ព័ត៌មានអន្ដរជាតិ

អនុប្រធានក្រុមហេសបូឡា លួចរត់ទៅអ៊ីរ៉ង់ ព្រោះខ្លាចអ៊ីស្រាអែលធ្វើឃាត

បានផុស

៤ ខែ មុន

នៅ

ថ្ងៃចន្ទ ២១ តុលា ២០២៤

ដោយ

Chheang

លោក Naim Qassem អនុប្រធាន និងជាសហស្ថាបនិកមួយរូបរបស់ក្រុមហេសបូឡា បានលួចចាកចេញពីប្រទេសលីបង់ដោយស្ងាត់ៗ ហើយទៅរកទីជ្រកអាស្រ័យនៅអ៊ីរ៉ង់ ខណៈអ៊ីស្រាអែលកំពុងសម្រុកវាយប្រហារយ៉ាងចាស់ដៃទៅលើក្រុមសកម្មប្រយុទ្ធរបស់លោក។ នេះបើយោងតាមការចុះផ្សាយរបស់ទីភ្នាក់ងារព័ត៌មាន Erem របស់អារ៉ាប់ ដែលបានដកស្រង់ចេញពីប្រភពមន្ត្រីអ៊ីរ៉ង់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមសេចក្ដីរាយការណ៍ លោក Qassem បានចេញពីរដ្ឋធានីបេរូត តាំងពីថ្ងៃទី៥ខែតុលាមកម៉្លេះ តាមរយៈយន្តហោះ១គ្រឿងរបស់រដ្ឋមន្ត្រីក្រសួងការបរទេសអ៊ីរ៉ង់លោក Abbas Araghchi ក្រោយលោកបានធ្វើដំណើរទស្សនកិច្ចនៅក្នុងប្រទេសលីបង់ និងស៊ីរី។ ការជម្លៀសខ្លួនរបស់លោក Qassem ធ្វើឡើងតាមការបញ្ជារបស់មេដឹកនាំកំពូលមួយចំនួននៃប្រទេសអ៊ីរ៉ង់ ដោយហេតុថាខ្លាចលោកត្រូវកងកម្លាំងអ៊ីស្រាអែលសម្លាប់។

ចាប់តាំងពីការស្លាប់លោក Hassan Nasrallah ដែលជាអតីតមេដឹកនាំក្រុមហេសបូឡាក្រោមថ្វីដៃអ៊ីស្រាអែលកាលពីថ្ងៃទី២៧ខែកញ្ញា លោក Qassem ធ្លាប់បានចេញសេចក្ដីថ្លែងការណ៍ចំនួនតែ៣លើកប៉ុណ្ណោះ ដោយសេចក្ដីថ្លែងការណ៍មួយធ្វើចេញពីទីក្រុងបេរូត និងពីរទៀតធ្វើនៅទីក្រុងតេហេរ៉ង់នៃប្រទេសអ៊ីរ៉ង់។

ជាការកត់សម្គាល់ អ៊ីស្រាអែលបានសម្លាប់មេដឹកនាំជាន់ខ្ពស់ជាច្រើននៃក្រុមហេសបូឡា ចាប់តាំងពីពេលផ្ទុះសង្គ្រាមជាមួយក្រុមហាម៉ាសនៅតំបន់ហ្គាហ្សា។

សកម្មភាពនយោបាយរបស់លោក Qassem បានចាប់ផ្ដើមចេញពីចលនាក្រុម Shi’ite Amal នៅលីបង់។ លោកបានចាកចេញពីក្រុមនេះនៅឆ្នាំ១៩៧៩ រួចចូលរួមជាមួយក្រុមបដិវត្តន៍អ៊ីស្លាមរបស់អ៊ីរ៉ង់។ លោកគឺជាសហស្ថាបនិកក្រុមហេសបូឡា ដែលការបង្កើតក្រុមសកម្មប្រយុទ្ធនេះឡើងទទួលបានការគាំទ្រដោយអ៊ីរ៉ង់ បន្ទាប់ពីការវាយប្រហាររបស់អ៊ីស្រាអែលនៅលីបង់ក្នុងឆ្នាំ១៩៨២៕

ដោយ៖ ឈាង