តុលាការបង់ក្លាដែសចេញដីកាចាប់ខ្លួនអតីតនាយករដ្ឋមន្ត្រី Sheikh Hasina ជុំវិញការស្លាប់របស់បាតុករ

តុលាការពិសេសមួយក្នុងប្រទេសបង់ក្លាដែសបានចេញដីកាចាប់ខ្លួនអតីតនាយករដ្ឋមន្ត្រីបង់ក្លាដែស​ លោកស្រី Sheikh Hasina និង មនុស្ស៤៥នាក់ផ្សេងទៀត រួមទាំងជំនួយការជិតស្និទ្ធរបស់លោកស្រី ពីបទឧក្រិដ្ឋកម្មប្រឆាំងមនុស្សជាតិក្នុងអំឡុងពេលការបះបោរដែលដឹកនាំដោយនិស្សិតក្នុងខែកក្កដា និងសីហា ដែលបានបង្ខំឱ្យលោកស្រីភៀសខ្លួនចេញពីប្រទេស។ នេះបើយោងតាមលការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី១៨ខែតុលានេះ។

ព្រះរាជអាជ្ញាលោក B.M. Sultan Mahmud បាននិយាយថា តុលាការឧក្រិដ្ឋកម្មអន្តរជាតិ ដែលមានមូលដ្ឋាននៅទីក្រុង Dhaka ក្រោមការដឹកនាំម្ចាស់ជ័យលាភីណូបែល Muhammad Yunus ដែលជាមេដឹកនាំបណ្តោះអាសន្នរបស់ប្រទេស បានចេញដីកាចាប់ខ្លួនជាការឆ្លើយតបទៅនឹងញត្តិចំនួនពីរដែលដាក់ដោយព្រះរាជអាជ្ញា។

លោកបាននិយាយថា «ប្រធានសាលាក្តីលោក Golam Mortuza Majumdar បានចេញដីកានេះនៅចំពោះមុខចៅក្រមដទៃទៀត ដំបូងឡើយ សាលាក្តីបានទទួលយកញត្តិរបស់យើង ដែលពាក់ព័ន្ធនឹងលោកស្រី Sheikh Hasina តែម្នាក់ឯង បន្ទាប់​មក យើង​បាន​ដាក់​ញត្តិ​លើក​ទី​ពីរ​ប្រឆាំង​នឹង​មនុស្ស ៤៥ នាក់ ដែល​ពាក់ព័ន្ធ​នឹង​ជំនួយការ​ជិតស្និទ្ធ​របស់​លោកស្រី និង​អ្នក​ផ្សេង​ទៀត​ពី​បទ​ឧក្រិដ្ឋកម្ម​ប្រឆាំង​មនុស្សជាតិ និងក៏​ត្រូវ​បាន​សាលា​ក្តី​ទទួល​យក​ផង​ដែរ»។ ទោះយ៉ាងណាមិនមានប្រតិកម្មភ្លាមៗពីគណបក្សបង់ក្លាដែស Awami League របស់លោកស្រី Hasina ទេ។

គួរបញ្ជាក់ថាលោកស្រី Hasina បានភៀសខ្លួនចេញពីប្រទេសទៅកាន់ប្រទេសឥណ្ឌាកាលពីថ្ងៃទី ៥ ខែសីហាបន្ទាប់ពីការតវ៉ាដោយហិង្សាជាច្រើនសប្តាហ៍ជុំវិញកូតាការងាររបស់រដ្ឋាភិបាលដែលក្នុងនោះមនុស្សរាប់រយនាក់បានស្លាប់។ ព្រះរាជអាជ្ញាបាននិយាយនៅក្នុងញត្តិថា Hasina ជំនួយការជិតស្និទ្ធរបស់នាង និងភ្នាក់ងារសន្តិសុខត្រូវទទួលខុសត្រូវចំពោះការសម្លាប់បាតុករ និងអ្នកដទៃ។

យ៉ាងណាវាមិនច្បាស់ទេថាតើឥណ្ឌានឹងឆ្លើយតបទៅនឹងសំណើណាមួយពីបង់ក្លាដែសសម្រាប់ការធ្វើបត្យាប័នរបស់លោកស្រី Hasina ក្រោមសន្ធិសញ្ញាទៅវិញទៅមកឬយ៉ាងណា។ ប្រធានរដ្ឋអាជ្ញារបស់សាលាក្តីលោក Muhammad Tajul Islam បាននិយាយមុននេះថា ពួកគេនឹងស្វែងរកជំនួយពី Interpol ប្រសិនបើចាំបាច់ ដើម្បីនាំយកលោកស្រី Hasina មកវិញ ខណៈលោកស្រីHasina ប្រឈមមុខនឹងករណីជាង១០០ រួមទាំងករណីដែលត្រូវបានចោទប្រកាន់ពីបទឧក្រិដ្ឋកម្មប្រឆាំងមនុស្សជាតិ។

ជាមួយគ្នានេះរដ្ឋាភិបាលបណ្តោះអាសន្នដឹកនាំដោយលោក Yunus បានសន្យាថានឹងកាត់ទោសHasina និងអ្នកផ្សេងទៀតនៅក្នុងរដ្ឋបាលរបស់លោកស្រីសម្រាប់ឧក្រិដ្ឋកម្មដែលត្រូវបានចោទប្រកាន់ពាក់ព័ន្ធនឹងការបះបោរប្រឆាំងនឹងលោកស្រី ហើយបានអញ្ជើញអង្គការសហប្រជាជាតិឱ្យជួយស៊ើបអង្កេតការសម្លាប់នេះ។ ការស្លាប់ជាច្រើនអាចពាក់ព័ន្ធនឹងអ្នកផ្សេងទៀតលើសពីភ្នាក់ងារសន្តិសុខ ខណៈអាជ្ញាធរ​និយាយ​ថា មនុស្ស​ជាង ៧៥០ នាក់​ត្រូវ​បាន​សម្លាប់ និង​រាប់​ពាន់​នាក់​ទៀត​រង​របួស​ក្នុង​អំឡុង​ពេល​ការ​បះបោរ​ដ៏​ធំនាពេលនោះ៕

អត្ថបទ៖ ប៊ុន សុភាព