រុស្ស៊ី គំរាមអ៊ុយក្រែន រឿងចង់បានអាវុធនុយក្លេអ៊ែរ

ប្រតិកម្មទៅនឹងការទាមទាររបស់លោក វ្ល៉ាឌីមៀរ ហ្សេលេនស្គី ដែលចង់បាននុយក្លេអ៊ែរ, ប្រធានាធិបតីរុស្ស៊ីលោក វ្ល៉ាឌីមៀរ ពូទីន បានគំរាមថា ទីក្រុងមូស្គូ នឹងមិនអនុញ្ញាតឲ្យទីក្រុងកៀវ ទទួលបានអាវុធបែបនេះឡើយ ហើយបើអ៊ុយក្រែន នៅតែព្យាយាមក្នុងរឿងនេះ សូមពួកគេត្រៀមខ្លួនទទួលការឆ្លើយតបឲ្យហើយទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្មីៗ ប្រធានាធិបតីអ៊ុយក្រែន ស្នើឡើងថា ទីក្រុងកៀវត្រូវការអាវុធនុយក្លេអ៊ែរ ប្រសិនបើខ្លួនមិនអាចក្លាយជាសមាជិកអង្គការណាតូបានទេនោះ។ លោកអះអាងថា​ អ៊ុយក្រែនអាចការពារខ្លួនបាន លុះត្រាសម្រេចបានគោលបំណងនេះ។

ពាក់ព័ន្ធបញ្ហានេះ លោកពូទីនបាននិយាយកាលពីថ្ងៃសុក្រ ក្នុងសន្និសីទសារព័ត៌មាននៅទីក្រុងមូស្គូថា «នេះគឺជាការទង្វើហេតុមួយទៀតហើយ។ នេះគឺជាទង្វើបង្កហេតុដ៏គ្រោះថ្នាក់មួយ ពីព្រោះជំហានណាមួយក្នុងទិសដៅនេះ នឹងត្រូវបានឆ្លើយតបដោយប្រតិកម្មសមស្រប។ ថ្នាក់​ដឹកនាំ​នយោបាយ​អ៊ុយក្រែន​បាន​បង្ហាញ​ពី​បំណង​ចង់​មាន​អាវុធ​នុយក្លេអ៊ែរ​ម្តង​ហើយ​ម្តង​ទៀត សូម្បី​តែ​មុន​ពេល​វិបត្តិ​ឡើងកម្តៅដល់កម្រិតនេះក៏ដោយ”។

រម្លឹកទៅខែមុន នៅក្នុងកិច្ចប្រជុំក្រុមប្រឹក្សាសន្តិសុខជាតិ លោកពូទីន បានដាក់លក្ខខណ្ឌថា ទោះប្រទេសគ្មាននុយក្លេអ៊ែរក៏ដោយ ប៉ុន្តែបើពួកគេមានការគាំទ្រពីប្រទេសមាននុយក្លេអ៊ែរឲ្យឈ្លានពានរុស្ស៊ី នោះត្រូវចាត់ទុកថាជាការវាយប្រហាររួមគ្នាហើយ ដូច្នេះទីក្រុងមូស្គូ ក៏អាចបាញ់នុយក្លេអ៊ែរសងសឹកទៅវិញបានដែរ។

សូមបញ្ជាក់ថា ប្រទេសអ៊ុយក្រែន ​មិន​ដែល​គ្រប់គ្រង​អាវុធ​នុយក្លេអ៊ែរ​ទេ ប៉ុន្តែ​​អះអាង​ថា ខ្លួន​ធ្លាប់​ស្ថិត​ក្នុង​ចំណោម​មហាអំណាច​បរមាណូ ​មុន​នឹង​សម្រេចចិត្ត​បោះបង់​ចោលវា។

ក្នុងសុន្ទរកថានៅឯសន្និសីទសន្តិសុខអន្តរជាតិទីក្រុង Munich នៃប្រទេសអាល្លឺម៉ង់កាលពីខែកុម្ភៈឆ្នាំ២០២២ ពោលគឺប៉ុន្មានសប្តាហ៍មុនពេលផ្ទុះជម្លោះជាមួយរុស្ស៊ី, លោក ហ្សេលេនស្គី បានសម្តែងក្តីសោកស្តាយជាពន់ពេកចំពោះការសម្រេចចិត្តនោះ ដោយលើកឡើងថា ប្រទេសរបស់គាត់មានសិទ្ធិគ្រប់យ៉ាងក្នុងការដូរចិត្តយកអាវុធនុយក្លេអ៊ែរមកវិញ៕

អត្ថបទ៖ សុខ សុវណ្ណ

ចុចអាន៖ លោក ហ្សេលេនស្គី ចង់បានអាវុធនុយក្លេអ៊ែរ