ព័ត៌មានអន្ដរជាតិ

ប្រធានាធិបតីប្រេស៊ីលលុបចោលដំណើរទៅរុស្ស៊ីបន្ទាប់ពីរបួសក្បាល

បានផុស

១៧ វិនាទី មុន

នៅ

ថ្ងៃចន្ទ ២១ តុលា ២០២៤

ដោយ

ប្រធានាធិបតីប្រេស៊ីល លោក Luiz Inácio Lula da Silva បានលុបចោលការធ្វើដំណើរទៅកាន់ប្រទេសរុស្ស៊ី ដើម្បីចូលរួមកិច្ចប្រជុំកំពូល BRICS បន្ទាប់ពីបានរងរបួសក្បាលក្នុងឧបទ្ទវហេតុនៅផ្ទះដោយខ្លួនឯងកាលពីថ្ងៃសៅរ៍។ នេះបើយោងតាមការចេញផ្សាយរបស់សារព័ត៌មាន BBC នៅថ្ងៃទី២១ខែតុលានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានាធិបតីប្រេស៊ីលវ័យ៧៨ឆ្នាំរូបនេះគ្រោងនឹងធ្វើដំណើរនៅរសៀលថ្ងៃអាទិត្យសម្រាប់កិច្ចប្រជុំកំពូល Brics ដែលជាក្រុមនៃប្រទេសកំពុងអភិវឌ្ឍន៍សំខាន់ៗរួមមាន ប្រេស៊ីល រុស្ស៊ី ឥណ្ឌា ចិន និងអាហ្វ្រិកខាងត្បូង។ លោក Lula ត្រូវបានកំណត់ឱ្យធ្វើដំណើរនៅម៉ោង១៧:០០ម៉ោងក្នុងស្រុក កាលពីថ្ងៃអាទិត្យក្នុងដំណើរទៅរុស្ស៊ីដែលនឹងក្លាយជាជំនួបទល់មុខគ្នាជាលើកដំបូងរបស់លោកជាមួយប្រធានាធិបតីរុស្ស៊ីលោក Vladimir Putin នៅឆ្នាំនេះ។

បន្ទាប់រងរបួសមន្ទីរពេទ្យកំពូលមួយក្នុងរដ្ឋធានី Brasília បានណែនាំឲ្យប្រធានាធិបតីរូបនេះជៀសវាងការហោះហើរផ្លូវឆ្ងាយជាបណ្តោះអាសន្ន ប៉ុន្តែអាចបន្តសកម្មភាពផ្សេងទៀតដូចធម្មតា។ លោកបានរងរបួសត្រង់ក្បាលផ្នែកខាងក្រោយ និងមានស្នាមដេរចំនួន ៥ ទោះយ៉ាងណាក្រោយមកត្រូវបានបញ្ជូនទៅផ្ទះវិញ ហើយលោកនឹងចូលរួមក្នុងការប្រជុំតាមរយៈតំណវីដេអូជំនួសវិញ។ យ៉ាងណាមិញការិយាល័យរបស់ប្រធានាធិបតីមិនបានបង្ហាញព័ត៌មានលម្អិតបន្ថែមអំពីរបួសរបស់គាត់នោះទេ។

លោក ពូទីន កាលពីថ្ងៃសុក្របានប្រកាសថាលោកនឹងមិនចូលរួមកិច្ចប្រជុំកំពូល G២០ នៅប្រទេសប្រេស៊ីលនៅខែក្រោយនោះទេ ដោយថាការមកដល់របស់លោកអាចរំខានសន្និសីទ ហើយបានប្រកែកថាដីការបស់តុលាការឧក្រិដ្ឋកម្មអន្តរជាតិ (ICC) ក្នុងការចាប់ខ្លួនលោកមិនមែនជាបញ្ហាទេ។

ទោះយ៉ាងណា កាលពីឆ្នាំមុន លោក ពូទីន បានរំលងកិច្ចប្រជុំកំពូល Brics លើកមុននៅអាហ្វ្រិកខាងត្បូង បន្ទាប់ពី ICC បានចេញដីកាចាប់ខ្លួនលោក។ នៅពេលនោះប្រសិនបើលោក ពូទីន ចាកចេញពីដីរុស្ស៊ី លោកនឹងត្រូវទទួលបានដីកាចាប់ខ្លួន។ ក្នុងនាមជាប្រទេសហត្ថលេខីរបស់ ICC អាហ្វ្រិកខាងត្បូង និងប្រេស៊ីលត្រូវបានគេរំពឹងថានឹងជួយក្នុងការចាប់ខ្លួនលោកពូទីន។

គួរបញ្ជាក់ថាកិច្ចប្រជុំកំពូល Brics ត្រូវបានបង្កើតឡើងកាលពី ១៥ ឆ្នាំមុនដោយប្រទេសកំពុងរីកចម្រើនខាងសេដ្ឋកិច្ចធំៗដូចជា ប្រេស៊ីល រុស្ស៊ី ឥណ្ឌា ចិន ហើយចាប់តាំងពីពេលនោះមកបានពង្រីកដល់ប្រទេសអាហ្រ្វិកខាងត្បូង អេហ្ស៊ីប អេត្យូពី អ៊ីរ៉ង់ និងអេមីរ៉ាតអារ៉ាប់រួម ខណៈកិច្ចប្រជុំកំពូលនៅឆ្នាំនេះនឹងប្រព្រឹត្តទៅនៅទីក្រុង Kazan ប្រទេសរុស្ស៊ីពីថ្ងៃអង្គារដល់ថ្ងៃព្រហស្បតិ៍សប្ដាហ៍នេះ៕