ស្ថានការណ៍កាន់តែតានតឹង! អ្នកគាំទ្រលោក Trump ឡោមព័ទ្ធការិយាល័យរាប់សន្លឹកឆ្នោតក្នុងរដ្ឋ Arizona

ការិយាល័យរាប់សន្លឹកឆ្នោតក្នុងតំបន់ Maricopa នៃរដ្ឋ Arizona កំពុងប្រឈមនឹងបញ្ហាថាតើខ្លួនគួរតែផ្អាកការងារនិងបិទដែរឬអត់បន្ទាប់ពីអ្នកគាំទ្រគណបក្សសាធារណរដ្ឋប្រមូលផ្ដុំគ្នានៅខាងក្រៅដើម្បីឆ្លើយតបទៅនឹងការអះអាងលើបណ្តាញសង្គមថា សន្លឹកឆ្នោតដែលបោះឲ្យលោក Trump ទំនងជាមិនត្រូវបានរាប់ទេ។

អ្នកតវ៉ាខ្លះថែមទាំងបានសម្រុកចូលទៅក្នុងការិយាល័យផងដែរប៉ុន្តែត្រូវបាននាំចេញវិញ។ ក្រុមមន្រ្តីត្រូវបង្ខំចិត្តទូរស័ព្ទទៅការិយាល័យមេបញ្ជាការប៉ូលិសប៉ុន្តែអ្នករាប់សន្លឹកឆ្នោតមិនបានបញ្ឈប់ការងាររបស់ពួកគេទេ។

វាលឿនពេកក្នុងការប៉ាន់ស្មានលទ្ធផលនៅរដ្ឋ Arizona។ គិតត្រឹមម៉ោង២៣:០០យប់ (ម៉ោងនៅសហរដ្ឋអាមេរិក), ៨២ភាគរយនៃសន្លឹកឆ្នោតនៅក្នុងតំបន់ Maricopa ត្រូវបានគេរាប់រួចរាល់ដោយលោក Joe Biden កំពុងនាំមុខ។

តំបន់នេះត្រូវបានគេចាត់ទុកថាជាសមរភូមិប្រយុទ្ធនៅក្នុងរដ្ឋដែលគណបក្សសាធារណរដ្ឋតែងតែទទួលបានជ័យជម្នះ៕

ប្រែសម្រួលដោយ៖ Vann Vann

ប្រភព៖ BBC