ព័ត៌មានអន្ដរជាតិ

ក្រុមហាម៉ាស ប្រកាសថាមិនដោះលែងចំណាប់ខ្មាំង ទោះលោក Sinwar ត្រូវបានសម្លាប់

បានផុស

៣ ខែ មុន

នៅ

ថ្ងៃសៅរ៍ ១៩ តុលា ២០២៤

ដោយ

Chheang

ក្រុមហាម៉ាស កាលពីថ្ងៃសុក្របានប្រកាសថា ខ្លួននឹងមិនដោះលែងចំណាប់ខ្មាំងនោះទេ រហូតដល់សង្រ្គាមហ្កាហ្សាបានបញ្ចប់។ ការប្រកាសនេះ ធ្វើឡើងខណៈពេលក្រុមសកម្មប្រយុទ្ធដែលមានការគាំទ្រដោយអ៊ីរ៉ង់នេះ កំពុងកាន់ទុក្ខចំពោះការស្លាប់របស់មេដឹកនាំរបស់ខ្លួនគឺលោក Yahya Sinwar។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Khalil al-Hayya មន្ត្រីក្រុមហាម៉ាសដែលមានមូលដ្ឋាននៅកាតា បាននិយាយនៅក្នុងសេចក្តីថ្លែងការណ៍ជាវីដេអូមួយថា៖ «យើងកាន់ទុក្ខមេដឹកនាំដ៏អស្ចារ្យ បងប្រុសដែលត្រូវគេសម្លាប់គឺ Yahya Sinwar, Abu Ibrahim»។

លោកបានបន្ថែមថា ចំណាប់ខ្មាំងនឹងមិនត្រូវដោះលែងទេ «លុះត្រាតែការឈ្លានពានប្រឆាំងនឹងប្រជាជនរបស់យើងនៅហ្គាហ្សាបញ្ឈប់ ហើយមានការដកខ្លួនចេញពីវាទាំងស្រុង ហើយអ្នកទោសវីរបុរសរបស់យើងត្រូវបានដោះលែងពីគុកអ្នកឈ្លានពាន»។

នាយករដ្ឋមន្ត្រីអ៊ីស្រាអែល លោក Benjamin Netanyahu បានហៅការសម្លាប់លោក Sinwar ថាជា «សញ្ញាសំខាន់ក្នុងការធ្លាក់ចុះនៃការគ្រប់គ្រងដ៏អាក្រក់របស់ពួកហាម៉ាស» ដោយបន្ថែមថា នេះមិនមែនជាការបញ្ចប់នៃសង្គ្រាមនោះទេ តែវាគឺជា «ការចាប់ផ្តើមនៃទីបញ្ចប់»។

នៅតំបន់ហ្គាហ្សា ពលរដ្ឋមានសង្ឃឹមតិចតួចថា ការសម្លាប់លោក Sinwar នឹងបញ្ចប់សង្រ្គាម។

លោក Jemaa Abou Mendi អាយុ ២១ឆ្នាំជាអ្នករស់នៅតំបន់ហ្គាហ្សា បានប្រាប់ទីភ្នាក់ងារព័ត៌មាន AFP ថា៖ «យើងតែងតែគិតថា នៅពេលវេលានេះមកដល់ សង្រ្គាមនឹងបញ្ចប់ហើយជីវិតរបស់យើងនឹងត្រឡប់ទៅរកសភាពធម្មតាវិញ។ ប៉ុន្តែជាអកុសល ការពិតនៅទីនេះគឺផ្ទុយស្រឡះ។ សង្រ្គាមមិនទាន់បានឈប់ទេ ហើយការសម្លាប់នៅតែបន្តមិនឈប់ឈរ»៕

ដោយ៖ ឈាង