្រោះ​ចាស់ៗ​​​​ចំនួន​ ៤៩​គ្រឿងដល់​អ៊ុយក្រែន ដែល​ការ​ផ្ដល់​ជូន​នេះ​​ធ្វើ​ឡើង​​ក្រោយ​ពី​ទីក្រុង​កៀវ​ធ្លាប់​បាន​អំពាវនាវ​អស់​​ជា​ច្រើនខែ​ស្នើ​សុំ​ជំនួយ​ជា​សព្វាវុធ​យោធា​​ដែល​លែង​ប្រើការ​​​ពី​សម្ព័ន្ធមិត្ត ទុក​សម្រាប់​សង្គ្រាមតទល់​ជាមួយ​រុស្ស៊ី។

រដ្ឋមន្ត្រីការពារជាតិ​អូស្ត្រាលី លោក Richard Marles បាននិយាយ​នៅ​ថ្ងៃ​ទី​១៧​ខែតុលា​ថា ភាគច្រើន​នៃ​រថក្រោះ​ទាំង​នោះ ជា​ប្រភេទ M1A1 Abrams ផលិតដោយអាមេរិក ដែលមានតម្លៃ​សរុប​ ១៦៣​លាន​ដុល្លារ។ លោក Marles បាន​ឲ្យ​ដឹង​ទៀត​ថា ក្រោយ​​​​បញ្ជូន​រថក្រោះ M1A1 ទៅ​ឲ្យ​អ៊ុយក្រែន អូស្ត្រាលី​នឹង​​ដាក់​ឲ្យ​ប្រើប្រាស់​រថក្រោះ​ជំនាន់​​ថ្មី M1A2 ចំនួន​ ៧៥​គ្រឿង​ជំនួស​វិញ​នៅ​ក្នុង​កង​កម្លាំង​របស់​ខ្លួន។

លោក Pat Conroy រដ្ឋមន្ត្រី​ដឹក​ជញ្ជូន​ និង​​ឧស្សាហកម្ម​ការពារ​ជាតិ​​អូស្ត្រាលី បានប្រាប់​ថា អូស្ត្រាលីមិនបានដាក់លក្ខខណ្ឌជាក់លាក់ណាមួយ​ចំពោះ​អ៊ុយក្រែន​ក្នុង​ការ​ប្រើប្រាស់រថក្រោះ​ទាំង​នោះ ឬ​ក៏​យក​ទៅ​ប្រើ​​ឆ្លងកាត់ព្រំដែនរុស្ស៊ី​នោះ​ទេ។

លោក Conroy បាន​បញ្ជាក់​​ថា៖ «គោលការណ៍ដ៏យូរអង្វែងរបស់យើងគឺដរាបណាពួកវាត្រូវបានប្រើប្រាស់ស្របតាមច្បាប់អន្តរជាតិ វាមិនមានលក្ខខណ្ឌផ្សេងទៀតទេ»។

បើ​បូក​ទាំង​​តម្លៃ​រថក្រោះ​លើក​នេះ ​ជំនួយ​យោធា​របស់​អូស្ត្រាលី​ដល់​អ៊ុយ​ក្រែ​ន ចាប់តាំងពី​ការឈ្លានពាន​របស់​រុស្ស៊ី​ក្នុង​ឆ្នាំ​២០២២ មាន​​​ជាង​ ៨៦៦​លាន​ដុល្លារ​ហើយ៕

ដោយ៖ ឈាង

ចុចអាន៖ អាមេរិក ប្រកាសកញ្ចប់ជំនួយយោធាថ្មី ៤២៥លានដុល្លារ ឲ្យអ៊ុយក្រែន