អេហ្ស៊ីប​ប្រកាស គ្មាន​ជំងឺ​គ្រុនចាញ់ បន្ទាប់ពីកិច្ចខិតខំប្រឹងប្រែង១០០ឆ្នាំ

ប្រទេសអេហ្ស៊ីបត្រូវបានទទួលស្គាល់ថា គ្មានជំងឺគ្រុនចាញ់ដោយអង្គការសុខភាពពិភពលោក (WHO) ដែលជាសមិទ្ធផលត្រូវបានសាទរដោយទីភ្នាក់ងារសុខភាពសាធារណៈរបស់អង្គការសហប្រជាជាតិជាប្រវត្តិសាស្ត្រ។ នេះ​បើយោងតាមការចេញផ្សាយរបស់សារព័ត៌មាន BBC នៅថ្ងៃទី២១ខែតុលានេះ។

ប្រធានអង្គការ WHO លោក Tedros Adhanom Ghebreyesus បាននិយាយថា៖​«ជំងឺគ្រុនចាញ់ជាជំងឺដែលញាំញីប្រទេសនេះជាប្រវត្តិ»។

អាជ្ញាធរ​អេហ្ស៊ីប​បាន​ចាប់ផ្តើម​កិច្ច​ខិតខំ​ប្រឹងប្រែង​ជា​លើក​ដំបូង​ដើម្បី​កំចាត់​មេរោគ​ឆ្លង​ដែល​ចម្លង​ដោយ​សត្វ​មូស​ដ៏​សាហាវ​មាន​រយៈពេលជិត​១០០​ឆ្នាំមកហើយ ខណៈជំងឺគ្រុនចាញ់បានសម្លាប់មនុស្សយ៉ាងហោចណាស់ ៦០ម៉ឺននាក់ជារៀងរាល់ឆ្នាំ ដែល​ស្ទើរតែទាំងអស់នៃចំនួននេះនៅក្នុងទ្វីបអាហ្វ្រិក។

WHO​ តែងតែផ្ដល់វិញ្ញាបនប័ត្រទៅឲ្យប្រទេសណាដែលបានព្យាយាមខិតខំលុបបំបាត់ជំងឺនេះ។ នៅក្នុងសេចក្តីថ្លែងការណ៍មួយ WHO បានសរសើរ រដ្ឋាភិបាលនិងប្រជាជនអេហ្ស៊ីបសម្រាប់កិច្ចខិតខំប្រឹងប្រែងរបស់ពួកគេដើម្បី បញ្ចប់ជំងឺដែលមានវត្តមាននៅក្នុងប្រទេសនេះតាំងពីបុរាណកាលមក ខណៈអេហ្ស៊ីបគឺជាប្រទេសទីបីដែលត្រូវបានបញ្ជាក់ថាគ្មាន​ជំងឺ​គ្រុនចាញ់នៅក្នុងតំបន់មេឌីទែរ៉ាណេខាងកើតរបស់អង្គការសុខភាពពិភពលោកបន្ទាប់ពីអេមីរ៉ាតអារ៉ាប់រួមនិងម៉ារ៉ុក។

សរុបមកនៅទូទាំងពិភពលោក ប្រទេសចំនួន៤៤និងដែនដីមួយបានឈានដល់ការសម្រេចបានទាំងស្រុងនេះ ទោះយ៉ាងណា WHO បាននិយាយថា វិញ្ញាបនប័ត្រនេះគ្រាន់តែជា «ការចាប់ផ្តើមនៃដំណាក់កាលថ្មីមួយ» ដោយជំរុញឱ្យប្រទេសអេហ្ស៊ីប មានការប្រុងប្រយ័ត្ន ដើម្បីរក្សាស្ថានភាពគ្មានជំងឺគ្រុនចាញ់នេះឲ្យស្ថិតស្ថេរ។

គួរបញ្ជាក់ថាដើម្បីទទួលបានវិញ្ញាបនបត្ររបស់អង្គការសុខភាពពិភពលោក ប្រទេសមួយត្រូវតែបង្ហាញពីសមត្ថភាពទប់ស្កាត់ការឆ្លងរាលដាល ខណៈកិច្ចខិតខំប្រឹងប្រែងដំបូងដើម្បីកំណត់ការប៉ះពាល់មនុស្សនិងមូសនៅក្នុងប្រទេសអេហ្ស៊ីបបានចាប់ផ្តើមតាំងពីទសវត្សរ៍ឆ្នាំ ១៩២០ ដោយប្រទេសនេះបានហាមឃាត់ការដាំដុះស្រូវ និងដំណាំកសិកម្មនៅជិតផ្ទះ។

ជំងឺគ្រុនចាញ់គឺបណ្តាលមកពីប៉ារ៉ាស៊ីតស្មុគ្រស្មាញដែលឆ្លងរីករាលដាលដោយមូសខាំ។ មកដល់ពេលនេះមានវ៉ាក់សាំងកំពុងត្រូវបានប្រើប្រាស់នៅកន្លែងខ្លះ ប៉ុន្តែការតាមដានជំងឺ និងជៀសវាងការខាំមូស គឺជាវិធីដ៏មានប្រសិទ្ធភាពបំផុតក្នុងការបង្ការជំងឺគ្រុនចាញ់នេះ៕

អត្ថបទ៖ ប៊ុន សុភាព