ទឹកជំនន់ភ្លាមៗវាយប្រហាររដ្ឋ New Mexico​ បណ្តាល​ឱ្យស្លាប់​និង​របួស​​ច្រើន​

មន្រ្តី​សន្តិសុខ​នៅ​រដ្ឋ New Mexico កំពុងធ្វើបេសកកម្មស្វែងរក និងជួយសង្គ្រោះនៅទីក្រុង Roswell បន្ទាប់ពីភ្លៀងធ្លាក់បំបែកកំណត់ត្រា បណ្តាល​ឱ្យ​មានទឹកជំនន់ធ្ងន់ធ្ងរសម្លាប់មនុស្សយ៉ាងហោចណាស់២នាក់និងរាប់សិបនាក់ទៀតរងរបួស។ នេះបើយោងតាមការចេញផ្សាយរបស់សារព័ត៌មាន NBC នៅថ្ងៃទី២១ខែតុលានេះ។

ប៉ូលិសរដ្ឋ New Mexico បាននិយាយកាលពីថ្ងៃអាទិត្យថា មនុស្សយ៉ាងហោចណាស់ពីរនាក់បានស្លាប់ដោយសារទឹកជំនន់ភ្លាមៗ ប៉ុន្តែព័ត៌មានអំពីជនរងគ្រោះ ឬស្ថានភាពនៃការស្លាប់របស់ពួកគេមិនត្រូវបានចេញផ្សាយភ្លាមៗនោះទេ។

មនុស្សជាង៣០០នាក់ត្រូវបានជួយសង្គ្រោះចាប់តាំងពីថ្ងៃសៅរ៍ ដោយ៣៨នាក់ក្នុងចំណោមអ្នកទាំងនោះត្រូវបានបញ្ជូនទៅមន្ទីរពេទ្យដោយសាររងរបួស។ ទឹកជំនន់ភ្លាមៗដែលបង្កឡើងដោសារភ្លៀងធ្លាក់ខ្លាំងនេះ ក៏បានបណ្ដាលឲ្យផ្ទះ និងអាជីវកម្ម​ជា​ច្រើន​បាន​ចាប់ផ្តើមជន់លិចផងដែរ។

ក្រសួងឧតុនិយម បានឲ្យដឹងថា ភ្លៀងធ្លាក់ ប្រហែល​១៤,៧សង់ទីម៉ែត្រ នៅទីក្រុង Roswell កាលពីថ្ងៃសៅរ៍ ដោយបំបែក​កំណត់ត្រាប្រចាំថ្ងៃពីមុនប្រហែល ១៤,៦ សង់ទីម៉ែត្រ ដែល​បានកំណត់នៅថ្ងៃទី​១ខែវិច្ឆិកា ឆ្នាំ​១៩០១ ក្នុងទីក្រុង New Mexico ភាគអាគ្នេយ៍។

មួយរយៈចុងក្រោយយនេះសហរដ្ឋអាមេរិកបានទទួលរងនូវឥទ្ធិពលជាច្រើនពីការប្រែប្រួលអាកាសធាតុដូចជា ព្យុះដូចជាកំណាច Milton និង Helene រួមទាំងភ្លៀងធ្លាក់ខ្លាំងដែលបង្កជាទឹកជំនន់ភ្លាមៗបណ្ដាលឲ្យរងផលដល់អាយុជីវិតមនុស្សនិងហេដ្ឋារចនាសម្ព័ន្ធនានារាប់រយលានដុល្លារ៕

អត្ថបទ៖ ប៊ុន សុភាព