អ៊ីស្រាអែល ទម្លាយវីដេអូនៃដង្ហើមចុងក្រោយរបស់មេក្រុមហាម៉ាស 

កាលពីថ្ងៃព្រហស្បតិ៍ទី១៧ខែតុលាឆ្នាំ២០២៤ ប្រទេសអ៊ីស្រាអែល បានបញ្ជាក់ពីការស្លាប់របស់មេក្រុមហាម៉ាសលោក Yahya Sinwar នៅភាគខាងត្បូងតំបន់ហ្គាហ្សា ហើយកងកម្លាំង IDF ថែមទាំងទម្លាយវីដេអូដែលបង្ហាញពីលោក Sinwar ស្ថិតនៅដង្ហើមចុងក្រោយផងដែរ។

តាមការចុះផ្សាយរបស់ RT, ក្នុងវីដេអូរយៈពេល៤៨វិនាទីដែលថតដោយដ្រូន និងបង្ហោះលើបណ្តាញសង្គមដោយអ្នកនាំពាក្យអន្តរជាតិរបស់ IDF គេឃើញលោក Sinwar ទំនងជាត្រូវរបួសធ្ងន់ អង្គុយលើកៅអីក្នុងផ្ទះបាក់បែកបន្ទាប់ពីរងការទម្លាក់គ្រាប់បែក។

ស្របពេលជាមួយគ្នានោះ តាមកាសែត Jerusalem Post បានចុះផ្សាយថា អង្គភាពនៃកងពល Bislach 828 បានសម្លាប់លោក Sinwar កាលពីថ្ងៃពុធ នៅក្នុងប្រតិបត្តិការទាំងគ្មានការគ្រោងទុកនៅសង្កាត់ Tel Sultan នៃទីក្រុង Rafah ភាគខាងត្បូងតំបន់ហ្គាហ្សា។

សូមបញ្ជាក់ថា បុរសអាយុ៦២ឆ្នាំរូបនេះ គឺជាមេដឹកនាំនយោបាយរបស់ក្រុមហាម៉ាស នៅហ្គាហ្សាចាប់តាំងពីដើមឆ្នាំ២០១៧មក។ គាត់បានឡើងកាន់តំណែងជាមេដឹកនាំពេញសិទ្ធិនៃក្រុមហាម៉ាសក្នុងខែសីហាបន្ទាប់ពីលោក Ismail Haniyeh ត្រូវគេធ្វើឃាតនៅទីក្រុង តេហេរ៉ង់ នៃប្រទេសអ៊ីរ៉ង់។

អ៊ីស្រាអែល បានប្រកាសសង្រ្គាមលើក្រុមហាម៉ាស បន្ទាប់ពីចលនាប៉ាឡេស្ទីនមួយនេះ សម្លាប់មនុស្សប្រមាណ១ ១០០នាក់ និងចាប់ប្រហែល២៥០នាក់ទៀត ជាចំណាប់ខ្មាំង នៅក្នុងការលុកលុយថ្ងៃទី៧ខែតុលា។

ជាការសងសឹក អ៊ីស្រាអែល ក៏បើកការវាយប្រហារតាមអាកាស ក៏ដូចជាប្រតិបត្តិការជើងគោក ដោយបង្កការបំផ្លិចបំផ្លាញយ៉ាងធំធេងនៅក្នុងតំបន់ហ្គាហ្សា ខណៈបើយោងតាមអាជ្ញាធរសុខាភិបាលក្នុងតំបន់បានឲ្យដឹងថា ប្រជាជនប៉ាឡេស្ទីនប្រហែល ៤២ ០០០នាក់ ត្រូវបានសម្លាប់៕

អត្ថបទ៖ សុខ សុវណ្ណ

ចុចអាន៖ អ៊ីស្រាអែល សម្លាប់​មេបញ្ជាការ​ម្នាក់​ទៀត​ហើយ​របស់​ក្រុម​ហាម៉ាស