ព័ត៌មានអន្ដរជាតិ

លោក Zelensky៖ កូរ៉េខាងជើង បញ្ជូនទ័ព១ម៉ឺននាក់ទៅដល់ទឹកដីអ៊ុយក្រែនដែលរុស្ស៊ីកាន់កាប់

បានផុស

៤ ខែ មុន

នៅ

ថ្ងៃសុក្រ ១៨ តុលា ២០២៤

ដោយ

Chheang

ប្រធានាធិបតីអ៊ុយក្រែន លោក Volodymyr Zelensky បាននិយាយកាលពីថ្ងៃព្រហស្បតិ៍ថា រុស្ស៊ីកំពុងរៀបចំដាក់ពង្រាយទាហានកូរ៉េខាងជើង ១ម៉ឺននាក់នៅក្នុងការប្រយុទ្ធប្រឆាំងនឹងក្រុងកៀវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Zelensky ធ្លាប់បានចោទប្រកាន់កូរ៉េខាងជើងថាបានបញ្ជូនទាហានទៅឲ្យកងទ័ពរុស្ស៊ី ប៉ុន្តែនេះជាលើកដំបូងដែលលោកបានផ្តល់ជាតួលេខពិតប្រាកដ។

ដោយទទួលបានព័ត៌មានពីក្រុមអ្នកស៊ើបការណ៍សម្ងាត់ លោក Zelensky បានប្រាប់ថា ទាហានកូរ៉េខាងជើងមួយចំនួនបានទៅដល់ទឹកដីអ៊ុយក្រែនដែលត្រូវបានកាន់កាប់ដោយរុស្ស៊ី។

លោកបានបន្ថែមថា៖ «យើងដឹងអំពីទាហានកូរ៉េខាងជើងប្រហែល ១ម៉ឺននាក់ថា ពួកគេកំពុងរៀបចំទៅប្រយុទ្ធប្រឆាំងនឹងយើង»។ មេដឹកនាំអ៊ុយក្រែន បានបន្តថា កងទ័ពកូរ៉េខាងជើងរួមមាន «កងកម្លាំងជើងគោក» និង «បុគ្គលិកយុទ្ធសាស្ត្រផ្សេងទៀត»។ លោកបានព្រមានថា៖ «នេះគឺជាជំហានដំបូងឈានទៅដល់សង្គ្រាមលោក» ដោយកត់សម្គាល់ថា អ៊ីរ៉ង់ក៏កំពុងគាំទ្ររុស្ស៊ីជាមួយ «ដ្រូន និងមីស៊ីល» ផងដែរ។

សូមបញ្ជាក់ថា អ្នកជំនាញ បាននិយាយជាយូរមកហើយថា មីស៊ីលកូរ៉េខាងជើងកំពុងត្រូវបានដាក់ពង្រាយនៅក្នុងប្រទេសអ៊ុយក្រែនដោយកងកម្លាំងរុស្ស៊ី ដែលទាំងទីក្រុងម៉ូស្គូ និងក្រុងព្យុងយ៉ាងបានបដិសេធនឹងការចោទប្រកាន់នេះ។

លោកពូទីនបានធ្វើទស្សនកិច្ចដ៏កម្រមួយទៅកាន់ទីក្រុងព្យុងយ៉ាងកាលពីខែមិថុនា ហើយបានចុះហត្ថលេខាលើកិច្ចព្រមព្រៀងការពារគ្នាទៅវិញទៅមកជាមួយមេដឹកនាំកូរ៉េខាងជើង លោក គីម ជុងអ៊ុន។

ក្រុងមូស្គូ និងក្រុងព្យុងយ៉ាង គឺជាសម្ព័ន្ធមិត្តចាប់តាំងពីការបង្កើតប្រទេសកូរ៉េខាងជើង បន្ទាប់ពីសង្គ្រាមលោកលើកទី២ ហើយទំនាក់ទំនងនេះកាន់តែជិតស្និទ្ធខ្លាំងចាប់តាំងពីការឈ្លានពានរបស់រុស្ស៊ីនៅឆ្នាំ២០២២ទៅលើអ៊ុយក្រែន៕

ដោយ៖ ឈាង