ធ្លាក់យន្តហោះចម្បាំងនៅវ៉ាស៊ីនតោនសម្លាប់អាកាស​យានិកកងទ័ពជើងទឹក​២​នាក់

សមាជិកអាកាសយានិកពីរនាក់ដែលបានបាត់ខ្លួនត្រូវបានប្រកាសថា «ស្លាប់» បន្ទាប់ពីធ្លាក់យន្តហោះចម្បាំង​នៅ​តំបន់ភ្នំក្នុងរដ្ឋ Washington ក្នុង​អំឡុងពេលហោះហើរហ្វឹកហាត់។ នេះបើយោងតាមការចេញផ្សាយរបស់ទីភ្នាក់ងារព័ត៌មាន​AP នៅថ្ងៃទី២១ខែតុលានេះ។

ស្ថានីយអាកាស Naval Air Station Whidbey Island បានឲ្យដឹងថា យន្តហោះ EA-18G Growler មកពីក្រុម Electronic Attack Squadron បាន​ធ្លាក់​នៅភាគខាងកើតនៃភ្នំ Rainier កាល​ពីរសៀលថ្ងៃអង្គារ។ ក្រុមស្វែងរក រួមទាំងឧទ្ធម្ភាគចក្រ MH-60S របស់កងទ័ពជើងទឹកសហរដ្ឋអាមេរិក ព្យាយាមស្វែង កន្លែងធ្លាក់​ដែលមានទីតាំង​នៅ​ចម្ងាយប្រហែល១៨២៨ ម៉ែត្រនៅតំបន់ដាច់ស្រយាល ចោត និងព្រៃឈើយ៉ាងក្រាស់នៅភាគខាងកើត ភ្នំ Rainier។ ឈ្មោះ​របស់​អាកាសយានិក​នឹងមិនត្រូវបានបញ្ចេញទេ ខណៈការធ្លាក់នេះកំពុងស្ថិតនៅក្រោមការស៊ើបអង្កេតនៅឡើយ។

ស្ថានីយអាកាសចរ បានឲ្យដឹងថា ការផលិត Growler ដំបូងត្រូវបានបញ្ជូនទៅកោះ Whidbey ក្នុងឆ្នាំ​២០០៨។ ក្នុងរយៈពេល ១៥ ឆ្នាំកន្លងមកនេះ Growler បានប្រតិបត្តិការជុំវិញពិភពលោកដែលគាំទ្រសកម្មភាពសំខាន់ៗ។

យន្តហោះ​នេះ​មាន​អ្នក​បើក​យន្តហោះ​នៅ​ខាង​មុខ ហើយ​អ្នក​បញ្ជា​អេឡិចត្រូនិក​នៅ​ពី​ក្រោយ​។ យន្តហោះ EA-18G Growler ជាយន្តហោះចម្បាំងដែលតំណាងឱ្យបច្ចេកវិទ្យាទំនើបបំផុតក្នុងការវាយប្រហារតាមអាកាស ហើយឈរជាខ្សែការពារដំបូងរបស់កងទ័ពជើងទឹកក្នុងបរិយាកាសអរិភាព ហើយយន្តហោះនីមួយៗមានតម្លៃប្រហែល ៦៧ លានដុល្លារឯណោះ។

គួរបញ្ជាក់ថាលំហាត់ហ្វឹកហ្វឺនយន្តហោះយោធាអាចមានគ្រោះថ្នាក់ ហើយជួនកាលបណ្តាលឱ្យធ្លាក់ របួស និងស្លាប់។កាលពីខែឧសភា យន្តហោះចម្បាំង F-35 ដែលកំពុងធ្វើដំណើរពីរដ្ឋTexas ទៅកាន់មូលដ្ឋានទ័ពអាកាស Edwards ក្បែរទីក្រុង Los Angeles បានធ្លាក់ បន្ទាប់ពីអាកាសយានិកបានឈប់ចាក់ប្រេងនៅ New Mexico ។ នៅពេលនោះមានអ្នកបើកយន្តហោះម្នាក់គត់នៅរស់រានមានជីវិតដោយមានរបួសធ្ងន់ធ្ងរ។ ជាមួយគ្នានេះកាលពីឆ្នាំមុន សមាជិកអាកាសយាននិកបញ្ជាការប្រតិបត្តិការពិសេសរបស់កងទ័ពអាកាសអាមេរិកចំនួនប្រាំបីនាក់បានស្លាប់នៅពេលដែលយន្តហោះ CV-22B Osprey បានធ្លាក់នៅឆ្នេរសមុទ្រប្រទេសជប៉ុន៕

អត្ថបទ៖ ប៊ុន សុភាព